Dekretuaren bidez ezin zutena egin orain Foru Arauaren bidez egin nahi dutela salatu du Arantza Urkaregi batzarkideak

| 2019-10-24 14:08:00

Atzo Foru-Gobernuak argitaratutako Foru Dekretu Proiektuaren zirriborroaren aurrean, EH Bilduk salatu du proposatutako aldaketen gauzak bere horretan uzten dituztela.

Arantza Urkaregi batzarkideak azpimarratu duenez, “edukia berbera da. Aurkeztutako aldaketekin egin duten gauza bakarra da errenta irregularrak beste modu batera definitzea. Lehen errenta irregularrak zirenak orain erregimen berezi bezala definitzen dituzte. 300.000 euroko muga kentzeari eta inbertsio-funtsen bitartez lortutako etekinei dagozkien artikuluak kendu dituzte eta Foru Arauaren artikulu bezala aurkeztu”.

Urkaregik azpimarratu duenez, aldaketa horiekin inbertsio-funtsetako kudeatzaileen etekinen %50 salbuetsita egongo da mugarik. “Berriz ere gehien daukatenei mesede egiten dien neurri fiskal atzerakoi bat planteatzen dute. Eta, berriz ere, PSEk EAJk proposatutako neurri atzerakoi bat onartzen du, zerga-sistema progresibo baten alde egin beharrean”.  

Horretaz gain, EH Bilduko batzarkideak gogoratu du ekintzailetza eta ehun enpresariala erakartzeko bidea ez dela inbertsio-funtsen alde egitea. “Inbertsio-funtsen helburua diru gehien ateratzea da eta hori lortzean alde egitea. Orain dela gutxi Euskaltelekin argi ikusi dugu zein den inbertsio-funts hauen portaera”.

Estatuaren errepresio eta mehatxuei bozka soberanista eta desobedienteekin erantzuteko beharra azpimarratu du Oskar Matutek

Kongresurako Bizkaiko hautagai nagusiak espainiar estatuak bizi duen atzeraldi demokratikoa salatu du

| 2019-10-20 12:58:00

Oskar Matutek, Kongresurako EH Bilduren Bizkaiko hautagai nagusiak, espainiar estatuak bizi duen atzeraldi demokratikoa salatu du. Adierazpenak Bizkaiko hautagaitzaren aurkezpenean egin ditu gaur Barakaldon.

Matuteren hitzetan, azken asteetako epaiekin, “argi gelditu da atzeraldi demokratiko batean gaudela. Altsasuko gazteen aurka eta Kataluniako buruzagien kontrako zigorren atzean, mendekua baino ez dagoela; justiziarik ez. PSOE aurrerakoia zelakoan aurkeztu zen gobernua osatzeko, baina demostratu egin du, bloke atzerakoiaren beste hanka bat baino ez dela”.

Horretaz gain, gaur egun duen arazo larriena lurraldetasunarena dela adierazi du eta egoera horri erantzun behar zaiola. “Euskal Herriaren eta Kataluniaren erabakitzeko eskubide nahiaren aurrean: ukazioa, errepresioa eta mehatxuak. Guztiz onartezina da, eta horregatik hauteskunde hauek baliatu behar ditugu herri bezala erantzuteko. Bozka soberanista eta desobedienteekin erantzun behar diegu”, azpimarratu du.

Idurre Bideguren Kongresurako bigarren hautagaiak ere erantzun bat ematea zein garrantzitsua den aipatu du. Bere ustez, “batzuen arduragabekeriak ekarri gaitu hauteskunde berri hauetara. Baina guk gure hitza bete dugu eta prest eta indartsu gaude berriz erantzuteko”.

Cables y Alambres enpresaren egoera zailaren aurrean instituzioen parte-hartze aktiboa eskatu du EH Bilduk

EH Bilduk babesa adierazi die kalean geratzekotan dauden langileei

| 2019-10-08 14:23:00

Iker Casanova EH Bilduko legebiltzarkidea eta Imanol Eguskiza Erandioko zinegotzia Cables y Alambres enpresan izan dira gaur. Bertan enpresaren itxieragatik kalean geratzekotan diren langileei babesa adierazi die eta instituzioei deia egin die itxiera saihestu dezaten.

 

“Argi dago Jaurlaritzak ez daukala krisian dauden enpresak laguntzeko estrategia bat. Beti dira langileak laguntza eske aritu behar direnak. Protokolo integral bat eskatzen dugu krisian dauden enpresak artatzeko. Jaurlaritzak aholkularitza eman dezake, Jaurlaritzak inbertsore bat bilatzen lagundu dezake”, adierazi du Casanovak eta azpimarratu du “enpresak erakartzeaz gain instituzioak bertan daudenak mantentzeaz arduratu behar direla”.

 

Eguskizak, bere aldetik, Erandioko udalari eskatu dio enpresa ez ixteko beharrezko lanak egitea. “Lurrei dagokienez, Vicinayri argi utzi beharko lioke orube horren lurrak ez direla berkalifikatuko eta ez duela inolako irabazirik lortuko itxierarekin”.

 

Azkenik, EH Bilduk deia luzatu du datorren urriaren hamaikarako langileek deitutako mobilizazioan parte hartzera.

EH Bilduk eta Elkarrekin Bizkaiak Batzar Nagusietan politika industrialari buruzko batzorde berezi bat sortzea proposatu dute

Azterketarako batzorde honen egitekoa Aldundiari Bizkaiko politika industrialaren inguruko gomendioak idaztea izango litzateke

| 2019-10-03 12:09:00

Batzar Nagusietako Elkarrekin Podemos eta EH Bildu taldeek Bizkaiko sektore industrialaren egoera eta etorkizuna aztertzeko batzorde berezi bat sortzeko eskaria erregistratu dute. Proposamena hurrengo ohiko plenoan eztabaidatua eta bozkatua izan behar da.

 

Talde bien ustetan, “gure herrialdeko sektore industrialaren oraina eta etorkizuna alderdi politiko guztiei kezkatzen gaituen zerbait da. Hori agerian geratu zen Ahaldun Nagusia izendatzeko plenoan eta, baita ere, irailekoan”, azpimarratu dute Bea Ilardia eta Xabier Benito EH Bildu eta Elkarrekin Podemoseko batzarkideak, hurrenez hurren.

 

“Historikoki lurralde industriala izan gara eta etorkizuna ere hortik pasatzen da. Kalitatezko sektore industrial jasangarri batek bakarrik eskainiko digu etorkizun egonkor bat”, adierazi Ilardiak.

 

Azken urteetan emandako itxierekin eta enplegu erregulazioko espedienteek agerian utzi dute egoera ez dela batere ona. “EIN-ren datuen arabera, 2017 eta 2018 urteen artean Bizkaian 16.000 lanpostu galdu ditu sektore industrialean. Nahiz eta herrialdeak hazkunde makroekonomikoa bizi lanpostuak, enpresak eta lehiakortasuna galtzen goaz”, adierazi du Benitok.

 

Benitoren iritziz, “Bizkaia datorren krisirako prestatu behar da, bere enpresa estrategikoak eta sektorea indartuz”. Horretarako, Elkarrekin Bizkaiak proposatzen du Bizkaian “industria politikak aktore sozial, ekonomiko eta politikoen parte hartzea eta babesa izatea, horrela dauden enpresak eusteko eta berriak erakartzeko”.

EH Bilduk birjarpen helegitea aurkeztu du errenta irregularren inguruko aldaketak bertan behera uzteko

Aldaketa eragin duen Foru Dekretua legez kanpokoa da eta Batzar Nagusien eskumen araugilea urratu da

| 2019-09-24 10:41:00

Errenta irregularren inguruko aldaketak bertan behera uzteko birjarpen helegitea aurkeztu du EH Bilduk.

Foru gobernuak bere kabuz eta dekretu bidez egindako aldaketak legez kanpokoak direla azpimarratu du EH Bilduk eta abuztuan egindako aldaketak bertan behera uzteko eskatu du.

Ezkutuan egindako aldaketa horrek Batzar Nagusien eskumen araugilea urratu du. “Batzar Nagusiek daukaten egiteko garrantzitsuenaren kontra egin dute. Eztabaida eta erabakitzeko ahalmena urratu dituzte aldaketak Foru Dekretu baten bitartez egiterakoan. Inorekin eztabaidatu eta adostu gabe gehien daukatenen alde egin dute”, adierazi du Arantza Urkaregi batzarkideak.

Inolako arrazoirik ez aldaketa egiteko

Horretaz gain, “foru gobernuak ez du arrazoitzen zergatik kendu den 300.000 euroko muga. Ez da inolako arrazoirik ematen muga hori kentzeko eta, beste alde batetik, ez daukagu aldaketa horrek ogasunean izango duen eragina zehazten duen inolako txosten ekonomikorik”, azpimarratu du Arantza Urkaregi EH Bilduko batzarkideak.

• «
• 1
• 2
• ...
• 10
• 11
• 12
• 13
• 14
• 15
• 16
• ...
• 18
• 19
• »