Bilbo

EH Bilduk eskatuta, pandemiak Bilboko adierazpen artistikoetan sortutako egoeraren diagnostikoa egingo du Udalak, horien beharrak ezagutu eta neurriak ezartzeko

| 2021-05-27 17:37:00

Bilboko Udalak, EH Bilduk proposatuta, Bilboko arte-adierazpeneatan sortutako egoeraren diagnostikoa egingo du, hainbat eragilerekin harremanetan eta lankidetzan (profesionalak, amateurrak, elkarteak, akademiak, etab.), egungo eta etorkizuneko egoerak eta beharrak ezagutzeko eta Udalak neurriak ezartzeko. EH Bilduk aurkeztutako mozio baten ondorioz, alderdi soberanistak eta gobernu taldeak egindako zuzenketa onartu ostean adostu dute akordioa.

Era berean, Udalak, kulturari eta hezkuntzari ematen duen babesaren barruan, esparruan, artista eta sortzaile gazteen lana sustatu eta babesteko neurriak abiaraztea aztertutko du.

Ildo beretik, Jone Goirizelaiak, EH Bildu Bilboko bozeramaileak, adierazi duen bezala, kultur arloan egiten den lan garrantzitsua kontuan hartuta, hau da, tokiko kulturaren erakusle eta oinarri dela; sektoreko eragileek (antzerkia, dantza, musika, literatura, ikus-entzunezkoak, abesbatzak…) egiten duten lanari ezagutza agertzeko eta sustatzeko ekimenak egingo dira, dagozkien adierazpen artistikoak ospatzeko Nazioarteko Egunarekin bat egiten ahaleginduta.

Goirizelaiak gogoratu duenez, pandemiak ondorioak izan ditu esparru guztietan, Bilboko eta Euskal Herriko kultur esparruan baita ere. “Dantzara, antzerkira, musikara, edo beste adierazpen artistiko batzuetara dedikatutako pertsonek, elkarteek, akademiek… ezohiko egoera batera egokitu behar izan dira, horretarako asmamen dosi handiak erabiliz, horrek ekarri duen kostuarekin eta zailtasunekin", azaldu du.

Egia da gaur egun presentzialtasuna berreskuratu ahal izan dela, baina, Goirizelaiak esan duenez, egoerak "zaila izaten jarraitzen du diziplina artistiko desberdinentzat, segurtasun-arauek jarduera mugatzen dutelako (edukiera, distantzia, etab.) eta zenbait jarduera oraindik ezin direlako gauzatu”. "Abesbatzek, antzerki taldeek, akademiek, ikuskizunetako teknikariek edo laguntzaileek egoera ezohikoan eta prekarioan jarraitzen dute", gaineratu du.

Gainera, ohartarazi duenez, egoera horrek "pertsona askok diziplina artistikoak alde batera uzteko arriskua dakar, eta hori oso albiste txarra da kulturarentzat eta gure hiriarentzat, kulturarik gabeko herria etorkizunik gabeko herria delako".

Hala, gaur lortutako akordioa "garrantzitsua" dela azpimarratu du, "gure kultura eta gure hiriaren egungo eta etorkizuneko artistak zaintzeko urrats bat delako". "Pertsonek abesten, dantzatzen, antzerkia egiten, idazten… jarraitu ahal izateko Bilbo bat nahi dugu, horrek guztiok aberasten gaituelako eta hiriari bizia ematen diolako", gaineratu du.

Bilboko Udalak pandemiaren eraginez ongizate emozionalaren eta osasun mentalaren esparruan laguntza eskaintzeko programa bat abiaraziko du, EH Bilduren ekimenez

| 2021-05-27 10:24:00

EH Bildu udal taldearen ekimenez, Udal Gobernuak pandemiak ongizate emozionalaren eta osasun mentalaren arloan eragindako kolektiboei laguntzeko programa bat martxan jarriko du, udalaren eskumenen barruan. EH Bilduk aurkeztutako mozio baten ondorioz, alderdi soberanistak eta gobernu taldeak egindako zuzenketa onartu ostean adostu dute akordioa.

Bruno Zubizarreta EH Bilduko zinegotziaren esanetan, akordio hau “'Bilbao Aurrera' berezia bat izango da, COVID 19aren ondorioz, zaurgarritasun emozionala duten gure hiriko pertsonei arreta berezia eskaintzeko". "Gure betebeharra da, eta egin egingo dugu", azpimarratu du.

Zubizarretak azaldu duenez, "errealitate bat da pandemiak eremu ezberdinetan dituen ondorioek herritarren osasun mentalari zuzenean eta modu garrantzitsuan eragiten diotela". "Antsietatea, beldurra, bakardadea, distantzia soziala, murrizketak, estresa eta ziurgabetasuna zabaldu eta areagotu egin dira azken hilabeteetan", gaineratu du.

Horren harira, ohartarazi du "arreta berezia" behar duela pandemia nerabeengan izaten ari den eragin emozionalak; izan ere, "era guztietako osasun mentaleko arazoengatik (bizia kentzeko saiakera, deskonpentsazio emozionalak…) gazteenen ospitaleratzea % 60 igo da Euskadin".

Horregatik guztiagatik, Zubizarretaren ustez, "premiazkoa" da Udalak, bere eskumenen esparruan, "jarduketa batzuk ezartzea eta neurri desberdinak hartzea COVID 19ak bilbotarrengan sortutako egoera arintzeko".

Horrela, EH Bilduk azpimarratu du lortutako akordioa "oso tresna egokia" dela pandemiak bilbotarrengan ongizate emozionalari dagokionez izan dituen ondorioei aurre egiteko.

 

 

 

 

EH Bilduk proposatuta, bulegoetan aurrez aurreko arreta emateko eskatu die Bilboko Udalak banketxeei

| 2021-05-27 09:33:00

Bilboko Udalak hirian dauden banku erakunde laguntzaileei eskatu die beren bulegoetan leihatila zerbitzua eman dezatela, eguneroko ordutegietan, bezeroei arreta egokia emateko, behar dituzten banku-izapide guztiak egin ahal izan ditzaten. EH Bilduk aurkeztutako mozio baten ondorioz, alderdi soberanistak eta gobernu taldeak egindako zuzenketa onartu ostean adostu dute akordioa.

Jone Goirizelaiak, EH Bilduren Bilboko bozeramaileak, adierazi duenez, akordio "garrantzitsua" da, izan ere, bilbotarren "bozgorailua" izango da Udala, herritarrak egiten ari diren aldarrikapen hori finantza erakundeei helaraziko dietelako.

“EH Bilduk oin bat kalean dugu, eta beste bat erakundeetan; horregatik, Bilboko hainbat auzotako herritarrek eta Pentsionistak Martxan eta Kutxabank Publikoa plataformek aspalditik egiten ari diren eskaera ekarri dugu osoko bilkurara", adierazi du.

Jone Goirizelaiak esan duenez, banketxeak bulegoak sistematikoki ixten ari dira eta horrek kalte handiak eragiten ditu herritarrengan, batez ere adinekoengan; izan ere, askotan, ilara handietan itxaroten egon behar izaten dira banku-zerbitzuak eskuratzeko edota beste auzo batera joan behar dira arreta presentziala jasotzeko.

Era berean, Arangoitiko kasua aipatu du adibide gisa; sukurtsalik gabe geratu baita, eta horrek "kalte handiak eragin ditu auzoko 5.000 bizilagunengan, tokiko merkataritzan eta ostalaritzako lokal txikietan". Gainera, kontuan hartu behar da auzoaren irisgarritasun eskasak egoera okertu egiten duela.

Goirizelaiaren ustez, "zuzeneko arretaren desagerpena bereziki kezkagarria da ohiko banku-harremanak ez dituzten errenta txikieneko kolektiboentzat, besteak beste, gero eta zailagoa egiten zaielako eskudirua jasotzea".

Hori dela eta, akordio “positiboa” dela adierazi du EH Bilduk. "Guztion artean banketxeak presionatu behar ditugu aurrez aurreko arreta bermatzeko", gaineratu du.

 

Pandemiak Bilboko adierazpen artistikoetan sortutako egoeraren diagnostikoa eskatu du EH Bilduk, horien beharrak ezagutu eta neurriak ezartzeko

| 2021-05-25 10:02:00

EH Bildu Bilbok mozio bat aurkeztu du biharko Osoko Bilkuran eztabaidatzeko. Bertan, pandemiak Bilboko arte-adierazpeneatan sortutako egoeraren diagnostikoa egiteko eskatu du, hainbat eragilerekin harremanetan eta lankidetzan (profesionalak, amateurrak, elkarteak, akademiak, etab.), egungo eta etorkizuneko egoerak eta beharrak ezagutzeko eta Udalak neurriak ezartzeko.

Era berean, kultura eta hezkuntzarako udal laguntzen esparruan, promesa artistiko diren gazteei zuzendutako ekimenak abian jartzea aztertzeko eskatu du.

Ildo beretik, Jone Goirizelaiak, EH Bildu Bilboko bozeramaileak proposatu du, profesionalek eta amateurrek egiten duten lan garrantzitsua kontuan hartuta, hau da, tokiko kulturaren erakusle eta oinarri direla, horiek aitortzea eta balioan jartzea dagozkien adierazpen artistikoak (antzerkia, dantza, musika, abesbatza…) ospatzeko Nazioarteko Egunarekin bat eginez.

Goirizelaiak gogoratu duenez, pandemiak ondorioak izan ditu esparru guztietan, eta bereziki Bilboko eta Euskal Herriko kultur esparruan. Iazko martxoan konfinamenduarekin, dantzara, antzerkira, musikara, edo beste adierazpen artistiko batzuetara dedikatutako pertsonek, elkarteek, akademiek "ezohiko egoera batera egokitu behar izan zuten, horretarako asmamen dosi handiak erabiliz, horrek ekarri duen kostuarekin eta zailtasunekin".

Egia da gaur egun presentzialtasuna berreskuratu ahal izan dela, baina, Goirizelaiak esan duenez, egoerak "zaila izaten jarraitzen du diziplina artistiko desberdinentzat, segurtasun-arauek jarduera mugatzen dutelako (edukiera, distantzia, etab.) eta zenbait jarduera oraindik ezin direlako gauzatu”. "Abesbatzek, antzerki taldeek, akademiek, ikuskizunetako teknikariek edo laguntzaileek egoera ezohikoan eta prekarioan jarraitzen dute", gaineratu du.

Goirizelaiak azaldu duenez, Bilbao Aurreraren esparruan, kultur sektoreari laguntzeko neurriak hartu dituzte, ordezkari politiko guztien artean adostuta, baina "ezinbestekotzat" jo du "orain, urtebeteko salbuespen egoeraren ondoren", arte diziplinen egoera aztertuko duen diagnostiko integrala egitea, "horrela, ondoren, egoera iraultzeko beste neurri batzuk ezarri ahal izateko".

 

 

EH Bilduk gatzaren matxinadan jazarritako herritarrak omendu ditu Bilbon

| 2021-05-24 14:27:00

EH Bilduk Gatzaren Matxinadan jazarritako herritarrak gogoratu ditu gaur lore eskaintza xume baten bidez. Omenaldira bertaratutakoek krabelin gorri bana jarri dute San Anton elizako oroitarriaren azpian, Bilboko Udaletxe zaharra zegoen lekuan.

1631 eta 1634 urte artean luzatu zen matxinada hura ez zen izan gatzaren inpostuaren igoeraren kontrako protestaldi soil bat, Espainiar Erresumaren asmo zentralisten kontrako eta Bizkaiko foruen aldeko altxamendu herritarra baizik.

Horregatik, EH Bilduk garai hartako krisialdi politiko, ekonomiko eta sozialaren eta gaur egungo egoeraren arteko zenbait lotura nabarmendu nahi izan ditu. “Egun asko dira beren eskubideen alde borrokatzen ari diren langileak, besteak beste, Tubacex, Petronor, PCB, H&M eta COSeko langileak, eta, hemen Bilbon, argiteria publikoko langileek 28 egun daramatzate greban", adierazi du Jone Goirizelaia, EH Bildu Bilboko bozeramaleak.

“Politika publikoetan garrantzi handiko aldaketa premiazkoa den arren, Udal Gobernuak zaharkituta geratu diren bere politikekin jarraitzen du, eliteen, enpresa handien, konstruktoreen eta enpresa aholkularien interesei erantzuten jarraitzen du, baita ekitaldi handien politikarekin ere, oinarrizko zerbitzu publikoak desegiteko eta pribatizatzeko bidean aurrera egiten duen bitartean ", kritikatu du.

Goirizelaiaren esanetan, EH Bilduk beste eredu bat defendatzen du, “langileen eskubideak defendatuko dituena eta Bilboko bizilagunak eta auzoak erdigunean jarriko dituena, auzoak aintzat hartuko dituena eta haien beharrei erantzungo diena".

Azkenik, pandemiaren ondorioak gehien pairatzen ari diren herritarrak omendu nahi izan ditu Goirizelaiak gaurko ekitaldian: langabezian dauden pertsonak, saltoki txikiak, tailerrak eta ostalaritza, zaintza-lanak egiten dituzten pertsonak, prekarietate egoeran dauden gazteak eta pentsiodunak.

Goirizelaiak adierazi duenez, “euren etorkizuna defendatzeko modurik onena politika eta zerbitzu publikoak sendotzea da”, eta “interes zentralisten aurrean, EH Bilduk Bilboko eta Euskal Herriko herritar guztiak defendatuko ditu”.