Bilbo

Bilboko Udalak Espainiako Gobernuari gastu araua malgutzeko eskatu dio, EH Bildu Bilboren ekimenez

EH Bildu Bilbok azpimarratu du akordio hau oso garrantzitsua dela, superabita egungo egoerak eragindako ondorio sozio-ekonomikoei aurre egiteko erabiltzea ahalbidetuko duelako

| 2020-04-30 14:04:00

Jone Goirizelaiak, EH Bilduko bozeramaileak, azpimarratu duenez, gaurko udalbatzarrean, EH Bildu Bilboren ekimenez, "Bilborentzat eta bilbotarrentzat oso garrantzitsua den akordio bat lortu da"; izan ere, aho batez erabaki dute "Espainiako Gobernuari eskatzea ahalik eta lasterren gastu-araua malgutzeko".

Goirizelaiak azaldu duenez, akordio horrek ahalbidetuko du Bilboko Udalak superabita, beharrezkoa izanez gero, "lehentasunezko gaietarako" erabiltzea, eta, esan duenez, EH Bildurentzat lehentasuna "osasun alarmak eragindako ondorio sozio-ekonomikoei aurre egitea" da.

“Gure lehentasuna da egungo egoeraren ondorioak pairatzen ari diren Bilboko herritar guztiei zuzendutako neurriak finantzatzea: familiak, langileak, autonomoak, enpresa txiki eta ertainak, kultura-eragileak eta irabazi-asmorik gabeko elkarteak,  eta bereziki gizarte-bazterketa jasateko arriskuan dauden pertsonak, adingabeak, gazteak edo adinekoak bezalako kolektibo espezifikoak", gaineratu du.

Gaurkoa "ohiz kanpoko egoera batean ohiko osoko bilkura" dela gogorarazi ostean, joan den otsailean, EH Bilduk lortutako akordioari esker, Diputatuen Kongresuan udalen gastu muga malgutzeko akordioa lortu zutela adierazi du. "Akordio honen helburua Bilbo bezalako udalei kalte egiten zien egoerari amaiera ematea da; izan ere, kontu onbideratuak eta superabitak izan arren, ezin genuen beharrezko gaietan inbertitu, adibidez, gizarte politiketan", azaldu du.

Hori horrela, gaur lortutako akordioaren garrantzia azpimarratu du; izan ere EH Bilduren proposamenari EH Bilduk, EAJk eta PSEren artean adostutako zuzenketa onartu da eta gainerako alderdien aldeko botoa jaso du. Horrez gain, Goirizelaiak argitu duenez,  gastu-muga malgutzearekin ez da Udalaren zorpetzea planteatzen, baizik eta "superabita erabiltzea, beharrezkoa balitz, modu arduratsu eta eraginkorrean egungo egoerari eta haren ondorioei aurre egiteko".

Azkenik, Bilboko herritarren eta sare solidarioen jarrera "eredugarria" goraipatu du Goirizelaiak, eta egungo egoerari aurre egiteko erakutsitako jarrera eta egindako lana eskertu die. "Bilboko herritarrekin gaude, haien beharrekin kezkatuta eta gure bizitzak aldatu dituen egoera honen ondorio larriei aurre egiteko lanean", gaineratu du.

 

Osasun-krisiaren egoeran udal zerbitzuen esparrutik haurtzaroa babesteko EH Bildu Bilboren proposamena

| 2020-04-29 16:10:00

EH Bildu Bilbok urgentziazko mozioa aurkeztu du aholku batzorde bat osatzeko Bilboko deseskalada plangintza adostuko duena

Aholku batzordean udal talde guztiak, Udaleko arlo guztiak, Bilboko merkatarien elkarteak, auzo-elkarteak, enpresa-elkarteak, sindikatuak, gizarte-eragileak eta zientzialariak egotea eskatzen du

| 2020-04-29 13:53:00

EH Bildu Bilbo udal taldeak urgentziazko mozioa aurkeztu du, bihar, apirilaren 30ean, egingo den Osoko Bilkuran eztabaidatzeko. Horretan, Aholku Batzorde bat sortzeko eskatzen dio udal-gobernuko taldeari, Bilborako deseskalada plan espezifiko bat diseinatu, eztabaidatu eta adosteko. COVID-19ak sortutako osasun krisi egoera dela eta, Bilbon deseskalada gauzatzeko hartu beharreko neurri zehatzak jasotzea izango litzateke plan horren helburua.

Aipatutako aholku-batzordean, besteak beste, honako hauek egotea proposatzen du EH Bildu Bilbok: Udalean ordezkaritza duten alderdi guztiak, Udaleko arlo guztiak, Bilboko merkatarien elkarteak, auzo-elkarteak, enpresa-elkarteak, sindikatuak, gizarte-eragileak eta zientzialariak, bai eta Aholku Batzordeak egin ditzakeen lanen eta eginkizunen arabera batu daitezkeen eragileak ere.

Koronabirusaren intzidentzia-tasa handiena duen euskal hirietako bat Bilbo dela eta Bilboko Alde Zaharra dela gehien kaltetutako guneetako bat dela gogoratu ondoren, Jone Goirizelaiak, EH Bildu Bilboko bozeramaleak, adierazi du  “agerikoa dela udalerri bakoitzak ezaugarri eta baldintza desberdinak dituela, eta berezitasun horiek kontuan hartu behar direla deseskalatzeko neurriak diseinatzerakoan”.

“Deskonfinamenduaz hitz egiten hasi garen honetan, uste dugu neurriak hartzeko garaia dela, Bilbon hartu beharreko neurriak zehaztuko dituen plan espezifiko bat diseinatzeko ordua dela, deseskalada ahalik eta ondoen gauzatu ahal izateko, hiriaren eta hiritarren egoera eta ezaugarriak kontuan hartuta eta osasuna bermatzeko helburuarekin”, azpimarratu du

Horretarako, Goirizelaiak esan duenez, EH Bildu Bilbok “beharrezkotzat” jotzen du aholku batzorde bat sortzea, “hiriko sektore politiko, ekonomiko, sozial, kultural, sindikal, auzotar eta zientifiko guztien ordezkaritzarekin, guztion artean plan eraginkor bat diseinatzeko, egoera berri honi ahalik eta ondoen aurre egiten laguntzeko”.

"Egun bizi dugun momentua kontuan hartuta, beharrezkoa da premiaz kontseilu honen sorkuntza Osoko Bilkuran eztabaidatzea, espero dugu gobernu-taldeak gure ekimenaren premia onartzea eta horri buruz eztabaidatu ahal izatea, gure hirian deseskalada plana zehazteko kontseilua sortzea onartu eta lehenbailehen eratu dadin", nabarmendu du.

 

EH Bildu Bilbok COVID-19ak sortutako krisi egoeran udal zerbitzuetatik haurrak babesteko proposamena aurkeztu du

Proposamenak haur guztiei zein egoera bereziki ahulean daudenei zuzendutako neurriak jasotzen ditu, baita hezkuntza-arrakala arintzeko neurriak ere.

| 2020-04-28 11:51:00

EH Bildu Bilbo Udal taldeak gogorarazi duenez, COVID-19 pandemiak eragina du haurren osasunean, hezkuntzan eta aisialdian, baita ondorio ekonomiko eta sozialak ere haien familia-ingurunean. Hori dela eta, haren ustez, konfinamendu-egoeraren inpaktu soziala arintzeko estrategiek "neurri espezifikoak hartu behar dituzte haurrak babesteko, bereziki salbuespenezko egoera honen ondorio gogorrenak pairatzen dituzten haurrak babesteko". 

Hala, haurrak Udal zerbitzuetatik babesteko proposamen bat aurkeztu du EH Bildu Bilbok. Proposamen horretan, honako hauek jasotzen dira: haurrei oro har zuzendutako neurriak, egoera bereziki ahulean dauden haurrei zuzendutakoak, familia ahulenetan bizi diren adingabeen bizi-baldintzak bermatzeko neurriak, eta hezkuntza-arrakala arintzeko neurriak

Haurrei oro har zuzendutako neurriak 

Osasun krisiak eta konfinamendu neurriek osasun mentaleko arazoak eragin diezaiekete haurrei; hori dela eta, EH Bilduk proposatu du telefono-linea ireki bat jartzea, arreta psikologikoa emango duten langileek artatua, haurren eta gurasoen kontsultak jaso ahal izateko, besteak beste, antsietateari, beldurrari, kontzentrazio ezari edo loezinari buruz. 

Ildo beretik, udalaren webgunean haur eta nerabeentzako atal espezifiko bat gaitzeko eskatu du EH Bildu Bilbok, non beren adinera eta heldutasunera egokitutako baliabideak eskainiko diren, emozioen eta gatazken kudeaketari buruz, bai eta gomendioak ere Interneten erabilera seguru eta arduratsuari buruz. Era berean, haurren aisialdirako atal bat ere ezartzea proposatzen du. "Udaleko eguneko zentroetako hezitzaileak material hori guztia prestatzen dutenak izatea planteatzen dugu; zentroak   une honetan itxita baitaude, eta laguntza birtualeko lanak ere egitea", gaineratu du. 

Egoera bereziki ahulean dauden haurrentzako neurriak 

Konfinamendu une hauetan, EH Bilduk ohartarazi duenez, egoera ahulenean dauden adingabeen egoera larriagotu egiten da, eta, beraz, "funtsezkotzat" jo du haurrei zuzendutako arreta goiztiarreko zerbitzu guztiak zein gizarte eta hezkuntza izaerako programak indartzea arrisku egoeran dauden adingabeentzat eta haien familientzat, hala nola gizarte eta hezkuntza arloan eta komunitatean esku hartzeko programa (PISECO) edo PISEKALÓ programa, Bilboko ijitoen komunitateko adingabeei zuzendutakoa. 

Programa horiek indartu ahal izateko, EH Bildu Bilbok Gizarte eta Hezkuntzako esku-hartze taldeak (EISE) handitzea proposatu du, bai eta beharrezko baliabiderik ez dituzten familiei EISEkin bideo-deiak egin ahal izateko behar diren baliabideak ematea ere. 

Familia ahulenetan bizi diren adingabeen bizi-baldintzak bermatzeko neurriak 

Elikadurari dagokionez, EH Bildu Bilbok proposatu du Bilboko Udalak 150 € eta 300 € arteko elikadura-bonoak martxan jartzea, adingabeak ardurapean dituzten eta eskola-jantokiak ixtearen ondorioz kaltetuak izan diren gizarte-bazterketako arriskuan dauden familientzat. Era berean, proposatu du Eusko Jaurlaritzari eskatzea ikastetxeko jantokian izena emanda dauden ikasleen zerrenda, eta, hala eskatzen dutenei, etxez etxeko zerbitzua bermatzea, hiriko catering-enpresa txikien bidez, kalitatezko janariak ziurtatuz eta tokiko enpresak bultzatuz. 

Etxebizitzari dagokionez, Udal-taldeak ohartarazi du konfinamenduak prekarioak diren etxeetan edota pertsona asko bizi diren etxeetan gelditzera behartu ditzakeela haurrak, eta beraz, aldi baterako bizileku-alternatibak bilatzea proposatu du pilaketa edota azpietxebizitza egoeran dauden familientzat, baldin eta etxeko egonaldi luzea bertako kideen osasunerako kaltegarritzat jo badaiteke. 

Hezkuntza-arrakala arintzeko neurriak 

Ikasleak etxetik ari dira hezkuntza prozesua jarraitzen, baina, EH Bilduk gogorarazi duenez, sistema hori "ez da erraza izaten ari, eta are gutxiago talde ahuletako familietan". Desberdintasunak saihesteko, hainbat neurri proposatzen ditu, hala nola mintzapraktika taldeak abian jartzea, telematikoki, inguruan euskararik entzuten ez duten ikasleei zuzenduta. 

Era berean, Bilboko Udalak kolektibo ahulen familiei beharrezko eskola-material guztia ematea proposatzen du, banaketa udaltzain, babes zibil, suhiltzaile edo herritarrak zaintzeko sareen bidez egin dezan, beharrezkoak diren segurtasun-neurri guztiak bermatuz. 

Azkenik, EH Bilduk eskatu du Udalak interneterako sarbiderik edota ekipo digitalik ez duten familien esku jartzea eten digitala arintzeko behar diren baliabide guztiak, hiriko ikasle guztiek "kalitatezko hezkuntza jasotzeko aukera izan dezaten eta beren hezkuntza-prozesuarekin baldintza berdinetan aurrera jarraitu ahal izan dezaten". 

EH Bildu Bilbok proposamen hori Gobernu Taldeari helaraziko dio eta kontuan hartzea espero du, haurren ongizatearen alde elkarrekin lan egiteko, horiek ere COVID-19ren krisiak eragindako ondorioak pairatzen ari baitira. Ildo horretan, pandemiari buruzko erabakiak hartzeko prozesuetan haurren iritzia entzutearen eta kontuan hartzearen garrantzia ere azpimarratu du, gertatzen dena ulertu eta hartzen ari diren erabakietan parte hartzen dutela sentitu dezaten. 

 

EH Bildu Bilbok deitoratzen du Alkateak Jai Batzorde Mistoa deitu ez izana Lehendakariarekin bilera egin aurretik

“Aste Nagusiaren ezaugarri nagusia beti izan da jai herrikoia, parte-hartzailea, bilbotarrek antolatutakoa eta bilbotar gizarte osoaren inplikazioa duena”

| 2020-04-23 12:55:00

 

Bilboko EH Bilduren udal taldeak deitoratu egin du Juan Mari Aburto Bilboko alkateak Jai Batzorde Mistoa deitu ez izana gaur Iñigo Urkullu lehendakariarekin, Bizkaiko, Gipuzkoako eta Arabako ahaldun nagusiekin eta Donostia eta Gasteizko alkateekin egingo duen bileraren aurretik; izan ere, egungo osasun alerta egoeran, egutegian aurreikusitako kultura- eta jai-ekitaldiei buruzko erabakiak eztabaidatu dituzte bilera horretan.

Jone Goirizelaiak, Bilboko EH bilduko bozeramaileak, gogorarazi duenez, Bilboko Konpartsek jai batzorde mistoaren bilera eskatu dute gai horri buruz hitz egiteko. "Ezinbestekoa iruditzen zitzaigun alkateak, lehendakariarekin egin beharreko bilerara joan aurretik eta erabakiak hartu aurretik, Jai Batzorde mistoa egitea, bertan alkatetzak, oposizioko taldeek eta konpartsak parte hartzen dugulako eta guztion artean informazioa kontrastatzeko eta guztion iritziak ezagutzeko ezinbestekoa zelako", adierazi du.

"Aste Nagusiaren ezaugarri nagusia beti izan da jai herrikoia, parte-hartzailea, bilbotarrek antolatutakoa eta bilbotar gizarte osoaren inplikazioa duena", adierazi du Goirizelaiak. Alkateak "gure jaien izaera eta eredua kontuan hartu behar zituen eta batzorde mistoa egin behar izan zuen, lehendakariarekin bilera egin aurretik".