Bilbo

EH Bilduk "sehaska etxea" eraikinaren funtzio soziala mantentzea eskatu du, Bilbo Zaharraren behar sozialei erantzuteko

BBK Banku Fundazioak lehen haur-eskola bat hartzen zuen eraikin horretan hasi dituen obrak direla eta, EH Bilduk ‘sehaska etxea’ kohesio sozialerako ekipamendu gisa mantentzea eskatu du

| 2020-07-08 11:53:00

BBK banku-fundazioak Bilbo Zaharra auzoko ‘sehaska etxea' hartzen zuen eraikinean hasitako obrak direla eta, EH Bilduk espazio horren funtzio sozialari eusteko eskatu du, auzoaren behar sozialei erantzuteko ekipamendu gisa.

Alba Fatuarte EH Bilduko zinegotziak gogorarazi duenez, 2018an Bilbao Bizkaia Kutxa Banku Fundazioak San Antongo "sehaska etxea" eraikina hartzen zuen haur-eskola itxi zuen, eta Urazurrutia kaleko eraikin horri erabilera berriak bilatzeko ideia-lehiaketa deitu zuen, BBKren arabera, "eraikinaren erabilerak inguruko beharretara egokitzeko eta Bizkairako erreferentziazko zentro berri bat sortzeko".

Une hartan, Fatuartek adierazi duenez, EH Bilduk, Bilbo Zaharra auzoko hainbat eragile sozial eta kulturalek bezala, "kezka" agertu zuen "BBK-Kutxabanken esku ‘sehaska etxeak’ bere funtzio soziala galtzearen arriskuagatik; izan ere, BBK bankarizatu eta pribatizatu ondoren, pixkanaka bere Gizarte Ekintzatik aldentzen joan da".

Horregatik, auzoko hainbat auzo elkarteak, kultur eta eta gizarte eragileekin, proposamen bateratu bat aurkeztu zuten lehiaketa horretara, hainbat proiekturekin, hala nola, bakardade-egoeran dauden adinekoentzako gune bat, emakumeen etxe bat, meatze-auzo horren memoria ez galtzeko gune bat, edo ikasle edo langabeentzako prestakuntza-gune bat. "Proiektuak desberdinak ziren, baina guztiek helburu bera zuten: gizarte-kohesioa sustatzea, ikuspegi inklusibo batetik, justizia sozialaren printzipioan oinarrituta", adierazi du.

Era berean, Fatuartek azaldu duenez, EH Bildu udal taldeak proposamen bat aurkeztu zion 2018ko martxoan Bilboko Udalbatzari, "sehaska etxearen funtzio soziala mantentzeko eta BBK Banku Fundazioak Bilbo Zaharreko herritarren beharrei eta eskaerei erantzungo ez zien proiektu bat ez inposatzeko".

Eztabaidan, gogorarazi duenez, Xabier Otxandiano zinegotziak Udalaren eta BBK Fundazioaren "parte hartzeko bide bat irekitzeko" konpromisoa agertu zuen, baina "bi urte geroago, Bilboko Udalak eta BBK Fundazioak ez dute hitza bete, parte-hartze prozesu hori ez baitzen inoiz egin".

Horri gehitu behar zaio duela egun batzuk obrak hasi direla eraikinean. Hori dela eta, EH Bildu Udal Taldeak hainbat galdera erregistratu ditu egoera argitzeko, eta, beste behin ere, Bilbo Zaharreko auzotarren eskutik partaidetza-prozesu bat egiteko eskatu du, sehaska etxeak auzoaren kohesio soziala sustatzen jarraituko duela bermatzeko. 

“Espoliazioa”

EH Bilduko zinegotziak azaldu duenez, Ricardo Bastida udal arkitektoak diseinatutako Sehaska Etxea 1916an sortu zen eta, bere jarduerarekin, gizarte arreta eskaini zuten, Udalaren esku-hartzea osatuz, herritar guztien bizi baldintzak hobetzeko asmoz.

"Ehun urte beranduago, Bilbo Zaharra auzoa aldatu den arren, arrakala sozialak arintzeko eta auzoan kohesio soziala sustatzeko ekipamendu baten beharrak indarrean jarraitzen du", nabarmendu du.

Horren jakitun, Fatuartek esan du EH Bilduri "ulertezina" iruditzen zaiola "diru publikoarekin altxatutakoa orain helburu pribatuetarako erabiltzea", eta BBK Banku Fundazioa "espoliazioa" egiten ari dela uste du.

 

EH Bilduk Azkuna Zentroko kontseiluan eskatu du barne-ikerketa bat egiteko, kontratazioaren arloko ustezko praktika irregularrengatik

| 2020-07-07 11:19:00

EH Bildu Bilbok Azkuna Zentroko Administrazio Kontseiluan barne-ikerketa bat egiteko eskatu du, elkarte publikoko langile batek kaleratzeagatiko salaketa bat egin ondoren, zentroko zuzendaritzak egin ahal izan dituen ustezko jardunbide irregularren berri izan ondoren.

EH Bilduk jakin duenez, 2009az geroztik aurtengo otsailean kaleratu zuten arte, zentro horretako operazio arduradun izan denak salatu du zentroko zuzendaritzak lan-jazarpena egin diola hilabeteetan zehar, kontratazio-prozesu bat hautatzeko baldintzetan aldaketak egiteari uko egin diolako, zuzendaritzak lehenestutako pertsona bat deialdi horretan sartu ahal izateko, hain zuzen ere. Pertsona horrek salatu duenez Udaleko hainbat zinegotziek informazio hori izan dute une oro berak helarazita baina ez dira neurririk hartu,  EH Bilduk dakienez.

Azkuna Aisialdi eta Kultura Zentroaren Administrazio Kontseiluaren azken bileran, ekainaren 26an, EH Bildu Udal Taldeak bere kezka adierazi zuen egoera horren aurrean, eta gertaera horiek argitu ahal izateko premiazko neurriak hartzeko eskatu zuen. EH Bilduren esanetan, pertsona horrek salatzen duena, "sozietate publiko baten praktika irregularrei dagokienez, gutxienez barne ikerketa bat irekitzeko bezain larria da".

EH Bilduk nabarmendu duenez, "behar-beharrezkoa da horrelako egoerak argitzea gardentasunaren eta kontratazio arloko jardunbide egokien alde", eta gaineratu du "ez duela ezertarako balio kode etikoak izateak, gero gardentasun irizpidea aplikatzen ez bada". Azkenik, kasu honen inguruko barne ikerketa abiarazteko beharra azpimarratu du eta, "salatu diren gertaera larriak baieztatuko balira, erantzukizunak argitu beharko lirateke".

 

 

 

 

 

EH Bilduk herritarren arreta zerbitzuaren saturazioa salatu du

Udal Taldearen arabera, zerbitzua ez da herritarrei behar bezala bermatzen ari, gobernu taldearen "aurreikuspen faltagatik"

| 2020-07-06 10:52:00

EH Bildu Bilboko udal taldeak kritikatu duenez, gobernu taldearen "aurreikuspen falta" dela eta, herritarren arretarako bulegoetan ez zaie herritarrei zerbitzu egokirik eskaintzen, eta askotan, "Ilara luzeak itxaron behar izaten dituzte hilabete bat eta gero hitzordua lortzeko, hori da San Agustin Eraikinean gertatzen ari dena, adibidez, non udaleko tramite gehienak egin behar diren ". 

 "Uztailaren 1ean abuztuaren 3rako ematen ari ziren hitzordua edozein udal izapide egiteko, hala nola, erroldan alta edo baja lortzea, edozein obra txiki egiteko baimena edo TAOrekin lotutako kudeaketak”, azaldu du. Era berean, gaineratu duenez, abuztura arte ez da hitzordurik ematen ogasunarekin kontsultak egiteko, eta kontuan izan behar da tasa eta zergak ordaintzeko epea uztailean amaitzen dela eta, hori dela eta, pertsona askok dagokien errekargua ordaindu beharko dute atzerapena dela eta.   

Ildo horretan,  EH Bildu udal taldeak esan duenez, "internet bidez aldez aurretik hitzordua eska daitekeen arren, kontuan hartu behar da gure hirian dagoen arrakala digital handia, pertsona askok ezin baitute hitzordua modu telematikoan eskatu". "Gainera, udal webgunearen bidez ogasunarekin edo hirigintzarekin lotutako edozein kudeaketa egiterako orduan, atal asko agertzen dira aukeran, herritarrei kudeaketa zailtzen zaielarik", gaineratu du. 

EH Bilduk adierazi duenez, aipatutakoak, “gobernu taldearen planifikazio faltagatik, herritarren arreta zerbitzua nola funtzionatzen ari den erakusten duten adibide batzuk dira”. "COVIDek sortutako egoera dela eta, egia da zerbitzua berregituratu behar izan dela, baina berregituraketa hori herritarrei zerbitzu egokia bermatzeko moduan egin behar da, eta ez da horrela izan", gaineratu du. 

Horren harira, opor garaian gaudela kontuan hartuta, horrela jarraituz gero, "egoerak okerrera egin dezakela, zerbitzuaren kalitatea are gehiago apalduz" ohartarazi du. Horregatik, EH Bilduk gobernu taldeari eskatu dio "zerbitzu hori berrantolatu eta indartu dezan, beharrezkoa bada kontratazio berriak eginez, indarrean dagoen lan-poltsaren bidez, herritarrei merezi duten arreta eskaintzeko helburuarekin". 

EH Bilduren ekimenez, Udalak lau hondartza berde jarriko ditu Bilboko hiri-ingurunean, kalean aisialdirako aukerak eskaintzeko

Arraiz mendiaren eta Iturri-Peñascaleko espazioak berreskuratuko dira, eta bi espazio berri ezarriko dira Etxebarria parkean eta Ibaiederren

| 2020-06-25 13:27:00

EH Bildu Bilboko udal-taldeak aurkeztutako mozio baten ekimenez, Bilboko Udalak lau hondartza berde jarriko ditu Bilboko hiri-ingurunean, kalean aisialdirako aukerak eskaintzeko, aldi berean, segurtasun neurriak bermatuz. Horrela, lau gune prestatuko dira: lehendik zeuden bi gune, Arraiz mendiaren hegalean eta Iturrigorri-Peñascalen, orain berreskuratu eta balioan jarriko dira;  eta beste bi espazio berri sortuko dira, bata Etxebarria parkean eta bestea Ibaiederren, Abusun. Gune horiek egokitzeko lanak hasi dira jadanik.

Alba Fatuarte EH Bilduko zinegotzia pozik agertu da proposamena onartu delako; izan ere, espazio horiek martxan jartzea "positiboa izango da herritar guztientzat, ezohiko uda batean, igerileku eta hondartzak edukiera mugatua dutenean, parke eta berdeguneetako pertsonen kopurua handitu denean; eta bilbotar asko pandemiaren ondorio ekonomikoak direla eta oporretan joan ezin direnean”.

Hori dela eta, azaldu duenez, EH Bilduk bere proposamenean alternatibak eskaintzeko beharra azaldu du,  "kalean aisialdirako guneak ezartzeko beharra, berdeguneak, etxetik gertu, eguzkitakoa jarri eta urarekin freskatu ahal izateko, eta, jakina, segurtasun neurriak mantentzea ahalbideratuko duten espazioak".

Fatuartek azaldu duenez, EH Bilduk argi eta garbi defendatzen du "pertsonak zaintzeko inbertsioak lehenesteko unea" dela. Ildo honetan, gaineratu duenez, “zaintza oinarrizko beharrak asetzetik haratago doa, eta etxetik gertu aisialdi osasungarriaz gozatu ahal izateak pertsonen ongizateari ere laguntzen dio, are gehiago 50 egun baino gehiagoz konfinatuta egon ondoren".

Hiri atseginagoa eta bizitzeko egokia

Lortutako akordioari esker, EH bilduko zinegotziak azpimarratu duenez, "uda honetan hiri atseginagoa eta bizitzeko egokiagoa izango dugu". "Hirian bizi garenok kalitatezko espazio publikoak nahi ditugu, zabalak, osasuntsuak eta etxetik gertu. Gaurko akordioa pauso txiki bat da, baina beste hainbeste beharko ditugu pandemiaren ondorioak kudeatzeko eta, etorkizunean errepikatuz gero, baldintza hobeagoetan aurre egiteko ", gaineratu du.

 

Bilboko Udalak, EH Bilduk eskatuta, hiriko LGTBI pertsonen egoera aztertzeko proposamena onartu du

| 2020-06-25 12:03:00

EH Bildu Bilbo udal taldearen ekimenez, Bilboko Udalak Gobernu Batzordeari eskatuko dio LGTBI Bilbao FOROra eraman dezala hiriko LGTBI pertsonen errealitate ezberdinen egoera aztertzeko proposamena. LGTBI FOROA izango da eztabaidatzeko eta erabaki partekatuak hartzeko lantaldea eta nahi duten udal talde guztiek parte hartuko dute.

"Beharrezko tresna bat da, Bilboko LGTBI pertsonen egoeraren argazkia erakutsiko duena, eta udal-zerbitzu ezberdinek abian jarri ahal izango dituzten proposamenak identifikatuko ditugu, Bilbo inklusiboago baterantz aurrera egiteko", adierazi du Bruno Zubizarretak, EH Bilduko zinegotziak, akordioa lortu ostean.

Akordio hori, hain zuzen ere, igandean, ekainaren 28an, sexu-askapenaren aldeko eguna ospatzen denean hartzen da, eta Bruno Zubizarretak, EH Bilduko zinegotziak, azaldu duenez, egun hori "azken urteetan lortutako aurrerapenak ospatzeko aukera bat da, baina baita 40 urte baino gehiago martxan daramatzan bideak aurrera jarraitu behar duela adierazteko ere". "Zoritxarrez, oso urrun gaude gay, lesbiana, bisexual eta transexualentzat berdintasun osoa izatetik", deitoratu du.

Zubizarretak azaldu duenez, "kolektibo oso plurala da, eta ezin da homogeneizatu errealitate, arazo, behar edo aldarrikapen desberdinak ditugulako". "Guztioi batzen gaitu disidentzia sexualaren posizioak eta, tamalez, gizarteko sektore batzuek gugan eragiten duten gorrotoak eta indarkeriak". "Datu bat: 2019an eraso homofoboen kasuak asko igo ziren, datuak kezkagarriak izan ziren, hain zuzen ere", gaineratu du.

Egoera horri aurre egiteko, bere ustez, "ezinbestekoa" da Bilboko LGTBIQ+ populazioaren argazki bat egiteko diagnostiko bat izatea, "kolektibo plural horren beharrei erreparatzeko helburuarekin; izan ere, Bilbon sexu-genero sistemak sortzen dituen desberdintasunei eta zapalkuntzei aurre egin behar diegu".

Zubizarretak adibide gisa jarri ditu Bartzelonan, Gasteizen eta Errenterian martxan jarritako esperientziak, toki horietako LGTBI pertsonek bizi izandako zapalkuntza saihesteko neurriak hartzea ahalbidetu duten diagnostiko horiek egin baitira. Esate baterako,  gizonekin sentsibilizatzeko programak, maskulinotasun-ereduak eta horren alternatibak lantzeko martxan jarri dira edo konponketa-gune txiki bat sortzea ihes egiten duenaren eta noren artean tentsio hori bereizten laguntzeko.

Horrenbestez, EH Bilduko zinegotzia pozik agertu da gaurko akordioarekin "Bilboko LGTBI herritarren errealitatera hurbilduko gaituen tresna eraginkor bat izango dugulako". "Horrela, udal zerbitzuek martxan jarri ahal izango dituzten proposamenak identifikatuko ditugu, Bilbo inklusiboago baterantz aurrera egiteko", gaineratu du.