AKTUALITATEA

EH Bilduren ekimenez, Udalak proba pilotu bat abiaraziko du Kanalaren pasealekuan zuhaitzak landatuz eta itzalguneak handituz

| 2026-09-24 14:48:00

EH Bilduren ekimenez, Bilboko Udalak, agintaldi honetan abiaraziko duen proba pilotu baten bidez, Kanalaren Pasealekuan baldintza fisiko eta bertako araudira egokitu daitezkeen zuhaitz eta zuhaixka espezieak landatuko ditu, naturan oinarritutako irtenbideen bidez pasealekuko itzalguneak handituz.

Udalak datozen hilabeteetan jarduera hau martxan jarriko du, gobernu taldearen eta EH Bilduren artean transakzionatutako zuzenketa bat onartu ondoren, alderdi soberanistaren proposamen baten harira. Garazi Perea EH Bilduko zinegotziak akordioaren garrantzia azpimarratu du, gune hori klima-babesleku bihurtzeko beharrezko urratsa delako, Bilbok klima-aldaketara egokitzeko premiazko neurriak hartu behar dituen une honetan.

Pereak gogorarazi duenez, 200 pertsona baino gehiago hil dira maiatzetik uztailera arte Bizkaian beroaren ondorioz, aurreko uda guztiko kopurua bikoiztuz. Esan duenez, termometroek 40 graduak egun askotan gainditu dituzte Bilbon, eta egun horietan ia ezinezkoa izan da kalera ateratzea.

"Uste dut bilbotar guztioi argi geratu zaigula klima aldaketa errealitate bat dela eta gure hiria ez dagoela horretarako prestatuta", adierazi du. Pereak erronka horri aurre egiteko beharra aldarrikatu du, eta gogorarazi du horixe zela, hain zuzen ere, EH Bilduk aurkeztutako proposamenaren helburua, eta ildo horretan lanean jarraituko duela.

Perearen ustez, itsasadarra "elementu bizia eta hirian integratua dela ulertu behar da, bere ingurunearen erregulazio termikoari modu naturalean laguntzeko gai dena".

Hala ere, Kanaleko pasealekuan itzalik gabeko edo itzal oso gutxiko gune zabalak daudela ohartarazi du,  eta bero handia dagoenean oso deserosoa edo ia ezinezkoa dela bertatik ibiltzea.  "Ebidentzia zientifikoak erakusten du azpiegitura berdeek eta hiriko zuhaitzek nabarmen murrizten dituztela azaleko eta ingurumeneko tenperaturak, bero-uhartearen efektua arinduz", azpimarratu du.

Ildo horretan, adierazi duenez, gaur lortutako akordioa "urrats garrantzitsua" da pasealekua kanpoko babesleku klimatiko bihurtzeko, izan ere, "zonaldea urte osoan zehar erabiltzeko berreskuratzea ahalbidetuko luke, aldi berean paisaiaren eta ingurumenaren kalitatea hobetuz", adierazi du.