Bilbo

EH Bilduk zalantzan jarri du Bilboko lorezaintza kontratu berriak zerbitzua hobetzea, eta ataletan banatzea kritikatu du, "arbitrarioa" delako

| 2021-05-31 12:22:00

Asier Gonzalezek EH Bilduko zinegotziak salatu duenez, Udalaren lorezaintza kontratu berria, “ez da hain eraginkorra izango, garestiagoa izango da eta ez du zerbitzuaren gaineko kontrola hobetuko”. Kontratu horren berrikuntza nagusia bi ataletan banatzen dela, bata lorategien kontserbazioa eta bestea zuhaiztietan eta lorategietan oinarritua.

Aipatu atal horien araberako bereizketak parkeen kalitatea hobetuko duen txostenik ba ote dagoen galdetu du Gonzalezek, "gaur egungo hutsuneetan oinarritu beharko litzatekeena, halakorik baldin badago". Horrez gain, gaineratu duenez, ez da frogatu kontratu bikoitz berri honekin enpresa txiki eta ertainen arteko lehia erraztu nahi denik, "ohiko hiru enpresa handiak aurkeztu baitira".

EH Bilduren ustez, "banatzearen oinarriak arbitrarioak dira: aurrekontuan eta pertsonalean askoz ere lote handiagoa dago, eta beste sorta txikiago bat, zuhaiztiak kontserbatzekoa, txikiegia ez izateko lorontziak ere barne hartzen dituena". "A priori kostuak igo egiten dira, baina plantilla osoa ez da hazten", gaineratu du.

Asier Gonzalezek gogorarazi duenez, "atalka banatzeko aldaketa orain arte egindakoaren ebaluazioan oinarritu behar da, eta azterketa horretarako oinarri egokiak enpresak astero entregatu behar dituen lan-parteak dira".

Era berean, "azken lau hilabeteetako lan parteak aztertzeko" eskatu dio udal sailari, "egungo langileak, subrogazioaren menpe daudenak, loteka banatzeak gomendatzen dituen berezko zereginak betetzen ari diren jakiteko". "Orain arteko zeregin-banaketaren eta enpresa esleipendunak proposatu duen langile-zerrendaren artean desberdintasun argi bat balego, handitu egingo lirateke bereizketa hori proposatzeko funtsezko arrazoien inguruko susmoak edo zalantzak, eta egungo kontrataren kudeaketa zalantzan geratuko litzateke", gaineratu du.

Adibide bat jartzearren, orain arte, enpresak baliabide teknikoak eta giza baliabideak uztartzen zituen sega eta inausketa lanetarako, eraginkortasun handiagoa lortzeko asmoz. "Etorkizunean, enpresa bakoitzak bere langileak eta makina eta kamioiak erabili beharko ditu zeregin zehatzetarako, eta ezin izango ditu orain arte egin diren lanak bateratu", zehaztu du.

Edozein kasutan, koalizio subiranistako zinegotziak eskua luzatu du, aldaketak nahi diren emaitzak ematen ez baditu, eta garestiagoa eta eraginkortasun gutxiagokoa bada, "atalkako banaketa horren jarrera berriz aztertzeko eta hobeto nola egin aztertzeko".

 

Bilboko Udalak ikasketa gelen eskaintza handituko du azterketa-garaietan, EH Bilduk eskatuta

| 2021-05-27 17:51:00

EH Bildu Bilbok eskatuta, Bilboko Udalak ikasketa gelen eskaintza handituko du azterketa garaietan, horretarako udal ekipamendu erabilgarriak helburu horretara bideratuz, COVID 19aren arautegiaren ondorioz galdutako aforoa arintzeko. EH Bilduk aurkeztutako mozio baten ondorioz, alderdi soberanistak eta gobernu taldeak egindako zuzenketa onartu ostean adostu dute akordioa.

Era berean, akordio honen bidez, Bilboko Udalak Bilbon ikasgelak dituzten erakundeei ikasteko lekuen eskariari erantzun egokia emateko eskatuko die.

Asier Gonzalez EH Bilduko zinegotziak adierazi duenez, akordio horrek Bilboko ikasgeletako edukiera-defizita arintzen lagunduko du, izan ere, plazak eskariari erantzuteko urriak baziren, indarrean dauden arauen ondorioz arazoa areagotu egin da.

Gonzalezek azaldu duenez, pandemia dela eta, udalak normalean eskaintzen dituen espazio gehigarriak, non edukiera murriztu behar izan den, “ez dira nahikoak dagoen eskariari erantzuteko;  beraz, ilarak sortzen ari dira sartu ahal izateko, eta horrek egoneza eta haserrea sortzen du erabiltzaileengan, askotan ikasteko tokirik gabe geratzen baitira”.

Horregatik, Gonzalezen ustez, “eskaintza zabaltzeko neurriak hartu behar dira, ikasteko leku gehiago gaituz eta Bizkaiko Foru Aldundiari eta unibertsitateei eskatu beharko zaie beren ikasgelak berrirekitzeko eta berregokitzeko, lehenbailehen; hain zuzen ere, horixe da lortutako akordioaren helburua”.

“Berehala hartu beharreko neurriak dira, kontuan hartuta jende gehien biltzen diren hilabeteak ekaina, iraila eta urria direla”, nabarmendu du EH Bilduko zinegotziak.

 

EH Bilduk eskatuta, pandemiak Bilboko adierazpen artistikoetan sortutako egoeraren diagnostikoa egingo du Udalak, horien beharrak ezagutu eta neurriak ezartzeko

| 2021-05-27 17:37:00

Bilboko Udalak, EH Bilduk proposatuta, Bilboko arte-adierazpeneatan sortutako egoeraren diagnostikoa egingo du, hainbat eragilerekin harremanetan eta lankidetzan (profesionalak, amateurrak, elkarteak, akademiak, etab.), egungo eta etorkizuneko egoerak eta beharrak ezagutzeko eta Udalak neurriak ezartzeko. EH Bilduk aurkeztutako mozio baten ondorioz, alderdi soberanistak eta gobernu taldeak egindako zuzenketa onartu ostean adostu dute akordioa.

Era berean, Udalak, kulturari eta hezkuntzari ematen duen babesaren barruan, esparruan, artista eta sortzaile gazteen lana sustatu eta babesteko neurriak abiaraztea aztertutko du.

Ildo beretik, Jone Goirizelaiak, EH Bildu Bilboko bozeramaileak, adierazi duen bezala, kultur arloan egiten den lan garrantzitsua kontuan hartuta, hau da, tokiko kulturaren erakusle eta oinarri dela; sektoreko eragileek (antzerkia, dantza, musika, literatura, ikus-entzunezkoak, abesbatzak…) egiten duten lanari ezagutza agertzeko eta sustatzeko ekimenak egingo dira, dagozkien adierazpen artistikoak ospatzeko Nazioarteko Egunarekin bat egiten ahaleginduta.

Goirizelaiak gogoratu duenez, pandemiak ondorioak izan ditu esparru guztietan, Bilboko eta Euskal Herriko kultur esparruan baita ere. “Dantzara, antzerkira, musikara, edo beste adierazpen artistiko batzuetara dedikatutako pertsonek, elkarteek, akademiek… ezohiko egoera batera egokitu behar izan dira, horretarako asmamen dosi handiak erabiliz, horrek ekarri duen kostuarekin eta zailtasunekin", azaldu du.

Egia da gaur egun presentzialtasuna berreskuratu ahal izan dela, baina, Goirizelaiak esan duenez, egoerak "zaila izaten jarraitzen du diziplina artistiko desberdinentzat, segurtasun-arauek jarduera mugatzen dutelako (edukiera, distantzia, etab.) eta zenbait jarduera oraindik ezin direlako gauzatu”. "Abesbatzek, antzerki taldeek, akademiek, ikuskizunetako teknikariek edo laguntzaileek egoera ezohikoan eta prekarioan jarraitzen dute", gaineratu du.

Gainera, ohartarazi duenez, egoera horrek "pertsona askok diziplina artistikoak alde batera uzteko arriskua dakar, eta hori oso albiste txarra da kulturarentzat eta gure hiriarentzat, kulturarik gabeko herria etorkizunik gabeko herria delako".

Hala, gaur lortutako akordioa "garrantzitsua" dela azpimarratu du, "gure kultura eta gure hiriaren egungo eta etorkizuneko artistak zaintzeko urrats bat delako". "Pertsonek abesten, dantzatzen, antzerkia egiten, idazten… jarraitu ahal izateko Bilbo bat nahi dugu, horrek guztiok aberasten gaituelako eta hiriari bizia ematen diolako", gaineratu du.

Bilboko Udalak pandemiaren eraginez ongizate emozionalaren eta osasun mentalaren esparruan laguntza eskaintzeko programa bat abiaraziko du, EH Bilduren ekimenez

| 2021-05-27 10:24:00

EH Bildu udal taldearen ekimenez, Udal Gobernuak pandemiak ongizate emozionalaren eta osasun mentalaren arloan eragindako kolektiboei laguntzeko programa bat martxan jarriko du, udalaren eskumenen barruan. EH Bilduk aurkeztutako mozio baten ondorioz, alderdi soberanistak eta gobernu taldeak egindako zuzenketa onartu ostean adostu dute akordioa.

Bruno Zubizarreta EH Bilduko zinegotziaren esanetan, akordio hau “'Bilbao Aurrera' berezia bat izango da, COVID 19aren ondorioz, zaurgarritasun emozionala duten gure hiriko pertsonei arreta berezia eskaintzeko". "Gure betebeharra da, eta egin egingo dugu", azpimarratu du.

Zubizarretak azaldu duenez, "errealitate bat da pandemiak eremu ezberdinetan dituen ondorioek herritarren osasun mentalari zuzenean eta modu garrantzitsuan eragiten diotela". "Antsietatea, beldurra, bakardadea, distantzia soziala, murrizketak, estresa eta ziurgabetasuna zabaldu eta areagotu egin dira azken hilabeteetan", gaineratu du.

Horren harira, ohartarazi du "arreta berezia" behar duela pandemia nerabeengan izaten ari den eragin emozionalak; izan ere, "era guztietako osasun mentaleko arazoengatik (bizia kentzeko saiakera, deskonpentsazio emozionalak…) gazteenen ospitaleratzea % 60 igo da Euskadin".

Horregatik guztiagatik, Zubizarretaren ustez, "premiazkoa" da Udalak, bere eskumenen esparruan, "jarduketa batzuk ezartzea eta neurri desberdinak hartzea COVID 19ak bilbotarrengan sortutako egoera arintzeko".

Horrela, EH Bilduk azpimarratu du lortutako akordioa "oso tresna egokia" dela pandemiak bilbotarrengan ongizate emozionalari dagokionez izan dituen ondorioei aurre egiteko.

 

 

 

 

EH Bilduk proposatuta, bulegoetan aurrez aurreko arreta emateko eskatu die Bilboko Udalak banketxeei

| 2021-05-27 09:33:00

Bilboko Udalak hirian dauden banku erakunde laguntzaileei eskatu die beren bulegoetan leihatila zerbitzua eman dezatela, eguneroko ordutegietan, bezeroei arreta egokia emateko, behar dituzten banku-izapide guztiak egin ahal izan ditzaten. EH Bilduk aurkeztutako mozio baten ondorioz, alderdi soberanistak eta gobernu taldeak egindako zuzenketa onartu ostean adostu dute akordioa.

Jone Goirizelaiak, EH Bilduren Bilboko bozeramaileak, adierazi duenez, akordio "garrantzitsua" da, izan ere, bilbotarren "bozgorailua" izango da Udala, herritarrak egiten ari diren aldarrikapen hori finantza erakundeei helaraziko dietelako.

“EH Bilduk oin bat kalean dugu, eta beste bat erakundeetan; horregatik, Bilboko hainbat auzotako herritarrek eta Pentsionistak Martxan eta Kutxabank Publikoa plataformek aspalditik egiten ari diren eskaera ekarri dugu osoko bilkurara", adierazi du.

Jone Goirizelaiak esan duenez, banketxeak bulegoak sistematikoki ixten ari dira eta horrek kalte handiak eragiten ditu herritarrengan, batez ere adinekoengan; izan ere, askotan, ilara handietan itxaroten egon behar izaten dira banku-zerbitzuak eskuratzeko edota beste auzo batera joan behar dira arreta presentziala jasotzeko.

Era berean, Arangoitiko kasua aipatu du adibide gisa; sukurtsalik gabe geratu baita, eta horrek "kalte handiak eragin ditu auzoko 5.000 bizilagunengan, tokiko merkataritzan eta ostalaritzako lokal txikietan". Gainera, kontuan hartu behar da auzoaren irisgarritasun eskasak egoera okertu egiten duela.

Goirizelaiaren ustez, "zuzeneko arretaren desagerpena bereziki kezkagarria da ohiko banku-harremanak ez dituzten errenta txikieneko kolektiboentzat, besteak beste, gero eta zailagoa egiten zaielako eskudirua jasotzea".

Hori dela eta, akordio “positiboa” dela adierazi du EH Bilduk. "Guztion artean banketxeak presionatu behar ditugu aurrez aurreko arreta bermatzeko", gaineratu du.