Bilbo

EH Bilduk salatu du gobernu taldeak SAMUR ixteko hartutako erabakiarekin oinarrizko zerbitzu publiko bat kendu eta zerbitzu publikoak pribatizatzen dituela

| 2021-10-15 11:50:00

EH Bildu Bilbok salatu duenez, Udal Anbulantzia eta Erreskate Zerbitzua (SAMUR) ixteko erabakiarekin “bilbotarrentzat funtsezko zerbitzu bat gehiago ezabatzea erabaki du”. ”Udal Gobernuak berriro ere zerbitzu publikoak suntsitu eta pribatizatzeko  bidean beste pauso bat ematen du”.  

“Aburtoren azken bi agintaldietan funtsezko bi zerbitzu publiko kendu dituzte, basozaintza zerbitzua eta orain SAMURa”, gogoratu du Asier Gonzalez EH Bilduko zinegotziak. Erabaki horiekin, bere esanetan, gobernu-taldeak “enpresa pribatuei mesede egiten die, zerbitzuaren kalitatearen gaineko kontrola galtzen du eta langileen baldintzak okertzen ditu”.

“Oraingo honetan, Udal Gobernuak ez du inolako lotsarik izan SAMUR ezabatzeko. 100 urtetik gorako zerbitzu publiko bat, Udal Zerbitzuen Kartan sartuta dagoena eta Bilbon beharrezkoa dena, larrialdiei aurre egiteko berehalakotasunagatik, hiriaz duen ezagutzagatik eta erreskate-egoeretan duen prestakuntza espezifikoagatik”, nabarmendu du.

Colón de Larreategi kaleko 13. zenbakian dagoen udal eraikinaren salmenta dela eta, irabazia alokairuzko udal etxebizitza berrien sustapenera bideratzea proposatu du EH Bilduk

| 2021-10-13 14:43:00

Gaur Colón de Larreategi kaleko 13. zenbakian dagoen udal eraikina enkantean jarri da, 7,9 milioi euroko prezioa eskaini duen interesdun bakarrarekin.

Salmenta honekin Udalak galdu egin du 6. barrutia udal etxebizitzaz hornitzeko aukera.

Behin erabakia hartuta, EH Bilduk proposatu du eragiketa honen irabazia alokairu-erregimeneko udal-etxebizitza berriak sustatzera bideratzea.

Etxebizitzaren arazoa lehen mailako arazoa da Bilbon, eta politika ausartekin konpondu behar da. Horrela bakarrik lortuko dugu merkatuko prezioak arautzea eta gure gazteei aukerak ematea.

Honekin batera urriko Osoko Bilkuran eztabaidatzeko aurkeztutako mozioa atxikitua.

Guggenheim Bilbao Museoko garbitzaileek lan prekarietatearen eta soldata arrakalaren aurka egiten duten borroka ikusezin bihurtzeko udal gobernuak duen estrategia salatu du EH Bilduk

EH Bilduk hainbat galdera egin ditu Guggenheim museoaren inguruan garbiketa-zerbitzuen jarduna argitzeko; 120 egun greban beteko dituzten Museoko langileei dagokiena

| 2021-10-08 10:50:00

EH Bilduk salatu du udal gobernua Guggenheim Museoko garbitzaileen borroka ikusezin bihurtzea helburu duen estrategian aktiboki laguntzen ari dela. Museoko garbitzaileak  ekainaren 11tik greban jarraitzen dute, beren lan-eskubideen alde.

Alba Fatuarte EH Bilduko zinegotziak azaldu duenez, Guggenheim Museoko garbiketa zerbitzuko langileek salatu dutenez, zerbitzu horren enpresa esleipenduna, Ferrovial Servicios, langileen grebarako eskubidea urratzen ari da, greba egiten ari diren langileei dagozkien kanpoaldeak garbitzen ari baitira. Era berean, ohartarazi dute Guggenheim Museoa, Bilboko Udal Gobernuarekin batera, Udaleko makineria eta langileak erabiltzen ari dela greban dauden langileei ere dagozkien lanak egiteko Museoaren kanpoaldean.

Ildo horretan, talde subiranistak galdera batzuk aurkeztu dizkio Kepa Odriozola Zerbitzu eta Bizi Kalitate Saileko zinegotzi arduradunari, Guggenheim Museoaren inguruan udal garbiketa zerbitzuak zer nolako lanak egiten ari diren argitzeko. Zehazki, galdetu du ea greba hasi aurretik udal zerbitzuek museoko sarrerako eremuak garbitzen zituzten; noiztik garbitzen dituzten; zergatik jarduten duten udal garbiketa-zerbitzuek ez dagokien eremu batean, eta noren aginduz.

“Egoera hori berretsiz gero, Udal Gobernua Museoko garbiketa-zerbitzuko langileen grebarako eskubidea urratzen ariko litzateke, eta, nolanahi ere, agerian geratzen da emakume horien borroka ikusezin bihurtzen laguntzen ari dela. Emakume hauek hilabeteak daramatzate greban soldata-arrakala eta lan-prekarietatea kasu eskandalagarri bat salatzeko”, adierazi du.

Fatuarteren ustez, “Udal honek bizkarra ematen die garbiketa-zerbitzuko langileei, eta lan-baldintza duinen aldeko eta prekarietatearen eta soldata-arrakalaren aurkako borroka oztopatzen du”. “Udala langileak laguntzen egon beharko litzateke eta ez boikoteatzen”, gaineratu du.

EH Bildu Udal Taldeak gertakari hau "onartezintzat" jo du eta, Museoan garatu diren aurreko lan-gatazketan egin duen bezala, Udala konponbide bat bilatzen inplikatzea eskatu du, batez ere Aburto alkatea Guggenheim Bilbao Museoaren Patronatuko kide denean, eta Museoko Fundazioak urtero 250.000 euroko diru-laguntza jasotzen duenean udal-kutxetatik. Amaitzeko, Fatuartek berretsi du EH Bilduk babesa eman diela Museoko garbiketa zerbitzuko langileei lan-prekarietateari eta soldata-arrakalari aurre egiteko borrokan.

EH Bilduk Euskotreni eskatu dio Atxuriko geltokiari buruz bizilagunekin elkarrizketa prozesu bat ireki dezala auzoaren beharrei erantzuteko

Proposamen bana aurkeztu du Udalean eta Legebiltzarrean, Euskotreni eskatzeko berriz azter dezala geltokiko hall-a erakusketa-erabilerarako erabiltzeko erabakia.

| 2021-10-04 11:01:00

EH Bilduk Bilboko Udalean eta Eusko Legebiltzarrean hainbat proposamen aurkeztu ditu  Euskotreni Atxuriko geltokiko hall-a erakusketarako erabiltzeari buruzko erabakia berrazter dezala eskatuz. Horrela, elkarrizketa-prozesu bat ireki dezala eskatu dio Bilboko Udalarekin, Atxuriko bizilagunekin eta auzoko hezkuntza komunitatearekin batera, eraikinaren eremu horri auzoko eta bertako hezkuntza-komunitateko beharren araberako erabilera emateko.

Ikoitz Arrese EH Bilduko legebiltzarkideak eta Alba Fatuartek EH Bilduko zinegotziak horren berri emateko prentsaurrekoa eskaini dute gaur eta, bertan, balioan jarri dute Atxuriko bizilagunek, Lokomotorak taldeak, eta Maestro García Rivero eskolako guraso-elkarteak egiten ari diren lana, izan ere, 6 urte baino gehiago daramatzate auzoaren egoera hobetzeko lanean, espazio arazo larriak baitituzte.

Denbora horretan, adierazi dutenez, Atxuriko estazio enblematikoaren atondoak auzoari eskaintzen dizkion aukeren inguruko lan izugarria egin dute, ikuspuntu publiko, sozial eta kultural batetik. Hain zuzen ere, espazio horri funtzio berriak emateko eta auzoaren bizitzaren parte izaten jarrai dezan, partaidetza-prozesu bat egin zuten eta, ondoren, erakunde arduradunei geltokiko espazioetarako eta ingururako erabilera-proposamen zehatzak helarazi zizkieten.

Era berean, irailaren 26an Atxuriko bizilagunek egindako manifestazio jendetsua gogoratu dute, Bilboko Udalari Atxuri kalean eta Ibeniko kaian jarduteko eskatzeko, bertatik oinezkoen mugikortasuna lehenesteko, baita Atxuriko geltokiko hallaren erabilera publikoa eta herritar guztientzat irekia eskatzeko ere.

Hala ere, Fatuartek eta Arresek adierazi dutenez, “auzotarren aldarrikapenak eta egindako lan eta ekarpen izugarriak kontuan hartu gabe, jakitera eman berri da Euskotrenek lizitaziora atera duela Atxuriko geltokiko hall-a erakusketarako erabiltzeko proiektua, eta beste erabilera batzuk emateko aukera itxi dela, auzoari, auzotar guztiei eta eskola-komunitate osoari bizkarra emanez”.

Hori, haien ustez, “onartezina” da, estazioko hall-a Atxuri auzorako ekipamendu bihurtzeko “aukera galtzea ekarriko baitu, auzoko bizi-kalitatea hobetzeko aukera galtzea, hain zuzen ere”. “Erakundeetako agintari askori ahoa betetzen zaie herritarren parte-hartzeaz hitz eginez, baina gero, praktikan jarri behar denean, ez ikusiarena egiten dute eta herritarrek auzoak hobetzeko aurkezten dizkiguten aldarrikapenak, ekarpenak eta proiektuak baztertzen dituzte”, kritikatu dute.

Horregatik, “premiazkotzat” jo dute horren inguruan zerbait egitea. Berehalako erantzun gisa, Bilboko EH Bildu udal taldeak premiazko mozio bat aurkeztu zuen iraileko Osoko Bilkuran eztabaidatzeko, baina urgentzia tramitera onartu ez zenez, mozioa berriro erregistratu dute urriko Osoko Bilkuran eztabaidatzeko, eta eskaera Eusko Legebiltzarretik ere helarazi diote Euskotreni, ekimen parlamentario baten bidez.

“Udal Gobernuak eta Eusko Legebiltzarrak gure proposamena onartzea espero dugu; izan ere, horrela ez bada, Atxuri auzoko bizilagunei eta hezkuntza-komunitateari bizkarra emango zaie eta espazio horrek auzoaren behar bati erantzun ahal izateko egin duten lana baztertuko da”, nabarmendu dute. “EH Bildutik lanean jarraituko dugu horrela izan dadin bermatzeko eta, era berean, herritarren benetako parte-hartzea bermatzeko”.

 

EH Bilduren ekimenez, Gobernuak Bilboko barrutietako udal-zentroetan eta gainerako udal ekipamenduetam irisgarritasun arazoak zuzentzeko konpromisoa hartu du

| 2021-09-30 13:25:00

EH Bilduren ekimenez, Udal Gobernuak Bilboko barrutietako udal-zentroetan eta gainerako udal-ekipamenduetan irisgarritasun fisikoari dagokionez dauden gabeziak antzemateko eta horiek konpontzeko konpromisoa hartu du. Era berean, irisgarritasun sentsorial eta kognitiboari dagokionez, Udal Gobernuak ebaluazio bat egingo du gutxienez hiru ekipamendutan, irisgarritasun hori bermatzeko neurriak ezartzeko.

Ekimen hau EH Bilduk eta gobernu taldeak aurkeztutako zuzenketa baten bidez onartu da,  alderdi soberanistak aurkeztutako mozio baten ondorioz. Bruno Zubizarreta EH Bilduko zinegotziak azaldu duenez, bilbotar askok irisgarritasun arazo larriak dituzte barrutiko zentro jakin batzuetara edo beste udal ekipamendu batzuetara modu autonomoan sartzeko, "eraikinek ez dutelako pertsona guztien irisgarritasuna bermatzen”.

Ildo horretan, gurpildun aulkian dagoen pertsona batek udal zentro batera sartzeko dituen zailtasunak azaldu ditu. "Askotan, atea irekitzea oso zaila da, bai bere pisuagatik, bai, atea eraistean, ateak osatzen duen angeluak erdigunera sartzea ezinezko egiten duelako", adierazi du.

Era berean, zailtasun sentsorialak eta kognitiboak dituzten pertsonentzat "oso zaila izaten da barrutietako udal-zentroen barne murgiltzea". "Seinaleetan irakurketa erraza sartzeari dagokionez, gabezia nabarmenak daude, ez da egoten ikusmen urritasuna duten pertsonentzat zoladura podotaktilik, braile sistema duten kartelak falta dira eta igogailuetan ez dago sentsorerik", gaineratu du.

Zubizarretaren esanetan, Bilboko irisgarritasunaren inguruan aurrerapausoak eman diren arren, "oraindik pertsona askorentzat oso zaila da barrutiko zentro batera joatea". "Udal ekipamenduak pertsona guztientzat irisgarriak izatea gure betebeharra da", azpimarratu du.

Lortutako akordioaren bidez, adierazi duenez, Udal Gobernuak "barrutiko Udal Zentroetako eta beste udal ekipamenduetako sarbide nagusien irisgarritasunaren inguruko gabeziak detektatu, definitu eta aurrekontuz hornitzeko konpromisoa hartzen du, baita irisgarritasun sentsorial eta kognitiboa bermatzeko neurriak hartzekoa ere". "Akordio ona da, eta Bilbo inklusiboagoa izateko beste pauso bat ematea ahalbidetuko du", azpimarratu du.