Bilbo

EH BILDUk Bilboko sexu erasoa gogor salatu du, biktimari bere elkartasun eta babes osoa helarazi dizkio eta deitzen diren mobilizazioetan parte hartuko duela jakinarazi du

| 2019-08-02 11:18:00

EH Bildu Bilbok “gogor salatu” du gauerdian Bilbon gertatutako sexu erasoa eta erasoa pairatu duen emakumeari bere “babes eta elkartasun” guztia helarazi dizkio. Era berean, eraso sexista larri hau salatzeko deitzen diren mobilizazioetan parte hartuko duela jakinarazi du EH Bildu Bilbok.

Bruno Zubizarretak EH Bildu Bilboko zinegotziak adierazi duenez, “indarkeri sexista kasu larri berri baten aurrean gaude eta horren jatorria da gizonen eta emakumeen arteko egiturazko ezberdintasuna”. “Emakume izate hutsagatik edozein emakumek sufritu dezake indarkeria”, salatu du.

Horrela, EH Bildu Bilbok azpimarratu duenez, “arazoaren larritasunaren aurrean, instituzioek premiazko erantzun integrala” eman behar dute eta “prebentzioan eta heziketan egiten denaz gain, emakumeek zein erasoek dituzten berezitasunak aintzat hartu behar dira”. “Berdintasun politika aktiboak aldarrikatzen ditugu”, nabarmendu du.

Era berean, EH Bilduko zinegotziak Bilboko Udalari eskatu dio eraso sexisten “jarraipen berezia” egiteko “berriro erasorik ez gertatzeko”. Horrez gain, Zubizarretak gogoratu duenez, orain dela aste batzuk EH Bilduk jaietan eraso sexistak saihesteko kanpaina abiarazi zuen eta hainbat neurri proposatu zituen. “Ezinbestekoa da neurriak martxan jartzea edozein motatako eraso sexista saihesteko”, aldarrikatu du.

EH BILDUk Bilboko Udalari larrialdi klimatiko egoera deklaratzeko eta aurre egiteko politika eraginkorrak martxan jartzeko eskatu dio mozio baten bidez

| 2019-07-30 12:59:00

EH Bildu Bilbok adierazi duenez, “larrialdi klimatikoak datozen urte eta hamarkadetako agenda baldintzatuko du, gure ongizatearentzako mehatxu nagusienetarikoa baita, benetako zibilizazio erronka bat”. “Mundu mailako eta Euskal Herriko egoera eta joerak ez du baikortasunerako tarte handiegirik uzten, are gutxiago geldotasunerako. Gazteentzako dagoeneko kezka nagusia bihurtu da, ez bakarrik larrialdia, baita gaiari ematen zaion erantzun politiko eskasa ere”, adierazi du.

Egoerari aurre egiteko, EH Bildu Bilbok mozio bat aurkeztu du eta, horretan, Bilboko Udalari eskatu dio “larrialdi klimatiko egoera deklaratzeko eta, bere eskumenen baitan, klima-aldaketari aurre egiteko politika eraginkorrak garatzeko konpromiso irmoa adierazteko”.

Era berean, aurkeztutako proposamenean, EH Bilduk honakoa proposatzen du: Bilboko Udalak Eusko Jaurlaritzari “larrialdi klimatiko egoera deklaratzea eskatzea eta horri aurre egiteko beharrezkoa den karbonagabetze prozesua 20140. urtera aurreratzeko moduko plangintza eta politikak abiatzea eskatzea eta baita klima- aldaketaren eraginez pairatuko ditugun ondorioetara egokitzeko neurriak hartzera premiatzea ere”.

Horrez gain, EH Bildu Bilborentzat garrantzitsua da Bilboko Udalak “8 hilabeteko epean klima-aldaketa eragiten duten udal eskumeneko faktore guztiei buruzko diagnosi bat eta 4/2019 Jasangarritasun Energetikoaren Legearen garapena udalerrira egokitzeko hurbilpen lan bat egitea”. 

Egoeraren diagnosia kontuan hartuta, Bilboko Udalari prozesu parte-hartzailea martxan jartzea eskatu dio EH Bildu Bilbok, “herritarren, auzoen eta beste edozein eragileren ekarpenak barne bilduko dituen plangintza osatzeko 2020. urtean” eta plangintza hori aurrera eramateko beharrezkoak diren bitarteko tekniko zein ekonomikoak.

Azkenez, Bilboko Udalari proposatzen dio, klima-larrialdi egoera dela medio, irailaren 27an deituta dagoen nazioarteko grebarekin bat egiteko eta herritar guztiak parte hartzera animatzeko eta aipatu mozioa Bizkaiko Foru Aldundiari, Eusko Jaurlaritzari eta Espainiako trantsizio ekologikorako ministerioari bideratzeko.

“Mozio honen bitartez, egoeraren larritasuna aitortzea dugu helburu, Larrialdi Klimatikoari behar besteko arreta ipintzeko asmoarekin, aurrerantzean politika publiko guztiak Larrialdi Klimatiko egoeraz kutsa daitezen”, adierazi du EH Bildu Bilbok.

 

 

EH BILDU Bilbok Udalari eskatu dio Bilbao Kirolak-eko lan gatazkari irtenbidea emateko, langileen lan baldintza duinak bermatuz eta kalitatezko zerbitzu publikoak eskainiz

Udalari alde guztiekin eratutako mahai bat deitzea eskatu dio eta bideratzaile lanak egiteko prest agertu da EH Bildu

| 2019-07-24 15:51:00

Jone Goirizelaiak, EH BILDU Bilboko udal taldearen bozeramaleak, Bilboko Udalari eskatu dio Bilbao Kirolak-eko lan gatazkari irtenbidea emateko, alde batetik, langileen lan baldintza duinak bermatzeko eta, bestetik, kalitatezko zerbitzu publikoak bermatzeko. Horrela, Itxaso Errotetari, Gazteria eta Kirol saileko zinegotziari, alde guztiekin, langileen ordezkariak eta patronala, osatutako mahaia eratzea eskatu dio eta EH Bildu Bilbo bideratzaile lanak egitera eskaini da.

Goirizelaiak adierazpen horiek Rotetak egindako agerraldian egin ditu. Agerraldia EH Bildu Bilbok eskatutakoa izan da Bizkaian izaten ari diren eta Bilboko kiroldegiei zuzenean eragiten dieten kirol zelai eta lokalen greba eta lanuzteen harira hartuko diren neurrien azalpenak eman ditzan.

Ildo horretan, adierazi duenez, “atzo 40 gradu izan genituen Bilbon eta igerilekuetara joateko aukerarik ez, Bilbao Kirolak-eko langileak grebak eta lan-uzteak egiten ari direlako lan baldintza duinak eskatzeko”. “Oso ondo dago argazkiak ateratzea kiroldegi berrien inaugurazioan, baina beharrezkoa da kiroldegi guztietan kalitatezko zerbitzuak eskaintzea eta horretarako ezinbestekoa da langileen lan baldintza duinak bermatzea”, adierazi du.

Egoera horren aurrean, esan duenez, “Errotetak dio Udalak aldeei eskatu diola gatazkari irtenbidea emateko, baina zer eskatu die? Langileekin egon da edo soilik patronalarekin?”, galdetu dio Rotetari.

Goirizelaiak EH Bilduk langileekin hainbat bilera izan dituela gogoratu du eta euren aldarrikapenak jakinarazi dizkio Errotetari: “ratio hobeak eta soldata duinak, lanaldi osoan 1.200 eurora ere ez baitira heltzen eta gainera langileek ez dituzte lanaldi osoak. Egoera horretan, ez ohiko orduak osagarri bezala ordaintzen dira, langileek bere erropak erosi behar dituzte, pertsonal falta…”.

EH Bilduren bozeramaleak argitu duenez, langileen helburua “ez da, inondik inora erabiltzaileei kalterik egitea, soilik zerbitzua hobetzea nahi dute; baina 18 hilabete negoziazioetan egon ondoren eta 30 urte hitzarmen kolektibo iraingarriekin nekatuta daude egoerarekin”.

Egoera horretan, “zer egingo du Udalak? Zeozer egingo du edo, ostruka bezala, burua izkutatzen jarraituko du, bera denean egoera honen erantzule nagusia, zerbitzu publikoa den heinean”, galdetu du.

Goirizelaiaren esanetan, EH Bilduk “zuzeneko kudeaketaren” aldeko apustua egiten du, baina azpikontratazioek jarraitzen duten bitartean, EH Bildu Bilbok “bideratzaile” moduan eskaintzen du bere burua eta Udalari alde guztiekin osatutako mahaia deitzeko eskatu dio. “Nahiz eta Udalak beste alde batera begiratu nahi duen, kiroldegiak bere eskumena dira,  enpresak azpikontratatzeak ez dio ardurarik kentzen”, nabarmendu du.  

EH BILDUk BBK Live jaialdiko langileek “esklabutza” baldintzak jasan dituztela salatu du eta Udalari eskatu dio neurriak har ditzan

Last Tour enpresa antolatzaileari kontratua luzatuko dion galdetu dio Jone Goirizelaiak Udalari, 1,4 milioi euroko laguntza zuzena eman ostean, bera baita ondorioen erantzulea

| 2019-07-24 15:39:00

EH BILDU Bilboko Udal Taldearen bozeramale Jone Goirizelaiak, BBK Live jaialdiko langileen lan baldintzak salatu ditu, “esklabutza egoeran lan egiten baitute eta gehienak gazteak dira”. Horregatik, Bilboko Udalari “neurriak jar ditzala” eskatu dio, “langileen lan baldintza duinak bermatzeko”. Izan ere, Udalak jaialdia kudeatzen duen Last Tour enpresari 1,4 milioi euroko laguntza zuzena ematen dio, aurrekontu osoaren %15a. “Diru asko da, Udalak bultzatutako jaialdia da, eta horregatik gure gazteak esklabo bihurtzea ezin dugu onartu”, adierazi du.

EH Bilduk joan den uztailaren 15ean BBK Live jaialdiari buruzko hainbat galdera aurkeztu zituen. Batetik Bilboko Udalak jaialdiari zuzendutako diru-laguntzari buruz eta, bestetik, enpresa antolatzaileen kontrolari buruz galdetu zuen. Gaur Xabier Otxandianok, Garapen Ekonomiko, Merkataritza eta Enplegu saileko zinegotziak, Bilbao BBK Live jaialdiari buruz hitz egiteko agerraldia egin du eta bertan eman ditu hainbat azalpen.

“Miseria”

EH Bilduko bozeramaleak salatu duenez, BBK Live jaialdiaren “atzean miseria larria dago”. Ildo horretan, Last Tour enpresak, “bere errentagarritasun ekonomikoa du helburu bakartzat, beste ezeren gainetik”, eta zerbitzuak emateko beste enpresak azpikontratatzen dituenean, “edo kanpotarrak dira edo ez dituzte baldintzarik oinarrizkoenak betetzen”. Hortaz, “eragiten duten inpaktu ekonomikoaren alde handi bat ez da hemen gelditzen” eta, gaineratu du, “ez da hemengo enpresen aldeko apusturik egiten”.

Goirizelaiaren esanetan, Last Tourrek azpikontratatuko enpresa batek “orduko bost euroko soldatak ordaintzen dizkie langileei, edo kasu batzuetan 3,5 eurokoak”; “atsedenik gabeko 12 orduko lanaldiak jartzen dizkiete”; “kasu batzuetan kontratu barik edo kontratu irregularrekin”. Gainera, “langile batzuei gezurra esateko eskatzen diete arduradunek, Lan Ikuskaritza agertzekotan”.

Goirizelaiaren ustez, “gertaerak larriak dira, are gehiago Bilboko Udalak sustatutako jaialdia den heinean”. Horregatik, Bilboko Udalari galdetu dio Last Tour enpresari kontratua luzatzeko asmorik duen eta, era berean, neurriak eskatu dizkio enpresa antolatzaileek lan baldintza duinak bermatzeko.

Bestalde, ingurumena zaintzeko neurriak jar daitezen ere eskatu du Jone Goirizelaiak, izan ere, “komun publikoak kudeatzen zituen enpresak, jakinaren gainean egonda, ur zikinak jaurti zituen Kadaguara iaz”, eta Otxandiano zinegotziari galdetu dio ea aurten ere gauza bera gertatu den.

EH Bilduren beste galdera bat gonbidapenei buruzkoa izan da. Otxandianori Udalak zenbat gonbidapen banatzen dituen galdetzean ez du erantzuten jakin. Goirizelaiak jakinarazi dio   “bertoko hainbat euskal komunikabideek ez dute gonbidapenik jasotzen eta ez dugu ulertzen zergatik”. Era berean, BBK Live-k euskal identitatea zaindu behar duela azpimarratu du, bisitariek non dauden ikas dezaten, “batzuetan ez dakitelako Bilbon edo beste leku batean dauden”.

Horrela, Udalak sustatutako jaialdi bat dela kontuan hartuta, Goirizelaiaren esanetan, garrantzitsua da “nazioarteko talde onak izatea, bai, baina baita ere Euskal Herriko musika taldeek lekua izatea;  gure identitatea indartuko duten irudi programa bat izatea eta bertoko enpresak kontratatzeko ahaleginak egitea”. Koste hain altua duen jaialdi batek beste hainbesteko onura ekarri behar dio Bilbori”, adierazi du Jone Goirizelaiak

EH Bildu Bilbok Udalari eskatu dio auzo-poliziaren eredua defendatzeko Udaltzaingoaren enplegu eskaintza publikoan

| 2019-07-23 14:45:00

Asier Gonzalezek, EH Bilduko Bilboko zinegotziak, Bilboko Udalari eskatu dio “auzo-poliziaren eredua defendatzeko Udaltzaingoaren enplegu eskaintza publikoa egiten duenean”. Ildo horretan, gogoratu duenez, “Euskal Herria Bilduk Bilboko Herritarren Segurtasunerako ituna sinatu zuen 2018an, oinarrian auzo-poliziaren eredua defendatzen duelako: herritarrengandik hurbila, auzoetan deszentralizatua eta prebentzioan trebatua, besteak beste”. “Uste dugu hiritarren eskubideak defendatuko duen eredu honen alde egin behar dela”, azpimarratu du.

EH Bilduko zinegotziak adierazpen horiek Amaia Arregik Herritarren Segurtasuneko Saileko zinegotziak egindako agerraldian egin ditu. Agerraldiaren helburua izan da Auzitegi Gorenaren epaia ikusita, bitartekotasun egoeran dauden udaltzainen egoeraz eta epai horrek segurtasunaren itunean duen eraginaz informazioa ematea.

Bertan, Gonzalezek kritikatu duenez, “egun daukagun eredua ez da herritarrengandik hurbila eta auzokoa”. Ildo horretan, hainbat gabezia aipatu ditu, besteak beste, “herritarrek ezin dutela ohiko salaketak egin hainbat komisaldegietan”.

EH Bilduren zinegotziaren ustez,  “kontua ez da zenbat udaltzaingo dauden, baizik eta ze paper izango duten hiritar guztien mesederako”. “Enplegu eskaintza publikoa aukera bat da auzo-poliziaren eredua edo, aldiz, errepresio eredua defendatzeko. EH Bildu Bilbok lan egingo du auzo-polizia ereduaren alde, beharrezkoak diren neurri guztiak bultzatuz”, azpimarratu du.

ALBISTEAK

EH Bilduk azalpenak eskatu ditu BAM Magisteritza eskola eraisteko baimena berehala ematearen inguruan

2021-03-17 12:02:00

Abaunza, Narbaiza eta Gilen agerraldia eskatu du, hirigintzaren eremuaz gain, hezkuntzaren eta osasunaren esparruari eragiten dion gaia delako

EH Bilduk eskatu du Bilbok agroekologian eta elikadura-subiranotasunean oinarritutako elikadura-estrategia bat ezar dezala

2020-08-06 11:33:00

Lehen urrats gisa, Bilbo "Agroekologiaren aldeko Hirien Sarean" sar dadila eskatu du, tokiko elikadura-sistemak eraikitzeko