Bilbo

Santutxuko hezkuntza publikoa, Bilbobusen irisgarritasuna, emakumeak, aireportua, AP-68ko bidesaria eta Bilboko Portuan armak trafikatzeari ezezkoa, EH Bildu Bilboren mozioen gaiak

| 2020-02-21 13:38:00

Ostegunean, otsailaren 27an, Bilboko Udalean Osoko Bilkura izango dugu eta horrela, gaurko prentsaurrekoan, EH Bildu Bilbo taldeak aurkeztutako zazpi mozioen berri ematera gatoz. Gure gaiak honako hauek dira: Santutxuko auzoan hezkuntza publikoa, Bilbobuseko geltokien irisgarritasuna, AP-68ko erabiltzaile bizkaitarrei hobariak ezartzea, feminizidio eta eraso matxistak gertatzen direnean larrialdizko batzordeak eratzea, udal politikaren erdigunean benetako berdintasuna martxan jartzeko neurriak, Bilboko Portua armen trafikorako ez erabiltzea eta Loiuko aireportuko langileek Eurokopan gauez ez irekitzeko hartu duten erabakia errespetatzea.

Mozio horiek guztiak egun Bilbon eta Euskal Herrian dauden hainbat aldarrikapen,  beharrizan eta kezkei erantzuna emateko helburuarekin aurkeztu ditugu eta horregatik espero dugu adostasunetara heltzea.

Larreagaburu

Mozioetako batean Mina del Morro hezkuntza zentroa era progresiboan ixteko hartutako erabakia jorratzen dugu; izan ere, gai horrek egoneza sortu du Santutxuko hezkuntza komunitatean eta bizilagunen artean baita ere. Horregatik, Bilboko Udalak Eusko Jaurlaritzari honakoa eskatzea proposatzen dugu: Bilboko 4. Barrutiko eskola publikoak berrantolatzeko xedatu duen dekretua, behintzat ikasturte batez, geldiaraz dezala eta ikerketa eta elkarrizketa prozesu bat martxan jarri dezala, heziketari lotutako agente guztien parte hartzea bermatuz, etorkizunerako 4. Barruti guztirako hezkuntza publikoaren markoa adosteko.

Boluetako Santa Anako etxalde berriaren proiektua berraztertu dezala ere proposatzen dugu eta bertan aurreikusten diren 1.000 etxebizitzek zelan eragingo dioten etorkizuneko eskola errealitateari eta osasungintzari ere bai, sortuko diren premia ekipamentalak kontuan hartuta eta inolako udal plangintzan ez direla aurreikusten kontuan hartuta.

Bestalde, bermatzeko dago Bilbobuseko geltokien irisgarritasuna; izan ere, oraindik geraleku batzuetan seinale, kontenedore, lorontzi eta beste hainbat elementu daude eta beste batzuetan ez daude jesarlekurik edo espaloiaren altuera ere ez da egokia. Horrek, zuzenean, mugikortasun urria duten eta gurpildun aulkiak erabiltzen dutenei eragozpenak eta irisgarritasun arazo larriak sortzen dizkie; horregatik, udal gobernuari Bilbobuseko geltokietan dauden irisgarritasun arazoak konpontzeko eskatzen diogu.

Beste mozio batean Bilboko Udalak Bizkaiko Aldundiari AP-68a erabiltzen duten bizkaitarrentzat hobariak ezartzea eskatzeko proposatzen dugu; izan ere, hori foru errepidea da 2019ko abendutik. AP-68ko Bizkaiko zatia 50.000 ibilgailutik gora erabiltzen dute eta horrek Bilborekin lotura zuzena du. Erabiltzaile horiek ez dute hobaririk eta hori diskriminazio argia da, gure ustez, diskriminazio horrekin bukatzeko garaia da.

Emakumeak

Gure proposamenen erdigunean emakumeak jarri nahi izan ditugu. Ildo horretan, Elkarrekin Podemosekin batera Bilbon krisi batzorde bat sortzea eskatzen dugu, eraso matxista edo feminizidio bat gertatzen denean erantzuna emateko. Krisi Batzorde’ hori Bilbon eraso matxista edo feminizidio bat gertatzen den bakoitzean urgentziaz batzartuko litzateke eta horren zereginak izango lirateke, besteak beste, egoera baloratzeko eta erantzuna emateko biktimaren edota bere zuzeneko familiarren ardura hartzea, biktima edota bere zuzeneko senitartekoen beharrizanei egokitutako lanen banaketa eginez.

Horrez gain, beste mozio bat aurkeztu dugu berdintasun eraginkorra udal politiken erdigune izateko neurriak proposatuz. Horrela, besteak beste, genero ikuspegi batetik udalerriko zaintzen errealitatearen azterketa egitea eta errealitate hori hobetzeko neurriak martxan jartzea proposatzen dugu eta kolektibo feministek jarduera guztietan, diseinutik ebaluazioraino, parte hartzea, euren iritzia kontuan hartuz. Bilboko Udalak martxoaren 8a, Emakumeen Nazioarteko Eguna dela eta, antolatuko diren ekimen guztiak egitea ahalbideratzea eta erraztea eskatzen dugu ere bai.  

Armen trafikoa eta aireportua

Bestalde, joan den otsailaren 9an Bilboko Portuan Saudi Arabiako Bahrí Yanbu itsasontzia porturatu zen, Yemengo gerrara bideratutako material militarra garraiatzeagatik ‘Heriotzaren zamaontzia’ ezizenez ezaguna dena. AIk salatu duenez, Yemengo gerra 2015ean hasi zenetik, zamaontzi horrek 330 miloi euroren balioa duen material militarra garraiatu du eta Nazio Batuen Erakundearen kalkuluen arabera Yemenen 200.000  pertsonatik gora erail dituzte.

Horregatik guztiagatik, gertaera horien konplize ezin gaitezkela bihurtu uste dugu eta horretarako beharrezkoa da Bilboko Portuak armak garraiatzen dituzten itsasontzien porturatzea debekatzea. Gainera, Bilboko Udala, Portuko Agintaritzako administrazio kontseiluko kide den heinean, Bilboko Portuak ‘Heriotzaren zamaontziak’ hartzearen kontra argi eta garbi azaldu behar da eta hori da mozioan proposatzen duguna.

Azkenik, gure zazpigarren mozioan Eurokopa eta Bilboko aireportuaren jarduerari buruzkoa da. Ildo horretan, Bilboko Udalak Txorierriko bizilagunek duten atsedenerako eskubidea defendatzeko eskatzen dugu, eta eskubide hori Loiuko aireportua gauez erabiltzearekin bateraezina dela.

Hortaz, honakoa proposatzen dugu: Bilboko Udalak AENAko zuzendaritzari eskatzea langileen erabakia errespeta dezala, izan ere, langileek bozketa bidez erabaki dute Eurokopa 2020ko partiduak direla eta gauez lanik ez egitea eta horrela adierazi du komiteak. Era berean, Bilboko Udalari eskatzen diogu UEFAri helarazteko Foronda eta Loiko aireportuen konbinazioek zerbitzuaren edozein beharrizan asetzen dituztela.

EH Bilduk Bizkaia dorrean Bilboko Udalaren eta Bizkaiko Foru Aldundiaren “ezgaitasuna” eta kudeaketa “txarra” salatu ditu

| 2020-02-19 13:50:00

Jone Goirizelaiak, EH Bildu Bilboko bozeramaleak, Bilboko eta Bizkaiko Foru Aldundiko udal eta foru gobernuen “ezgaitasuna” eta kudeaketa “txarra” salatu ditu Bizkaia dorrean nazioarteko ekintzailetza zentroaren proiektuan. Horren ondorioz, ohartarazi duenez, “bilbotar guztiok diru gehiago ordaindu behar izango dugu”.

Goirizelaiak adierazpen horiek egin ditu  Ekonomiaren Garapeneko, Merkataritzako eta Enpleguko Saileko zinegotzi ordezkaria den Xabier Otxandianoren agerraldiaren ondoren. Otxandianok agerraldia eskaini du Bizkaia Dorrearen eta Nazioarteko Ekintzailetza Zentroaren egungo egoeraren berri emateko, zergatik geratu den hutsik lehiaketa, horren ondorioak eta laster egingo diren jarduerak zeintzuk diren azaltzeko, hain zuzen ere.

Ildo horretan, EH Bilduko bozeramaleak gogoratu duenez, 2019ko ekaineko Osoko Bilkuran, nazioarteko ekintzailetza zentroa finantzatzeko, 2019ko aurrekontuetan konpromiso kredituak handitzeko proposamena eztabaidatu zen. “Horretan, esan ziguten, Foru Aldundiaren eta Udalaren arteko hitzarmena aurrera eramateko eta zentroa kudeatzeko eta martxan jartzeko, biderik hobeena zerbitzuen kontzesio kontratu bat zela, BEAZ foru elkarte publikoak tramitatuta. Horretarako onartutako konpromiso kredituak handitu behar ziren, 3.953.500 eurotan”, azaldu du. EH Bilduk proposamen horren kontra bozkatu zuen, kudeaketan “gardentasun eza” dela eta.

Gogoratu duenez, Osoko Bilkura horretan, Otxandianok “inor ez dagoela ez minduta ez gaixorik esan zigun eta proiektuak osasun ezin hobea zuela”, baina “hori guztiz zalantzan dago”, 2020ko urtarrilean Bizkaia Dorreko ekintzailetza nazioarteko zentroak “kudeatzailerik ez duela jakinda gero, Beaz-en lehiaketa publikoak ez duelako eskaintza bat bera bez jaso”.

Ildo horretan, esan duenez, egun batzuk beranduago, Bizkaiko Foru Aldundiak “proiektua salbatzeko baldintzak murriztuko dituela esan zuen eta publizitatearekin prozedimendu negoziatu irekia egingo dutela, hasieratik zehaztutako baldintza-agiri barik eta Foru Aldundiak interesatuekin hitz egingo duela”. Gorizelaiaren ustez, “hori ez da inondik inora praktika egokia, izan ere, enpresak izango dira baldintzak jarriko dituztenak”.

“Otxandianok horri buruzko informazio argirik ez digu eman, ez dakigu bi erakundeen arteko koordinazio falta dagoen edo zergatik izango den, baina argi dago zentro horren kudeaketa oso desegokia izan dela, etxea teilatutik hasi dutela eta gardentasun eza nabaria izan da”, kritikatu du.

Goirizelaiak azaldu duenez, Otxandianok bai aitortu du aldaketa berri horren ondorioz “gastua handiagoa izango dela bilbotarrontzat ez aurten, baina bai hurrengo urteetan, eta EH Bilduren ustez badaude beharrizanak dirua inbertitzeko, besteak beste, enplegua sustatzeko plangintzak”.

“Zentzugabekeria bat bestearen atzetik, lehenengo gauza bat esan eta hurrengo egunean aldatu eta, bitartean, ikono bihurtzeko xedea zuen zentro horik ez da ez ikono ez ezer, martxan ere ez baitago oraindik, joan den neguan martxan egotea aurreikusita zegoenean”, salatu du. Ildo horretan, azpimarratu duenez, EH Bilduk jarraipen zehatza egingo du “ustezko kudeatzaileak pozik egiteko eskaintzen diren baldintzak zeintzuk diren ikusteko”.

 

EH Bildu Bilbo: “Segurtasun itunean pausoak ematen ari diren arren, eskasak dira eta atzerapenarekin datoz”

| 2020-02-14 13:01:00

Asier Gonzalezek, EH Bildu Bilboko zinegotziak, adierazi duenez, Segurtasun  Itunean jasotako 35 neurriak martxan jartzeko “pausoak ematen ari diren arren” horiek “eskasak dira eta atzerapenarekin datoz; izan ere, ituna 2018. urtean sinatu genuen eta neurri horiek jadanik ezarrita egon beharko lirateke, gertuko polizia eredu bat lortzeko helburuarekin, EH Bilduk defendatzen dugun moduan”.

Gonzalezek adierazpen horiek egin ditu atzo Segurtasun Itunaren batzarrean parte hartu ondoren. Horretan, Juan Mari Aburtok, Bilboko alkateak, segurtasun itunaren betetze mailari buruzko informazioa eman zuen eta segurtasunari buruz bilbotarrek duten iritziari buruzko inkesten emaitzak aurkeztu zituen.

Segurtasun faltaren iritziari buruz, EH Bilduko zinegotziak esan duenez, “ikusten dugu herritarren segurtasun ezaren sentsazio falta igo egin dela, %27ra, hain zuzen ere, baina, aldi berean poliziaren presentziaren sentsazioa igo egin da ere bai”.

“Horrek honakoa adierazten du: kalean polizia gehiago egoteak ez du segurtasun sentsazioa areagotzen, EH Bilduk aspaldi esaten ari garen moduan. Gakoa poliziaren eredua da eta horrek argi uzten du hurbiltasun poliziaren eredua behar dugula, auzoetan eta herritarrekin gertua”, azpimarratu du.

Helburu hori lortzeko xedearekin, Gonzalezek esan duenez, atzoko batzarrean auzoetan tailerrak martxan jarri direla jakinarazi zuten. Bere esanetan, tailer horiek hurbileko polizia lortzeko “estrategikoak” dira eta horregatik orain horien “garapena eta emaitzak zeintzuk diren ikusi behar ditugu. Etorkizunerako apustu garrantzitsua da, eta horregatik jarraipen zehatza egingo dugu”, gaineratu du.   

Era berean, adierazi duenez, biolentzia matxistaren biktimei zuzendutako arreta unitatea sortzeko perfilak egiten ari direla jakinarazi zuten atzoko bileran. “EH Bilduren eskaera bat da, eta nahiz eta berandu heldu, ezinbesteko neurria da. Orain espero dugu lan hori ahalik eta arinen egitea biolentzia matxistaren biktimekin zuzendutako arreta unitatea beharrizan bat delako”, nabarmendu du.

Itunean jasotako beste neurri bat da edozein motatako ekimen jendetsuei zuzendutako protokolo berriak ezartzea. “Ez da ezer edo ia ezer egin”, kritikatu du Gonzalezek, Eurokoparen bezperatan gaudela gogoratuz. “Ulertezina”, esan du.

Azkenik, Asier Gonzalez EH Bilduk neurri guzti horien jarraipen zuzena egingo duela adierazi du, “horien ezarpena oso garrantzitsua delako hurbileko benetako polizia bat lortzeko, prebentzioa egiten duena, genero ikuspegiarekin eta eskubideei buruzko formazioarekin”.

“Udal Gobernuak proposatutako HAPOa merkatu eta interes pribatuen menpe dago eta ez ditu bilbotarren beharrizanak asetzen”

EH Bildu Bilbok alokairuzko etxebizitza publikoa defendatzen du, aldiz, Udal Gobernuak HAPOan etxebizitza librearen aldeko apustu argia egiten du

| 2020-01-29 11:52:00

EH Bildu Bilboko kideok urtarrilaren 30eko greba orokorrarekin bat egiten dugu, arrazoi nahiko ditugulako Bilbon grebarako. Bilboko alkateari, Juan Mari Aburtori, data aldatzeko eskatu genion beste leku batzuetan, adibidez Donostian, egin duten bezala. Baina Aburtok ezetz esan digu. Hori dela eta, gure mozioak erretiratu ditugu eta soilik HAPOaren eztabaidara joango gara bihar; izan ere, herritarren eta elkarteen alegazioak eztabaidatzen dira eta HAPOak gure hiriko urigintzaren eredua ezezik, eredu sozio-ekonomikoa baldintzatuko du epe luzean.

Nahiz eta HAPOa egiten ari zirenean hainbat itxaropen sorrarazi zituzten, lurreratzen joan den heinean, argi gelditu da ez duela inolako aldaketarik ekarriko eta, horregatik, hiri eredu berri bat lortzeko geneukan ilusioa guztiz itzali du. Proposatzen diguten HAPOak beti egin duten apustua sakontzen du, hau da, berriro ere merkatuaren, eleizaren eta interes pribatuen menpe dago, gainera, badirudi eliza higiezin-sustatzailea bihurtu dela. Aldiz, ez ditu gure auzoetako bizilagunen beharrizanak asetzen, etxebizitza eta ekipamendu publikoen eta gune berdeen beharrizanak, alegia. 

Zertaz hitz egiten ari gara? Udal Gobernuaren apustua etxebizitza berri gune handiak sortzea da, birgaiketaren alde edo leheneratzeko dauden zonaldeetan etxebizitzaren aldeko apustua egin beharrean. Zehazki, udal gobernuak hurrengo 25 urtetan 16.409 etxebizitza berri egitea aurreikusten du, biztanleriaren hazkunderik aurreikusten ez denean. Gainera, ez du kontuan hartzen Bilbon, orain dela gutxi egindako udal ikerketa baten arabera, 5.453 etxebizitza huts ditugula, erroldatze barik eta ur eta argiaren kontsumo barik eta merkatura berriro atera daitezkeenak.

Baina milaka etxebizitza horietatik soilik %18ak izango dute babes izaeraren bat, eta horietatik oso gutxi izango dira alokairu sozialerako. %16a tasatuak izango dira, nahiz eta jakin badakigu tasatuen balioa egun merkatuaren baloretik hurbil dagoela. Gainerakoak libreak izango dira.

Udalak Bilbon etxebizitzari buruz egindako ikerketak honakoa adierazten du: bilbotarren %70ak babestutako alokairuzko etxebizitza behar dute. Hala ere, udal gobernuak ez ditu herritarren beharrizanak asetzen, eta etxebizitza librearen eta makro operazioen alde egiten du, dauden espazioak suntsituz eta aukerazko espazio eskasak deseustatuz (Zorrotzaurre, Punta Zorrotza, Elorrieta eta Boluetan, batez ere)

Eredu honek EH Bildu Bilbok defendatzen dugun ereduarekin talka egiten du. EH Bilduk alokairuzko etxebizitza publikoaren aldeko apustua egiten dugu. Gure galdera da, EAJ-PSEk proposatzen duen ereduarekin, non biziko dira Bilboko gazteak eta ez hain gazteak? Kontuan hartu behar da, gainera, bilbotar askok lan prekarioak dituztela. Politika hauekin bilbotar asko Bilbotik kanpo joatera kondenatzen dituzte, izan ere, Bilbon ezin dute etxebizitza bat eskuratu.  

95. urteko plangintzarekin gertatu zen bezala, egungo HAPOak hiriko erdigune eta auzoen arteko ezberdintasunak areagotzen ditu.

Biharko Osoko Bilkuran 265 alegazioekin eta 21 sektore-txostenekin talde erredaktoreak egindako txostena  eztabaidatuko da. Udal Gobernuak proposamen pribatu, enpresa eta elizaren proposamen gehienak onartzen ditu. Aldiz, auzokideen edota kultur eta elkarte sozialen proposamen gehienak bertan behera uzten ditu, hau da, auzoen beharrizanak asetzea eskatzen duten alegazio gehienak deuseztatzen ditu. Lotsagarria eta onartezina da.

Bestalde, espazio libreari dagokionez, plangintzak mendi-hegalean eremu handiak ditu Pagasarri mendian Peñaskalen edo Artxandan tunelen gainean, hiri parkeak izango balira bezala. Hori guztia biztanleko metro karratu berdearen ratioak betetzen dituztela esateko. Baina oso zaila da legea betetzea Bilbok dituen hiri espazio libreekin.

Aldaketa klimatikoari aurre egiteari buruz eta Bilbo jasangarriak duen garrantziari buruz asko hitz egiten da. Baina errealitatea bestelakoa da. Bilbon Pagasarri soilik dugu aisialdiko gune librea eta oso erabilia dago. Gainera hemen daukagu Zabalgarbi, Super Sur-aren handitzea eta harrobiak funtzionatzen jarraitzen du. Azken ideia Pagasarri zementatzea izan da, inoren iritzia kontua hartu barik. Bitartean Iparreko mendi-hegalerako ez dago proposamenik. Udal gobernuak ez du espazio berdeak berreskuratzearen aldeko inolako apusturik egiten.

Bilbok eraldaketa handia izan du, horregatik, orain auzoei merezi duten protagonismoa emateko garaia zela pentsatzen genuen eta pentsatzen dugu,  auzoetan espazio berdeak,  kultur eta kirol ekipamenduak eta alokairuzko etxebizitza sozialak jartzeko garaia eta auzotarren eskaerei erantzuteko garaia, hain zuzen ere. Hori da EH Bilduren apustua baina, ez, ordea, udal gobernuarena, beste behin ere enpresen eta elizaren interesak defendatzen ditu eta auzoen eta herritarren  aldarrikapen eta zor historikoei erantzuteko aukera aukera ederra galdu du.

 

 

 

 

EH Bildu Bilbok urtarrilaren 30eko greba orokorrarekin bat egiten du, erabaki politikoen erdigunean bizitzak jartzeko

| 2020-01-24 10:42:00

EH Bildu Bilbo udal taldeak urtarrilaren 30ean Euskal Herriko Eskubide Sozialen Kartak deitutako greba orokorrarekin bat egiten du “erabaki politikoen erdigunean bizitzak jartzeko eta hauek ez egoteko elite ekonomikoen interesen menpe”. Jone Goirizelaiak, EH Bilduko Bilboko bozeramaleak azaldu duenez,  “bilbotarrok arrazoi asko dauzkagu greba egiteko”.

 

“Bilbon 2019ko urrian erroldatutako 345.821 pertsonako 22.671 langabe zeuden, populazioaren % 13,38, hain zuzen ere, eta 3.451 dira langabezian dauden gazteak. Azken hamar urteetan pobrezia erreala Bilbon 7,6tik 10,1 puntura pasa da, ia hiru puntu handituz, eta ongizate errealaren falta 13,8tik 18,5era igo da, hots, bost puntu”, adierazi du. Bitartean, gaineratu duenez, “hileroko alokairua Bilboko hiru gelako etxebizitza batean 900 eta 1.200 euroren artekoa da eta batezbesteko errenta urteko 27.627,3 eurokoa”.

 

Horrez gain, EH Bildu Bilboko bozeramaleak adierazi duenez, grebarako arrazoiak argi gelditzen dira “Bilboko mugimendu feministaren aldarrikapenetan eta eraso matxistak salatzeko egiten dituzten kontzentrazioetan, baita ere udaleko azpikontratetako langileen mobilizazioetan, lan eskubide duinen alde.”

 

Era berean, Goirizelaiak gogoratu duenez, pentsiodunek bi urte daramatzate astelehenero mobilizazioak egiten Bilboko Udaletxe aurrean, “greba orokorra egitea ezinbestekoa da pentsio sistema publikoa defendatzeko, lan harremanetarako eta babes sozialerako sistema propioa lortzeko, 1.080 euroko gutxieneko edota eros-ahalmena legez bermatzeko”.

 

Horregatik guztiagatik, EH Bildu Bilbo bozeramalearen esanetan, “eskubide sozialak aldarrikatu behar ditugu, zerbitzu sozialean sistema publiko, unibertsal eta doakoa, hain zuzen ere”. “Hori lortzeko mobilizazioa ezinbestekoa da eta horregatik EH Bildu Bilboko udal taldeak greba orokorrarekin bat egiten du”, azpimarratu du.

 

Osoko Bilkura

Jone Goirizelaiak adierazi duenez, urtarrilaren 30ean, greba orokorraren egunean, Bilboko Udalean Osoko Bilkura deituta dago eta, horregatik, EH Bilduk Bilboko alkateari, Juan Mari Aburtori, data aldatzea eskatu zion.  

“Nahiz eta beste toki batzuetan Osoko Bilkuraren data aldatu duten greba eskubidea errespetatzeko, Bilbon Aburtok eskaera ez du onartu; izan ere, Aburtok bizkarra ematen die greba orokorrean Bilboko hiritarrek egiten dituzten aldarrikapenei”, kritikatu du EH Bildu Bilbo udal taldeko bozeramaleak.

Goirizelaiaren esanetan, “Osoko Bilkuraren data egun bat aurreratzeak edo atzeratzeak ez luke inolako eragozpenik sortuko; esate baterako, Donostiako Udalean, EH Bilduko udal taldeak eskatuta, gainerako udal taldeek onartu dute eta urtarrilaren 30erako deituta zuten Osoko Bilkuraren data aldatu dute; baina Aburtok berriro ere bere izaera autoritarioa agertu digu eta argi utzi digu ez duela inolako borondate politikorik greba eskubidearen alde egiteko”.

Hori dela eta, EH Bildu Bilbo udal taldeko zinegotziak Osoko Bilkurarako aurreikusita zituen gaiak erretiratuko ditu eta puntu bakar baten eztabaidan egongo direla aurreratu du Goirizelaiak, HAPOren eztabaidan, hain zuzen ere.

“Puntu honetan beharrezkoa deritzogu Osoko Bilkuran egotea, gai guztiak garrantzitsuak izanik, gainerakoak beste Osoko Bilkura batzuetara eraman ditzakegu, baina HAPOren kasuan,  epe luzean Bilboko hiri eredua baldintzatuko duen plangintzaz ari gara eta urtarrilaren 30eko Osoko Bilkuran herritarrek eta elkarteek aurkeztutako alegazioak eztabaidatuko dira”, azaldu du EH Bildu Bilbo taldeko bozeramaleak.

Hortaz, EH Bildu Bilbok urtarrilaren 30eko greba orokorrarekin bat egingo du eta Osoko Bilkurako puntu bakarraren eztabaidara joango da, “zoritxarrez, Aburtok, data aldatu nahi izan ez duelako”.

ALBISTEAK

EH Bilduk azalpenak eskatu ditu BAM Magisteritza eskola eraisteko baimena berehala ematearen inguruan

2021-03-17 12:02:00

Abaunza, Narbaiza eta Gilen agerraldia eskatu du, hirigintzaren eremuaz gain, hezkuntzaren eta osasunaren esparruari eragiten dion gaia delako

EH Bilduk eskatu du Bilbok agroekologian eta elikadura-subiranotasunean oinarritutako elikadura-estrategia bat ezar dezala

2020-08-06 11:33:00

Lehen urrats gisa, Bilbo "Agroekologiaren aldeko Hirien Sarean" sar dadila eskatu du, tokiko elikadura-sistemak eraikitzeko