AKTUALITATEA

| 2026-06-25 16:55:00

EH Bilduren ekimenez, Udal Gobernuak konpromisoa hartu du LGTBIQ+ ikuspegia gizarte-baliabideetan txertatzeko, batez ere adinekoei zuzendutako gizarte baliabideetan eta, bereziki, intentsitate handieneko arreta eskatzen dutenetan. Horretarako, tratu-berdintasunaren, diskriminaziorik ezaren eta LGTBIQ+ pertsonen eskubideen arloko  informazio- eta prestakuntza-ekintzak garatuko ditu, udal-langileentzat eta elkarte-sarearentzat.

Era berean, aipatutako prestakuntza- eta sentsibilizazio-ekintzak gizarte-zerbitzuei atxikitako langileen eskura jartzeko eskatzen du. Baita ere Udalak zuzenean edo zeharka itundutako edo finantzatutako zentro eta zerbitzuen erakunde kudeatzaileek, hurrengo hitzarmen edo lizitazioetan, gai hori euren prestakuntza- eta trebakuntza-planetan txerta dezaten sustatzea ere.

Akordio hori gobernu taldearen eta EH Bilduren artean transakzionatutako zuzenketa bat onartu ostean lortu da, alderdi soberanistak egindako proposamen baten ondorioz. Maria del Rio bozeramailearen ustez, akordioa pertsona nagusien askatasun sexuala bermatzeko  "urrats garrantzitsua" da, baina "beste pauso asko eman beharko dira LGTBIQ+ adineko pertsonen bizitzak kontuan hartzeko".

Ekainaren 28an LGTBIQ+ pertsonen eskubideen nazioarteko eguna ospatzen denean, Del Riok azaldu du EH Bilduren proposamenaren helburua dela, "gizarte zerbitzuetan erabiltzaileen heteronormatibitate presuntzio arriskutsu batean erortzea saihestea, arrisku hori bereziki esanguratsua baita adinekoen kasuan".

Horregatik, bere ustez, "beharrezko ahaleginak egin behar ditugu gure gizarte-zerbitzuetara jotzen dutenei berriro armairura itzultzea galarazteko". "Kontuan izan behar da, gainera, adinagatik pertsona horiek errepresio handiko garaiak bizi izan dituztela, eta sexu-orientazioa edo genero-identitatea ezkutatu behar izan dutela. Horregatik, ez da bakarrik bere duintasunarekiko errespetuagatik beharrezkoa den ariketa bat. Gizarte gisa dugun zor historikoa ere bada", nabarmendu du.

Del Riok nabarmendu du "funtsezkoa" dela gizarte-zerbitzuek eskaintzen dituzten zentro eta zerbitzuetan LGTBIQ+ pertsonak modu aktiboan sartzea, eta "espazio seguru gisa identifikatu ahal izatea lortzea". "Estereotipoak desmuntatuz, hori kudeatzen duten profesionalen edo zerbitzuaren beste erabiltzaile batzuen diskriminazio-ekintzak prebenituz, diskriminazio-ekintzei helduz, baita LGTBIQ+ errealitateari buruzko entretenimendu-jarduerak txertatuz edo LGTBIQ+ erreferenteengan pentsatuz", azaldu du.

Esan duenez, "funtsezkoa da norberak nahi duen bizi-proiektua amaierara arte garatu ahal izateko baldintzak ezartzea, hori harrotasuna da". "Adineko LGTBIQ+ pertsonak ezin dira klandestinitatera itzuli", azpimarratu du, eta beren eskubideak eta behar espezifikoak kontuan hartuko dituen zaintza sistema aldarrikatu du.

"Erantzukizun instituzionala eskatzen dugu, eskubideen bermea ez dadila soilik borondate edo sentsibilitate kontua izan. Gaur eman dugun pausoa positiboa dela uste dugu, baina askoz haratago joan behar da", gaineratu du.