AKTUALITATEA

| 2025-04-02 11:08:00

Monopoly jolas ezagunean oinarrituta martxan jarritako dinamika mobilizatzailearen bidez, etxebizitza eskubidea aldarrikatu du gaur EH Bilduk Bilbon, etxebizitza jolasa ez dela adierazteko. Edurne Benito del Valle legebiltzarkideak eta Maria del Rio udal bozeramaileak parte hartu dute Arriaga plazan egindako ekimenean. Dinamika hau Donostian hasi eta Euskal Herriko udalerri ezberdinetan egingo da.

Benito del Valleren hitzetan, EH Bildurentzat etxebizitza eskubidea bermatzea “lehen mailako lehentasuna” da eta “horrela erakusten dute gure alkate eta udalek euren egunerokoan". Bere esanetan, “batzuk oraindik konturatu ez diren arren, arazoa oso handia da eta makillaje-politikek ez dute balio". "Promotoreei, espekulatzaileei edo funts putreei bakarrik mesede egiten dieten etxebizitza-politika zaharrak berriak bezala aurkezteak ez du balio, politika horiek oinarrizko eskubide baten kontura negozioa egiten jarraitzen baitute", azpimarratu du.

Bestalde, Del Riok adierazi du Bilbo, “zoritxarrez, etxebizitza larrialdiaren adibide bilakatu dela”. “Hileko batez besteko alokairu-prezioa 1.134 eurokoa da, eta prezio jasangaitz horien ondorioz Bilbo da biztanle gehien kanporatzen duen euskal hiria: etxez aldatu behar izan dutenen % 34,1 beste udalerri batera joan da", adierazi du.

Gaineratu duenez, "Etxebiden etxebizitza bat eskatzen duten pertsonen kopurua gehiengo historikoetan dago: 21.328 pertsona. Bien bitartean, etxebizitzen parke publikoaren kopurua oso txikia da". Halaber, zehaztu du Bilbok gaur egun 9.231 etxebizitza huts dituela, alokairuko etxebizitza publikoen kopurua gaindituz.

Etxebizitza eta gela turistikoen kopuruak ere gora egin duela aipatu du, %757 azken sei urteetan, eta 2024an 5.201 turismo-plaza izatera iritsi da.

“Argi dago erakundeek bidea libre utzi dietela etxebizitzarekin negozioa egin nahi dutenei, eta horren aurrean, eskura ditugun tresna juridiko, ekonomiko eta politiko guztiak baliatzea ezinbestekoa da”, nabarmendu du.

Ildo horretan honako neurriak proposatu ditu Maria Del Riok: Babes Publikoko Etxebizitza berriak sustatu eta alokairura bideratzea; etxebizitza hutsen jabeei etxebizitza kanona ezartzea, horiek alokairu merkatura bideratzeko (Azpeitian hasitako bidea jarraituz); eta Bilbo, behingoz, tentsio eremu izendatzea, horren bidez, alokairuaren prezioak mugatzeko.

“Guk lanean jarraituko dugu etxebizitza eskubidea behingoz bermatzeko, EH Bildu ongizaterako bermea delako. Beste batzuek etxebizitza eskubidearekin jolasten jarraitzen duten bitartean, EH Bilduk lanean jarraituko du arazo honi irtenbide erreal eta eraginkorrak bilatzeko”, azpimarratu dute Benito del Vallek eta Del Riok.