AKTUALITATEA

| 2025-11-18 15:39:00

Karlos Renedo EH Bilduko zinegotziak zalantzan jarri du Martzanako kaian terrazen inguruan Espazio Publikoko Zuzendaritzak egindako kudeaketa. Halaber, "gardentasun falta" azpimarratu du, aipatutako Zuzendaritzak "horri buruz eskatutako informazioa emateari uko egin diolako". 

Asier Abaunza Hiri Plangintzako, Proiektu Estrategikoetako eta Espazio Publikoko zinegotziak agerraldia egin du gaur, EH Bilduk Asier Lopez Espazio Publikoko zuzendariaren agerraldia eskatu ostean. "Aldiz, Asier Lopezek ez du hitza hartu, nahiz eta berari galdera zuzenak egin", gaineratu du. 

Renedok gogorarazi du EH Bilduk espedientea ikusteko eskaera egin ondoren, hiru aldiz joan direla espazio publikora, eta bertan "informazioa ezkutatu digute, gure ustez modu kontzientean, mesfidantza handia sortuz eta gure kontrol lana eragotziz". "Oso larria da" esan du.

EH Bilduko zinegotziak hainbat hipotesi aipatu ditu, besteak beste, Kostasen txostenak betetzen ez zirela jakinda ere, Martzanako terrazen lizentziak eman izana. 

Ildo horretan, azaldu du 2017an Itsasertzetako Zuzendaritzak Erriberako merkatuko terraza 6 metro kentzea agindu zuela, eta aldaketa egin zela, hirian dagoen lehen aurrekaria izanik. Gaineratu duenez, 2023ko azaroan Martzanako tabernek itzalkinak eta manparak jartzeko baimena eskatu zuten, eta 2024ko martxoan, Kostaseko Zuzendaritzak jakinarazi zuen hori ezinezkoa zela, ezta mugikorrak izanda ere, erabilera publikorako sei metro libre egon behar zirelako. 

Ildo horretan, zehaztu du 2025eko otsailean, Kostasek arduradunak bizilagunei jakinarazi ziela udalarekin terrazak lekuz aldatzeko eta fatxadan itsasteko aukera aztertzen ari zela. "2025eko apirilean, ostalariak egoeraren jakitun ziren", gaineratu du. 

Horrela, EH Bilduko udal taldeak 2025eko urriaren 10ean espedientea eskatu zuen, 2021az geroztik Martzana kaian emandako baimen guztiak ikusteko, Kostasen txostenaren inguruan jakitun zenean. Renedok zehaztu duenez, espedientea ikustera joan zenean, Espazio Publikoko zuzendariak, birritan, "Kostaseri buruz ezer ez zekiela esan zuen". 

EH Bilduko zinegotziak azaldu duenez, 2025eko urriaren 28an Kostasek bigarren ebazpen bat bidali zuen terraza guztiak 10 egunetan kentzeko. "Urriaren 30ean, Espazio Publiko arloko zinegotziak prentsa-ohar baten bidez iragarri zuen terrazak kenduko zituela, baina ez zion interesdunari ezer jakinarazi, ezta entzunaldirik jaso ere", nabarmendu du.

Galderak

Gertakarien berri eman ondoren, Renedok galdetu du: "Zergatik jarraitu dute baimenak ematen araudia betetzen ez zela jakinda? Zergatik handitu dira terrazak? Zergatik egin zen prentsa-ohar bat baimenduei egoeraren berri eman aurretik? Espazio Publikoko Arloak zergatik esan zigun urriaren 28a baino aurretik gatazka honen berririk ez zuela?".

"Ez dira gai izan galdera horiei guztiei erantzun koherente bat emateko. Horren ordez, 'gehiegikeria' deitu diote gure kontrol politikorako informazioa eskatzeari. Horrek agerian uzten du Martzanako terrazen kudeaketa iluna eta zalantzagarria izan dela, eragindako pertsona guztiak kaltetuz", amaitu du.