AKTUALITATEA

| 2024-10-21 08:26:00

Patxi Xabier Fernandez Monjek, Bilboko Udaleko EH Bilduko zinegotziak, adierazi duenez, badirudi Eusko Jaurlaritzak metroaren 4. linearen konexioa Abandotik egitearen apustua berresten duela, Moyuatik egin beharrean, Hegoaldeko auzoetako bizilagunek eskatzen duten bezala, Moyua ikuspegi teknikotik zein epeei dagokienez aukerarik gauzagarriena baita. Fernandezek adierazpen hauek egin ditu alderdi soberanistak Legebiltzarrean egindako galderen erantzunen ondorioz.

Fernandezek gogorarazi duenez, joan den irailean, EH Bilduk Legebiltzarrean egindako galderen erantzunen ondorioz, "jakin genuen Bilboko metropoli-trenbidearen 4.linearen proiektuaren idazketak gutxienez urtebeteko atzerapena izango zuela". "Hori albiste txar bat izan zen hegoaldeko bizilagunentzat, urte asko baitaramatzate proiektu hau errealitate bihurtzearen zain", adierazi du.

Oraingoan ere, EH Bilduren galderei erantzunez, Eusko Jaurlaritzak, zehazki Susana García Chueca Mugikortasuneko sailburuak, honakoa adierazi du: "eraikuntza-proiektua, obrak eta tartearen funtzionamendua Bilbon aurreikusitako abiadura handiko geltokia eraikitzearen eta zerbitzuan jartzearen menpe daude". "Hori dela eta, luzapen bat onartu da Adif egiten ari den proiektua sakon ezagutzeko eta metroaren linea terminalean nola txertatu jakiteko", gaineratzen du.

Fernandezen arabera, erantzun honekin, "Eusko Jaurlaritzak metroaren 4. linearen konexioa Abandotik egitearen aldeko apustua berresten duela dirudi, proiektu hori hipotekatuz, AHTren etorrerarekin lotuta, eremu horretan egingo den operazioarekin baldintzatzen baitu".

Hala ere, Xabier Fernandezek azaldu duenez, "beste erakunde batzuetan, hala nola Bizkaiko Batzar Nagusietako Osoko Bilkuran, Diputatu Nagusiak berak jada agerian utzi zuen trazadura hori aldatzea baloratzen ari zirela, berariaz Moyuaraino joatea aipatu gabe". "Informazio hori helarazi da hainbat alderdi politikorekin izandako bilera informaletan", gaineratu du.

Zinegotziak ziurtatu duenez, EH Bilduk "lanean jarraituko du ahalik eta gardentasun eta informazio gehien lortzeko, Hegoaldeko auzoetako bizilagunen beharrak eta proposamenak errespetatuak izan daitezen, eta Metro Bilbaoko 4. linea bezalako proiektu estrategikoaren trazadura lehenbailehen argitzeko proiektuak aurrera egin dezan".

"Abando eta ez Moyua aukeratzea, herritarrek eskatzen duten bezala, Bilboko hegoaldean bizi diren 70.000 pertsona baino gehiagori bizkarra ematea da, eta horiek, adibidez, ospitalera joateko ordu bakoitzean autobus bakarra dutela gogorarazi behar da", adierazi du EH Bilduko zinegotziak. "Ezin dugu atzerapen gehiago onartu. Lidergoa, borondate politikoa eta gauzatzeko konpromisoa behar ditugu; bestela, hegoaldeko auzoetarako hain beharrezkoa den proiektu honek bertan behera gelditzeko arriskua du", adierazi du.