AKTUALITATEA

| 2026-03-12 15:01:00

Maria del Riok, EH Bilduren udal bozeramaileak, itsasadarra eta bere ingurua suspertzeko eta dinamizatzeko lanetan "erakunde publikoak protagonista izatea" eskatu du, eta "ez esku pribatuetan uztea". Hala, gaur Udal Gobernuak aurkeztutako Itsasadarraren Estrategiaren barne kokatutako plan berezia aipatu du.

Lehen balorazio batean, Del Riok nabarmendu du planaren helburu nagusia "itsasadarra berreskuratzea eta birnaturalizatzea izan beharko litzatekeela, betiere biodibertsitatea mantentzen eta bultzatzen duen ikuspuntu ekologiko batetik, baina baita hiri erresiliente bat eraikitzeko funtsezko elementu gisa ere".

Ildo horretan, nabarmendu duenez, "ezinbestekoa da sektore publikoak itsasadarraren inguruetan erabilera komunitarioa erraztea". "Garrantzitsua da herritarrek erabiltzeko pantalan publikoak izatea, eta bere erabilera publikoa errazteko elementu osagarriak ere jarri behar dira", azaldu du.

Horren harira, "gehienbat pribatuak diren pantalanak eta jarduerak proposatzeak itsasadarra pribatizatzea dakarrela" ohartarazi du. "Itsasadarra hiriaren ardatz naturala da, eta hiri erresiliente bat eraikitzeko aprobetxatu behar dugu, ez ekonomikoki ustiatzeko", nabarmendu du.

Parte-hartzea

Azkenik, Del Riok gobernu taldeari gogorarazi dio elkarlaneko gobernantza ez dela soilik erakunde ezberdinen artean gertatzen dena. "Benetan gobernantza kolaboratiboa bermatu nahi badugu, beharrezkoa da herritarrek parte hartzeko espazioak planteatzea, eta hori ez da aurreikusten", adierazi du.

"Ezin dira proiektuak herritarrei bizkarra emanda eraiki, itsasadarrari dagozkion erabakietan bizilagunek parte hartu ahal izatea eskatzen dugu, eta Gobernuak horretarako bideak jartzea", gaineratu du.

Bilbon, 2026ko martxoaren 12an.