AKTUALITATEA

| 2022-07-21 15:22:00

EH Bilduk kritikatu duenez, Bilboko udal etxebizitzen esleipen programa berriak “desberdintasunetan sakontzen du eta esleipen sistema okertzen du, Bilbon etxebizitza bat behar duten pertsonen artean desoreka sortuz”.

Alba Fatuarte EH Bilduko zinegotziak Bilboko Udal Etxebizitzak aurkeztutako programa berria izan du hizpide. Horren bidez, errenta sozialeko 50 etxebizitza esleitu nahi zaizkie erreformatzeko prest daudenei. EH Bilduk horren aurka bozkatu zuen zuzendaritza kontseiluan.

Fatuartek azaldu duenez, programa 21.000 eurotik gorako errentak dituzten pertsonei zuzenduta dago, eta hori ez dator bat eskatzaile gehienen ezaugarriekin; izan ere, udal-etxebizitzetan izena emanda duten ia 10.000 pertsonetatik % 10ak baino gutxiagok aitortzen du errenta hori. Halaber, esleipen-sistema aldatzen dela gaineratu du, lehentasunezko arretako kolektiboei eraginez (genero-indarkeriaren biktimak, desgaitasun fisikoa duten pertsonak, guraso bakarreko familiak, 35 urtetik beherakoak, 70 urtetik gorakoak, etab.).

“Programa horrek udal-etxebizitzak esleitzeko sistema okertzen eta aldatzen du, errenta altuenak dituzten pertsonei mesede eginez eta Bilboko udal-etxebizitza baten zain dauden pertsona askori kalte eginez”, adierazi du.

Esan duenez, programa hori “hausnarketarik eta aldez aurreko eztabaidarik gabe jarri da abian, eta badirudi helburua udal-etxebizitzen parkearen mantentze-lanak finantzatzea dela, berezko aurrekonturik ezean”.

Ildo horretan, gogoratu duenez, EH Bilduk beti aurkezten dizkio zuzenketak udal aurrekontuen proiektuari, udal etxebizitzetarako partida nabarmen handitzeko. «Beti baztertu izan dituzte gure proposamenak, eta orain 50 etxebizitza atera nahi dituzte, erreforma ordain dezakeenari esleituz, ondoren diruz laguntzeko, eta udal etxebizitzak esleitzeko zerrendetako irizpideak hautsiz», salatu du.

Fatuartek adierazi duenez, programa hori abian jarri beharrean, udal gobernuak, 2023ko aurrekontuei begira, “beharrezko partida bideratu beharko luke 50 udal-etxebizitzak baldintza onetan jartzeko eta behar bezala esleitzeko”.

EH Bilduk dei egin dio Udal Etxebizitzen arloko arduradunari “hausnarketa sakona egin dezan, programa hori bertan behera utz dezan eta Bilbon udal-etxebizitza bat behar duten pertsonen artean desberdintasunik sor ez dezan”. “Udal etxebizitzak ez dira higiezinen agentzia, zerbitzu publikoa baizik”, nabarmendu du.