AKTUALITATEA

| 2024-09-18 10:01:00

EH Bildu udal taldeak hainbat proposamen eta alegazio egingo ditu Bilbaobizi bizikleta mailegua arautzen duen araudia eta ordenantza hobetzeko eta baita ere zerbitzua hobetzeko. Ildo horretan, besteak beste, honako hauek eskatuko ditu: kreditu-txartelarekin zerbitzua ordaintzeko derrigortasuna kentzea eta Barik txartelaren bidez ordaindu ahal izatea; muga-prezio bat ezartzea; urteko egun guztietan 24 orduko ordutegia berreskuratzea; zerbitzua gaur egun ez duten auzoetara zabaltzea; eta zigor sistema arautua ezartzea.

Karlos Renedo EH Bilduko zinegotziak gaur iragarri ditu proposamen horiek, Bilbaobiziko araudia eta ordenantza arautzailea batzordean aurkeztu ostean. Horrela, EH Bilduk egingo dituen hobekuntza-proposamenak zehaztu ditu.

Lehenik eta behin, "onartezintzat" jo du zerbitzu publiko bat kreditu-txartel baten bidez nahitaez ordaindu behar izatea. Haren ustez, "zerbitzu hori ordaintzeko modurik onena Barik txartela izango litzateke, eta, horrela, intermodalitatea ere sustatuko litzateke, baina, halakorik ezean, ordainketa aurrez ordaintzeko txartel baten edo beste edozein modalitateren bidez egiteko beste modu bat ezarri beharko litzateke. Renedok iragarri du alegazioen bidez egingo dutela eskaera hori.

Alegazioetan planteatuko duten beste gaietako bat muga-prezio bat ezartzea izango da, "zerbitzua maiz erabiltzen duten erabiltzaileak ez zigortzeko helburuarekin". Aitzitik, proposatzen den ordainketa-sistema berriaren arabera, zenbateko finko bat ordaintzeaz gain, joan-etorri bakoitzeko aparteko bat kobratuko da. Renedoren ustez, "helburua garraio iraunkorra sustatzea izan behar da, eta ez diru-bilketa".

Era berean, 24 orduko ordutegia urteko egun guztietan berreskuratzea planteatu du EH Bilduk. Renedoren esanetan, “ez dago aitzakiarik” zerbitzua gauez ez eskaintzeko, Bilbaobizi erabiltzen dutenek eskatzen duten bezala. “Bandalismoa saihestea helburua bada,  beste neurri batzuk daude, hala nola ainguraketen segurtasuna indartzea, baina inondik inora zerbitzu publikoa mugatzea eraginkorrak ez diren neurriekin”, gaineratu du.

Halaber, zigor-sistema arautua ezartzea eskatuko dute, gaur egun erabiltzaileak zigorraren jakinarazpenik jasotzen ez duelako: "Ezinbestekoa da zigorraren arrazoia eta edukia erabiltzaileei jakinaraztea, eta alegazioak aurkezteko epe bat ezartzea, are gehiago zerbitzu horretan aplikazioak akatsak eman dituelako eta hemendik aurrera akats horiek bidegabeko kobrantzak eragin ditzaketelako", adierazi du.

Eztabaida honek Bilbaobiziren zerbitzua bere osotasunean hobetzeko aukera ematen duela aprobetxatuz, Renedok iragarri du EH Bilduk mailegu-guneak gaur egun zerbitzu hori ez duten lekuetara zabaltzea proposatuko duela eta baita eskatzen ari direnetan indartzea ere, hala nola, Solokoetxe, Bilbi, Buia, Elorrieta, Doneperiaga, San Adrian, Miribilla, Begoña eta Zurbaranbarri, besteak beste.

Azkenik, EH Bilduko zinegotziak espero du Mugikortasun eta Jasangarritasun Sailak proposamen horiek kontuan hartzea, “guztion artean, hirian Bilbaobiziren zerbitzua hobetzeko, garraio publikorako ezinbesteko zerbitzua baita Bilbo jasangarriagoa eta gutxiago kutsatzen duena lortzen laguntzeko”.