AKTUALITATEA

| 2022-11-10 17:54:00

Joan den urriaren 21ean jakin genuen Serraltan, Llano eta Lutxana artean, 600 solairu eraikitzeko indusketetan lindano toxiko eta pestizida kantzerigenoaren balizko foku berri bat agertu zela. Auzoan lindanoaren usain kimiko berezia sumatzen hasi ondoren, talde ekologistek jakinarazi zuten balizko foku hau agertu zela. Neurriak hartzen ez badira, lindanoa zabaldu egin daiteke haizearen eraginez, eta data haietan, hainbat egunetan haize zakarra ibili zen. Lutxanako bizilagunak oso kezkatuta agertu dira egun haietako inguruan zegoen usain gogorragatik.

EH Bilduk hainbat galdera erregistratu zituen osoko bilkuran, jakiteko zer karakterizazio (lurzoru bat kutsatuta dagoen ala ez jakiteko ikerketak, gai kutsatzaileen presentzia eta kontzentrazioa aztertuz) egin den lindane-foku berri hori agertu zen eremuan. Gainera, EH Bilduk galdetu zuen zer deskontaminazio ekintza egin ziren, eta enpresak eta udalak berak zer jarduera jarri zituen abian lindano-foku posible horren berri izan zutenetik. Nahiz eta egia den neurriak hartzeko erantzukizuna obrak egiten dituen enpresarena dela, Udalak zaindu beharko zukeen hori bete zedin. Eta emandako erantzunaren arabera, hori ez da egin. Udalak horri buruzko informaziorik ez duela adierazi du, eta horren inguruan duen informazio bakarra dela larrialdi-zerbitzuak bertan agertu zirela. Publikoki, Udalak adierazi du aurkitutako mailak ez direla "arriskutsuak".

Galdera horiek PSEko Juan Antonio Pizarro zinegotzia den Hirigintza Arlora bideratu ziren. Pizarroren sailak bere erantzukizuna saihestu zuen, "urbanizazio-obretako gorabeheren kontrola Udal Azpiegituren (EAJ) eskumena dela" aitzakiatzat hartuta. Gainera, informazio hori eskuratzeko Eusko Jaurlaritzako Ingurumen Sailera jotzeko erantzun zien EH Bilduren galderei. Halaxe egin du EH Bilduk, Mikel Otero legebiltzarkidearen bitartez, galdera horiek eta herritar eta ekologista ordezkariekin egon ostean, galdera horiek eta gehiago erregistratu dituzte Eusko Legebiltzarrean.
Bestalde, erantzun hori jaso ondoren, Udal Azpiegituretako Sailak (EAJ) azalpen bat bidali zuen esanez bere sailak "urbanizazio publikoko obrak kontrolatzeko eskumena baino ez duela" eta Serraltako obrak "titulartasun pribatukoak" direla. Beraz, Serraltako espedientearen “eskumen tekniko zein juridikoa” Hirigintza Arloarena dela.

María Solar udal bozeramailearen bitartez, EH Bilduk deitoratu egin du EAJk eta PSEk gobernu gisa dagokion erantzukizuna ezkutatzea, eta egindako galderei erantzun beharrean, patata beroa elkarri pasatzea, enegarrenez alderdikerian murgilduz. “Jendaurrean dagoeneko onartzen duten bezala, gobernu-taldea izan beharrean, gobernu batean bi talde dira”, amaitu du bere hitzartzea ordezkari subiranistak.

Galderak lindano Barakaldo _ Legebiltzarra