AKTUALITATEA

| 2025-06-09 13:41:00

• Koldo Plazas zinegotziak adierazi du Kultura Arloak ez duela bere hitza bete zerbitzu horren eskaintza handitzen saiatzeko.
• Alderdi ezkertiar eta abertzaleak salatu du eskatzaileen % 55,5 baino gehiago kanpoan geratu direla.
• Plazasek gogorarazi dute aurtengo urtarrilean EH Bilduk aurrekontu proposamen bat erregistratu zuela plazak % 43 handitzeko.

Koldo Plazas zinegotziak Barakaldoko udalekuen eskaintza publikoaren inguruan EH Bilduk egin duen irakurketa plazaratu du.

“EH Bildutik uste dugu Hiri Udalekuak beharrezko zerbitzua dela Barakaldoko familientzat. Ez bakarrik haurren garapenerako eta ongizaterako funtsezko jarduera delako, baizik eta progresibitate printzipio batzuetan oinarritzen delako. Familiaren errentaren arabera ordaintzen delako. Inklusiboak dira, aniztasun funtzionala duten haurrentzat plazak gordetzen direlako nahitaez, laikoak eta publikoak dira. Horrela, guztiontzako zerbitzu irisgarria eta unibertsala izango dela ziurtatzen da.

Aurten, beste behin ere, hiri-udalekuez gozatu nahi zuten adingabeen zati handi bat kanpoan geratu da. Aurtengo otsailean bertan salatu genuen Aste Santuko udalekuetarako eskaintza urria zela (eskaera udalak eskainitakoaren bikoitza izan zen). Orain uda dator eta gertaera berdinak berriz eman dira. 700 plaza 3 eta 11 urte bitarteko 7.000 haur baino gehiagorentzat. 1.575 eskaeretatik 875 kanpoan geratu dira. 3 eta 11 urte bitarteko adingabeen % 10entzat plazak eskaintzen dira, eta % 55.5 baino gehiago kanpoan geratzen da.

EH Bilduk urteak daramatza egoera hau salatzen. Gero eta familia gehiagok aukeratzen dute zerbitzu hori, baina eskainitako plaza kopurua ez da handitzen... (ikusten dugu urtetik urtera gero eta familia gehiagok eskatzen dituztela, eta urtetik urtera gero eta familia gehiago geratzen direla kanpoan). Duela urtebete Udaleko Kultura Arloari plaza kopurua handitzeko eskatu genion, eta hurrengo edizioetan plaza kopurua handitzen saiatuko zirela erantzun ziguten. Bistan da ez dela egin.

Bestalde, aurtengo urtarrilean bertan aurrekontu proposamen bat erregistratu genuen plazak % 43 handitzeko (1.200 plaza). Gure proposamena logikoa, gauzagarria eta eskariaren araberakoa zen. Gobernu Taldeak entzungor egin die gure eskaera guztiei, eta berriro ere errealitate berdinarekin egin dugu topo.

Berriro ere, Udal Gobernuaren kudeaketa salatzen dugu, ezin dugu zozketa baten esku utzi hain beharrezkoa den zerbitzu bat. Behar adina baliabide daude eskaera horri erantzuteko eta ehunka familia Udal Hiri Koloniez gozatu ezinik geratzea saihesteko ”.