EH Bilduk proposatu du Trantsizio Energetikorako Behatokia sortzea, haren garapenean kontrol publiko eta demokratikoa bermatzeko.

EH Bilduren ekarpenetako bat da Klima Araba 2050 Estrategiari

| 2021-07-01 09:42:00

Trantsizio Energetikorako Behatokia sortzea proposatu du EH Bilduk, bere garapenean kontrol publiko eta demokratikoa bermatzeko. Duela gutxi Arabako Foru Aldundiak aurkeztu duen Klima Araba 2050 Estrategiari EH Bilduk egindako ekarpenetako bat da. Lehen fase horretan, Klima Araba 2050 lehen diagnostikoa egin da, eta ildo estrategikoak eta lortu beharreko helburuak zehaztu dira, bai emisioak murrizteari dagokionez, bai klima-aldaketaren inpaktuetara egokitzeari dagokionez.

 

EH Bildurentzat, oro har, asmo gutxiko plana da, agertokiak zehazten ez dituena eta nazioarteko itunek ezarritako helburuak beteko ez dituena. Horregatik, EH Bilduren ustez estrategia horren helburua 2050rako herrialdearen deskarbonizazioa izan behar da, hau da, karbonoz neutroa den lurralde bat lortzea. Era berean, adibidez, energia-kontsumoa murriztu eta energia-subiranotasunerantz jo behar dela planteatu du. Lehenengo kasuan, “baliabideen eta prozesuen optimizazioa eta eraginkortasuna” ildo estrategikoa ordezkatuko luke, eta bigarrenean, berriz, “energia berriztagarri banatuak sortzeko eta kontsumitzeko trantsizioa” osatuko luke.

 

Bestalde, EH Bilduk hiru proposamen berri planteatzen ditu: mugikortasun iraunkorra eta erresilentea lortzea, gaur egun Altsasu-Miranda linean eta C3 Aiaraldea linean gutxi erabiltzen diren trenbide-azpiegiturak modernizatuz, nekazaritzako elikagaien estrategia bat egitea eta Arabako Nekazaritzako Elikagaien Kontseilua sortzea, eta hiri-hondakinak gutxitzea, ekonomia zirkularra sustatuz.

 

EH Bilduren ekarpenen artean nabarmentzekoa da, halaber, bazterketa-eremuak zehaztu behar direla, energia berriztagarrien ekoizpena zabaltzeko, bai ingurune naturaletan, bai nekazaritza-balio handiko lurretan.

 

 

Gonzalezen Gobernua anbiziorik gabe, apatiko eta bere baitan itxia iritsi da legealdiaren ekuatorera, EH Bilduren ustez

Kike Fdz de Pinedo: "Araba 20 urte barru nolakoa izango den erabakitzeko garaian gaude. Baina Gobernua gaindituta eta freskotasunik gabe ikusten dugu”.

| 2021-06-29 09:10:00

"Anbizio faltaz, apatiko eta bere baitan itxia". Horrela definitu du EH Bilduk Ramiro Gonzalezen Gobernuak bete dituen bi urteak. Kike Fdz de Pinedo bozeramaileak deitoratu egin du EAJk eta PSEk agindutakoa ia ez betetzea eta 180 graduko bira azkarra behar zenean pandemiarekin gidoia aldatzeko gaitasunik ez izatea: "Araba 20 urte barru nolakoa izango den erabaki estrategikoak hartu behar diren une batean gaude. Baina Gobernua gaindituta eta freskotasunik gabe ikusten dugu".

Horren harira, EH Bilduk gogorarazi du duela bi urte ohartarazi zuela NI-NI gobernua izango zela, eta, gaur egun, hala izaten jarraitzen duela: "Ezkerreko gehiengo bat ez da eraginkorra, PSEk ez duelako nahi, eta hala erakusten dute eguneroko politika kontserbadoreek; bitartean, ez dugu politika subiranistarik egiteko gaiatsunik, EAJk ez duelako hori nahi. Erabaki okerra hartu zuten, gure ustez: alde bakarretik gobernatzea eta gobernantza ezerezean uztea, ez bakarrik etxe honetako alderdi politikoei dagokienez, baita eragile sozialei dagokienez ere".

 “Araba kikildua”

Fdz de Pinedok deitoratu egin du Foru Gobernua lidergorik gabe eta Eusko Jaurlaritzaren eta Gobernu Zentralaren "atzetik" egotea, bultzatzen ari diren eredua 'Far West' gisa definituz, besteak beste, multinazional handiei ateak irekiz parke eolikoak jar ditzaten eremu babestuetan, nahiz eta Aldundiko teknikariek txosten kaltegarriak egin. Hori dela eta, bozeramaileak salatu du "Araba kikildu" baten aldeko urratsak egiten ari direla: "Zortzigarren kuadrilla ahazten duena -Trebiñu-, upategi txiki eta ertainak babesten ez dituena, despopulazioaren aurkako estrategia integrala jorratzen ez duena eta lurperatzearekin baloiak botatzen dituena  horren ardura bakarra EAJ, PSE eta PPrena denean".

Azkenik, azken hilabeteetan bezala, Fdz de Pinedok eskua luzatu dio berriro Gobernu taldeari, "egoerak hala eskatzen duelako eta Arabak merezi duelako, are gehiago egoera delikatu honetan, horregatik jarraituko dugu proposamenak egiten eta eskua luzatzen", adierazi du. Horretarako, orain arte aurkeztutako planak adibidetzat jarri ditu: BiziOn, San Prudentzio Bizirik, Araba Zero Karbono edo pandemiaren hasieran egindako 80 proposamenak.

EH Bildu trena Gasteizen lurperatzearen alde dago, “atzerapenik gabe” eta abiadura handiko trenaren zain egon gabe.

Ibon San Saturnino: azken 25 urteetan milimetro bat aurreratu ez izanaren erantzukizuna EAJ, PSE eta PPko gobernuen ezgaitasunaren eta apustu irmo baten faltaren ondorio da.

| 2021-06-23 13:27:00

EH Bilduk apustu sendoa egin du gaur Gasteiztik pasatzen den trenbidea lurperatzeko, abiadura handiko trenaren zain egon gabe. Ibon San Saturnino EH Bildu Arabako Arduradun politikoak azaldu duenez “azken 25 urteotan milimetro aurreratu ez izanaren erantzukizuna EAJ, PSE eta PPko gobernuen ezgaitasunaren eta apustu irmo baten faltaren ondorioa izan da”. Zentzu horretan, iragarri du EH Bilduk lanean jarraituko duela hiri osoan lurperatze bat lortzeko eta herrialderako mugikortasun elektrifikatu iraunkorraren eredua bultzatzeko. Hala, aldiriko trena bultzatuko du Miranda-Altsasu korridorean, eta, gainera, bi geraleku osagarri egokitzea planteatzen du Salburuan eta Zabalganan.

 

San Saturninok azpimarratu duenez trenbideko korridorea lurperatzea funtsezkoa da hiriaren etorkizunerako, eta duela hamar urte EH Bilduk proposatu zuela egungo ibilbidean lurperatzea hiru fasetan:  Zabalgana, erdigunea eta Salburua zela. “Lurperatzeari buruzko eztabaida AHTren eztabaida baino lehenagokoa da, korridorea bihar bertan lurperatu ahal izango litzateke, nahiz eta AHTa urte batzuk geroago iritsi”, gaineratu du.

 

Izendatu berri den EH Bildu Arabako arduradun politikoak adierazpenak egin ditu Arabako Koordinazio Taldeak EH Bilduko Koordinatzaile Nagusia Arnaldo Otegirekin bilera bat egin ostean. Bertan, Arabako erronken inguruan aritu dira, bestean beste, ehun industrialaren krisia, erronka demografikoa, zaintzen pribatizazioa edota trantsizio energetikoa. Ildo horretan, San Saturninok gogoratu du dagoeneko EH Bilduk Zaintza Plan Estrategiko bat egin duela (Bizi On) eta klima-aldaketari aurre egiteko ibilbide-orria (Araba Zero Karbono) egin direla, Araba 2050erako karbonoz neutroa izango den lurralde bihurtzeko. Halaber, Miñaon elektrolito solidozko baterien ikerketa eta ekoizpena bultzatzeko Gigafaktoria bat jartzearen aldeko apustua gogorazi du.

Presoak Katalunian eta Euskal Herrian ateratzeko garaia da

Bestalde, EH Bilduko Koordinatzaile Nagusiak, Arnaldo Otegik, esan du presoak Katalunian eta Euskal Herrian ateratzeko garaia dela. “43 urte geroago, Espainiako agenda politikoan indultuak, aministia eta preso politikoen askatasuna daude”, esan du. Zentzu horretan, estatuaren egituraketan eta erabakitzeko eskubidean aurrera egitearen alde egin du. Esparru sozialean, Otegik berriro eskatu du PSOErekin eta Podemosekin sinatutako akordioa betetzeko, lan-erreforma indargabetzeko. Gasteiztik ere, Otegik EH Bai zoriondu du azken hauteskundeetan lortutako emaitzengatik. “EH Bai zoriondu nahi dut lortutako emaitzengatik. Ez da kasualitatea. Ezkertiar subiranistak gero eta gehiago dira Europa osoan”, gaineratu du.

 

 

 

 

EH Bilduk egoitza-zentroak hitzartzeko Foru Arau baten zirriborroa aurreratu du, egoitza pribatuetako langileei kalitatezko arreta eta lan-baldintza duinak bermatzeko

Datozen hilabeteetan hainbat eragile sozial eta sindikaturekin kontrastatu eta irailean behin betiko arau proiektua aurkeztuko da.

| 2021-06-22 08:48:00

EH Bilduk agerraldia egin du azken hilabeteetan prestatzen ari den egoitza-zentroak hitzartzeko Foru Arauaren zirriborroaren berri emateko. Arau horren helburu nagusiak egoiliarrei eta zentro horietan lan egiten duten profesionalei arreta emateko baldintzak hobetzea da, baina oraindik, EH Bilduren proposamena eragile sozialekin eta sektoreko sindikatuekin kontrastatzeko bidean dago.

Luis Maria Salgado eta Claudia Venceslaoren iritzitan, Araban gero eta eskari handiagoa dagoenez, arau hori izango da erakunde publikoekin lankidetzan aritu nahi duten egoitza pribatuei eska dakiekeen funtzionamendu-esparru komun bat ezarriko duen tresna, lan- eta arreta-baldintzak homogeneizatuz eta, ahal den neurrian, baliabide publikoetan daudenekin parekatuz. Ildo horretan, EH Bilduk argi du bere apustua: publikoa. Baina eskari handiaren joera irauli arte, beharrezkotzat jo du hitzarmenarekin jarraitzea, kolektibo horri erantzuteko erantzun egokiena baita.

"Arau honek zerbitzurako txekeen (Zerbitzuari lotutako Prestazio Ekonomikoak) existentzia oztopatzeko balio beharko luke, prestazio horiek dituzten erabiltzaileek jasotzen dituzten egoitzek itundutako egoitza baten baldintza berak bete behar izatea eskatzen baitu", zehaztu du Salgadok.

               

Neurri zehatzak hobekuntza zehatzak bultzatzeko

Gaur egun, zenbait egoitza-zentrotan, arropa garbitzeko, mantentzeko edo lisatzeko lanak erizaintzako laguntzaileek egiten dituzte, egoiliarren zuzeneko arretaren kaltetan. Hala ere, arau horrekin hori ez litzateke beharrezkoa izango, ostatuaren, mantenuaren eta jantzien mantentze-lanen lanbide-kategoria guztietan ratioak handitzea aurreikusten baita.

Osasun-arretari dagokionez, Venceslaok egoiliarren medikazioaren prestakuntza arautzearen alde egin du: "Erizainak prestatuko du jarraibide medikoa, eta ez gaur egun bezala, non egoitza batzuetan medikazioak erizaintzako laguntzaileek prestatzen dituzten". Horrekin batera, osasun-kontsultetara laguntzeko protokolo bat sortuko da, eta bertan zehaztuko da zein profesionalek hartuko dituen bere gain laguntza horiek, gizarte- edo familia-babesik ez dagoenean.

Gizarte-arretan eta arreta soziokulturalean aldaketa nabarmenak egiteaz gain, arreta psikologikoaren arlo osoa hobetzen da, diagnostikoa, erabiltzaileen ebaluazioa eta tratamenduen plangintza barne hartzen dituena.

Azkenik, EH Bilduk giza baliabideen arloa indartzearen alde egin du, besteak beste, erizaintzako arreta astelehenetik igandera bermatuz. Ildo horretan, langileen ratioak ere igo egingo dira gerora sortutako kausak daudenean, hala nola gaixotasunak edo pandemiak. "Gaur egun, egoitza pribatuetako ratioak oso urriak dira; zaintzan kalitatea eman nahi badugu, inbertsio ekonomiko handia egin behar da, eta egoitza-zentro horietan profesional gehiago egon behar dira", ondorioztatu du Venceslaok.

EH Bildu Arabak klima-erronkari eta energia-trantsizioari aurre egiteko ibilbide-orri bat adostea eskaini die lurraldeko eragile politiko eta sozialei

Ibon San Saturnino: “Sistema neoliberalak porrotera eramaten gintuela esaten genuenean arrazoia genuen baina arrazoia izatea ez da nahikoa, alternatiba eraiki behar da, jendea entzun eta inplikatu behar da”.

| 2021-06-20 13:18:00

EH Bilduk herrialdeko gainerako eragile politiko, sindikal eta sozialei ibilbide-orri partekatua adostea eskaini die, klima-aldaketari eta energia-trantsizioari aurre egiteko. Akordio hori lortzeko urtebeteko epea ezarri du eta, bien bitartean, energia sortzeko azpiegitura handiak egiteko edozein proiektutarako edozein lizentzia geldiaraztea proposatu du. “Arabak merezi du, etorkizuneko belaunaldiek merezi dute”, esan du EH Bildu Arabako arduradun politikoak, Ibon San Saturnino Muruak, gaur Amurrion egin den Mahai Politiko berriaren aurkezpenean. Guztira, bederatzi gizonek eta zortzi emakumek osatzen dute EH Bilduren zuzendaritza berritua Araban.

 

“Gero eta ugariagoak dira hainbat enpresak irabazi azkarrak lortzeko garatu nahi dituzten proiektuak. Aurreikuspenik gabe eta plangintzarik gabe. Benetan ez dute ezer ikasi? Merkatua ez da autoerregulatzen. Instituzioek beren gain hartu behar dute beren betebeharra eta gehiengoaren onerako planifikatu behar dute. Estrategiak zehaztea, adostasunak lortzea eta planifikatzea. Hori egin behar da, Eta hori oso ondo ulertu dute azken hilabeteetan Arabako natura ondarea defendatzeko eta energia-trantsizio arrazoizko baten alde mobilizatu diren pertsona horiek guztiek. Lautadan, Mendialdean, Añanan edo Gorbeialdean parke eolikoen eta kontrolik gabe ugaritzen diren proiektu fotovoltaikoen kontra jaikitako pertsonak. Ziurrenik, gauzak ezin ziren Gobernuak egin duena baino okerrago egin”, gaineratu du.

 

San Saturninok “norabidea aldatzeko beharra” azpimarratu du eta Arabak prozesu horretan egin dezakeen ekarpena nabarmendu du. “EH Bildu bezalako proiektu bat dugu, azken hamar urteetan erantzukizun-maila altuenak bere gain hartzeko prestatzen aritu dena, eta, batez ere, lorpen handiak lortzeko aukera ematen duen errealitate soziala eta indar-korrelazioa ditugulako”, esan du. Ildo horretatik, Arabako gizarteak azken urte honetan erakutsi duen elkartasun eta erantzukizun maila txalotu du, eta kolektiboaren garrantzia nabarmendu du, eta askatasun pertsonalak eta kolektiboak elkarri lotuta daudelako nahitaez. “Ez ditzagun ahaztu balio horiek etorkizun oparoaren oinarriak direlako”, esan du San Saturninok.

 

Bestalde, EH Bilduren Arabako arduradun politikoak nabarmendu du EAJren kudeaketa onaren mitoa erori egin dela, eta azpimarratu du EAJ-PSE koalizioak paralisi politiko batera eraman duela Araba. “Duela bi urte, ohartarazi genuen EAJren eta PSEren arteko koalizioak (NI-NI koalizioak: ez subiranistak, ez ezkerrekoak) blokeo egoera batera eraman zuela herrialdea. Legealdiaren erdia betetzen den honetan, hausnarketa horretan bete-betean asmatzen dugula esan dezakegu. Ez dago proiekturik, ez dago helbiderik. NI-NI koalizioa kudeaketa hutsean aritzen da (norabiderik gabeko kudeaketa txarra)”, nabarmendu du.

 

Egoera horren aurrean, honako hau defendatu du: “ezkerreko burujabetze-proiektuek bere maila erakutsi behar dute, eta, horretarako, berme-proiektu kolektibo bat eskaini behar dugu, jendeari segurtasuna emango diona, ilusioa piztuko duena eta gizarte-justiziaren printzipioen gainean eraikitako berdintasunezko gizartea eraikitzeari atxikitzea sustatuko duena, naturarekin eta planetarekin harmonia-harremana berreskuratuko duena. Sistema neoliberalak amildegira eramaten gintuela esaten genuenean genuen arrazoia. Arrazoi dugu esaten dugunean ordena berri bat berdintasunean, justizia sozialean eta ingurumenarekiko errespetuan oinarrituta soilik eraiki daitekeela. Baina arrazoiarekin ez da nahikoa, alternatiba eraiki behar da, jendea entzun eta inplikatu behar da”.

 

"Orain altxatzea tokatzen da "

 

Bestalde, EAEko Legebiltzarreko bozeramailea Maddalen Iriartek orain “heri gisa” altxatzeko unea dela azpimarratu du. Zentzu horretan, Next Generation Europako Funtsek ekarriko dituzten milioiak aipatu ditu. “Ezin ditugu errepikatu iraganeko akatsak. Norabidea zuzendu behar da. Aprobetxa dezagun aukera hau herri hau ingurumenaren zaintzaren eta babesaren, pertsonen zaintzaren eta zerbitzu publikoen hobekuntzaren norabidean kokatzeko. Aprobetxa dezagun aukera hau euskal herritarrentzako bizi-baldintza duinak bermatzeko”, azaldu du Iriartek.

 

Era berean, ohartarazi du oinarrizko eskubideetan eman daitekeen atzera egitea. “Datozen hilabeteetan lan erreformaz, pentsio sistemaz eta fiskalitateaz hitz egingo dute. Herrialde honetan gehiengo oso zabal batek defendatzen du gai horietako batean ere atzera ez egitea. EH Bilduk akordioa lortu zuen Madrilgo Gobernuarekin lan erreformarako eta euskal langileek pairatzen duten prekarietatearekin amaitzeko. Batu ditzagun gure indarrak herri gisa, euskal gizartearen gehiengoak uste duena elkarrekin defendatzeko. Aprobetxa dezagun aukera hau guztion artean Euskal Herri hobea, demokratikoagoa eta berdintasunean oinarritutakoa eraikitzeko” gaineratu du.

 

Arabako Mahai Politikoaren osaera.

 

Arabako arduradun politikoarekin batera, hauek osatzen dute Mahai Politikoa: Koordinazio Taldea, zortzi eskualdeetako ordezkariak, Arabako Batzar Nagusietako eta Gasteizko Udal Taldeko EH Bilduko bozeramaileak eta EH Bildu osatzen duten hiru alderdietako ordezkariak. Koordinazio Taldea lau pertsonak osatzen dute: Xabi Goikuria Oiarbide, Politika Instituzionaleko arduraduna; Ruth Ibisate Diez-Caballero, Udalgintza arduraduna; Jon Ligüerzana Ajuriagerra, Antolaketako arduraduna; eta Rebeka Mtz. Compañón Remírez, komunikazio-arduraduna. Era berean, Endika Saez de Adana Gasteizko arduradun politikoa da, eta, harekin batera, Arabako eskualdeetako ordezkariak daude:  Irune Iturbe (Aiaraldea), Itxaso Etxebarria (Gorbeialdea), Eva López de Arroyabe (Arabako Lautada), Oier Martínez de Santos (Añana), Ruth Ibisate (Arabako Mendialdea) eta Pablo Ortiz de Latierro (Trebiñu) eta Esti Besa (Arabar Errioxa).

 

 

Horiekin batera, Arabako Mahai Politikoan Kike Fdez de Pinedo Arabako Batzar Nagusietako bozeramaileak eta Felix González Gasteizko Udal Taldeko bozeramaileak parte hartzen dute. Azkenik, Ainhize Solaun, Iratxe Lopez de Aberasturi eta Josu Estarrona daude Sortu, EA eta Alternatibaren izenean, hurrenez hurren.

ALBISTEAK

Argibideak eskatu ditugu Madrilen Arkamo eta Iturrietako zentral eolikoen izapidetze-egoerari buruz

2021-10-08 10:16:00

Eusko Jaurlaritzak proiektu horiei uko egiteko asmoa iragarri ondoren, EH Bilduk hainbat galdera erregistratu ditu Madrilgo Kongresuan, zein egoera administratibotan dauden argitzeko.

Zergen foru-arauetan moldaketak egitea proposatu du EH Bilduk, udaletatik ekitatea eta justizia soziala bultzatzeko

2021-10-07 13:55:00

Gehien kutsatzen duten ibilgailuek gehiago ordaintzea, eraikinen energia eraginkortasuna hobetzea eta Elizaren pribilegioak amaitzea dute helburu

Argantzongo Udalak ohartarazi du AHTren obrek ur hornidurarik gabe utz dezaketela udalerria

2021-10-07 10:10:00

Neurri zehatzak eskatzen ditu hornidura arazorik ez izateko, eta Ministerioak 2018an aurkeztutako alegazioei entzungor egin diela salatu du.

EH Bilduk ekoizpen eta kontsumo ereduaren eraldaketa, trantsizio energetikoa eta kalitatezko zaintzen sistema berreskuratzea ezarri ditu erronka gisa Araban

2021-10-02 10:51:00

Arabako Batzarra bildu da gaur Agurainen eta ikasturteko plan politikoa izan du hizpide