Arabako landa-bideei buruz EH Bilduk proposatutako ponentzia osatzea baztertu dute EAJk eta PSEk

5.000 km luze den landa-bide sarea du Arabak; ponentziaren helburua zen horiei buruzko araudia bateratzea, bikoizketak saihesteko, eta tokiko entitateei hitza eta baliabideak ematea, bideen zainketa egiteko

| 2021-11-18 16:08:00

EH Bildu Arabako batzarkide taldeak joan den urriaren 15ean aurkeztutako landa-bideei buruzko ponentzia osatzea errefusatu dute Batzar Nagusiek, gaur bildu den Nekazaritza Batzordean. Ponentziaren helburua zen araudia aztertzea eta, ahal den heinean, sinplifikatzea, asko baitira egun landa-bideen erabilera desberdinak: lehen sektoreko ohiko erabileraz gain, bide berdeak eta txirrindularientzako bideak, besteak beste, eta beraz, baita horiek arautzen dituzten foru arauak ere. Ponentzia osatzearen alde bozkatu dute oposizioko talde guztiek, eta proposamenaren kontra bozkatu dute, aldiz, Foru Gobernua osatzen duten EAJ eta PSE taldeek.

Batzordea amaituta, EH Bilduko batzarkide Javier Argotek adierazi du ulergaitza egiten zaiola EAJ eta PSEren jarrera,  eta agerian geratu dela Arabako herrien eta bertako errealitatearen ezagutza eza: “Ezin da esan landa-bideen eskumen osoa Tokiko Erakundeena denik, landa-bideei buruzko 6/1995 Foru Arauak Aldundiari egozten baitizkio zaintzaren, zehapenen eta funtzio teknikoen eskumenak, eta bideen jabeei uzten dio mantenimendu lana”. Argotek esan du ponentziaren asmoa zela landa-bideen erabilerek izandako aldaketak.

Donemiliagak salatu egin du Eusko Jaurlaritzak udalei ingurumen-proiektuak “atzeko atetik” inposatzeko duen asmoa

Ingurumen Administrazioari buruzko Legearen artikuluetan sartu nahi diren aldaketen aurkako mozio bat onartu du; ekimen horren bidez, Eusko Jaurlaritzak edozein azpiegitura Goi Mailako Interes Publikoko Proiektu deklaratu ahal izango du, udal-araudiaren gainetik.

| 2021-11-17 12:38:00

Donemiliagako Udalak salatu egin du Eusko Jaurlaritzak udalei ingurumen proiektuak “atzeko atetik” inposatzeko duen asmoa. Gaur onartu duen mozio baten bidez izan da. Bertan, Donemiliagak adierazten du “Lurralde Antolamenduari buruzko Legeak Interes Publiko Goreneko Proiektuen figura jasotzearen aurka dagoela, eta baita ere, gure udalen toki-autonomiarentzat kaltegarria den eta gure toki-demokrazia urratzen duen beste edozein tresnaren aurka dagoela”

Ingurumen Administrazioari buruzko Legea izapidetzen ari da justu orain Eusko Legebiltzarrean eta EAJk zuzenketa bat erregistratu du, ustez ingurumena hobetu dezakeen edozein azpiegitura “Interes Publiko Goreneko Proiektu” deklaratzeko, hala nola, energia berriztagarrien proiektuak, zabortegiak, araztegiak, gasa ustiatzeko proiektuak edo eremu degradatuak hobetu nahi dituzten beste batzuk. Kasu horietan erakunde publikoek sustatu behar dute.

Adierazpen horrek berehala ekarriko du lurraldearen antolamenduko eta hirigintza plangintzako tresna guztiak azpiegitura berrira egokitu beharko direla. “Erabateko erasoa da udal autonomiari eta haren lurralde eta hirigintza plangintzari, inposaketa bat eta tokiko autonomiaren eta demokraziaren urraketa nabarmen bat; izan ere, Udalari ukatu egiten zaio egokitzat jotzen dituen erabilerak bere lurraldean mugatzeko aukera”, azaldu du Erika Letamendi Donemiliagako alkateak.

Egoera horren aurrean, Donemiliagako osoko bilkurak, legea modu horretan errefusatzeaz gain, EUDEL euskal udalen elkarteari eskatu dio, udalen interesaren alde, “lege horren aurka egin dezala eta behar diren kudeaketa guztiak egin ditzala, Ingurumen Administrazioari buruzko Legea modu horretan onartu eta indarrean sar ez dadin”.

 

Argantzongo Udalak udalerrian aurkitutako Arabako Foru Aldundiaren mugarriaren jatorriari eta esanahiari buruzko azterlan bat eskatu du.

Hala adierazi diote Pilar Garcia de Salazarri, diputatu nagusiaren lehen tenienteari, gutun batean.

| 2021-11-16 12:57:00

Pasa den azaroaren 5ean Arabako Foru Aldundiaren mugarri bat agertu zen Argantzongo udalerrian. Aurkikuntza kasualitatea izan zen, auzotar talde bat herrian auzolan bat egiten ari zela aurkitu baitzuten. N1 errepide zaharraren 334. kilometroan dago, Gaztela eta Leongo Juntaren esku dagoen eremu batean. Mugarria egoera onean dago, eta bizilagunen eta Udalaren interesa piztu du.

 

Horregatik, Argantzongo Udalak ikerketa bat egiteko eskatu dio Arabako Foru Aldundiari, haren kokapenaren arrazoiak zehazteko eta beste informazio mota bat biltzeko, hala nola; kokapenaren urtea, mugarria jarri zuen entitatea edo enklabean horrelako beste mugarririk aurkitu den.

 

Eskaera bidali zaio Pilar Garcia de Salazarri, Ahaldun Nagusiaren lehen tenienteari, non, azterlan hau eskatzeaz gain, horren emaitzak Argantzongo Udalari bidaltzeko eskatzen den.

EH Bilduk Batzar Nagusietan eskatu du Martin Villa auzipetzeko prozesua babestea

Urriaren 15ean, Argentinako Servini epaileak Rodolfo Martin Villa Espainiako Gobernazio Ministro ohia auzipetu zuen, martxoaren 3ko hiru langileren hilketagatik eta Iruñeko 1978ko sanferminetakoagatik, gizateriaren aurkako frankismoaren krimenen testuinguruan

| 2021-11-16 10:44:00

EH Bildu Araba batzarkide taldeak mozioa erregistratu du gaur Batzar Nagusietan, Rodolfo Martin Villa Espainiako Gobernazio Ministro ohiaren auzipetzea babestea eskatzeko.

Mozioaren lehen puntuan ministro ohia Pedro María Martinez Ocio, Francisco Aznar eta Romualdo Barroso gasteiztarren eta German Rodriguez iruindarraren hilketengatik auzipetu dutela adierazten da, gizateriaren aurkako frankismoaren krimenen testuinguruan, eta Batzar Nagusiek auzipetze hori babestea eskatzen da.

Era berean, Espainiako Gobernuari eta Justizia Administrazioari eskatzen zaie aktiboki parte hartzea Servini epaileak emandako auzipetze-prozeduran. Mozioa Maria Servini epaile argentinarrari berari helaraziko zaio.

Martxoak 3

Ez da lehen aldia Batzar Nagusiek halako eskaera bat babesten dutena: 2014an, Frankismoaren Krimenen Aurkako Argentinako Kereilaren Aldeko Plataformaren lana babesteko mozioa onartu zen, eta harrezkero, hainbatetan adierazi dute Batzar Nagusiek martxoaren 3ko Gasteizko biktimekiko elkartasuna.

Moziok gogoratzen du, bestalde, EAJk eta PSEk osatzen duten gobernuak uko egin ziola Frankismoaren Aurkako Arabako Kereila aurkezteari, Servini epaileak Argentinan zabaldutako auzibidea babesteko modu gisa.

EH Bilduk Arabako 450 landa-gune baino gehiago birgaitzeko, berritzeko eta biziberritzeko plana proposatu du

Landa eremua Abagune proposamenak landa-gune bakoitzaren beharrak, kezkak, ahalmenak eta itxaropenak aztertu nahi ditu, bakoitzak bere ibilbide-orria definitu ahal izateko. EHUren azterketa batek ohartarazi du Arabako 153 landa-gune despopulazio arrisku larrian daudela.

| 2021-11-12 12:32:00

EH Bilduk gaur “Landa eremua Abagune” proposatu du, 500 biztanletik beherako Arabako 450 landa-gune birgaitzeko, berritzeko eta biziberritzeko plan berezia. Izan ere, Arabako Lurralde Historikoaren erronka handienetako bat despopulazioari aurre egitea da, bereziki hegoaldeko eskualdeetan. UPV/EHUk berriki egindako azterlan baten arabera, hiru landa-gunetik bat jendez husteko arrisku larrian dago.

Landa-nukleo horiei tresnak emateko, EH Bilduren ustez, azterketa diagnostiko zehatza egin behar da herriz herri, landa-gune bakoitzaren beharrak, kezkak, ahalmenak eta itxaropenak aztertzeko, gero bakoitzak bere ibilbide-orria definitu ahal izateko. Javier Argote EH Bilduko prokuradoreak eta Ruth Ibisate Arabako EH Bilduko Udalgintzako arduradunak proposamena azaldu dute Arabako Batzar Nagusietan egindako agerraldian.

“Lurraldeko 53 udalerriak osatzen dituzten guneek – 450 baino gehiagok- ez dute inoiz izan azterketa-diagnostiko xehaturik. Funtsezkoa iruditzen zaigu datu horiek izatea, gero bakoitzak bere ibilbide-orria definitu ahal izateko, bere gabeziak eta ahalmenak kontuan hartuta, gero bere gabeziak konpondu eta bere baliabideak balioztatu ahal izateko”, zehaztu du Ruth Ibisatek.

Lehenengo fasean, EH Bilduren asmoa da hainbat aspektu aztertzea, hala nola hiriguneak, etxebizitza, zerbitzu publikoak, merkataritza-sarea, ekipamendu- eta lan-espazioak, mugikortasuna, energia- subiranotasuna eta ondare historikoa, artistikoa eta kulturala.

“Etxebizitzaren gaiak garrantzi berezia du. Kasu horretan, etxebizitza hutsaren azterketa egitea proposatzen dugu, eta, bizitegi-hazkunde berriren bat baino lehen, etxebizitza hori birgaitzeko eraikitakoari erreparatzea. Gainera, uste dugu aztertu egin behar direla etxebizitza bihurtzeko aukera duten eraikuntzak, hala nola bordak edo lastategiak, bai eta eraiki daitezkeen beste espazio batzuk ere, hala nola larrainak. Hori guztia, alokairuko landa-etxebizitzaren plana abian jartzeko beharra ahaztu gabe”, azaldu du Javier Argotek.

Proposatutako neurrietako batzuk dira zerbitzu publikoak berrikustea eta eguneratzea; merkataritza-zerbitzuak ezartzeko baliabideak egokitzea; kultura, kirol eta aisialdi-eremu gisa erabil daitezkeen lokalak eta lurzoruak aztertzea; energia-kontsumo kooperatiboko instalazioak bultzatzea edo kultura, arte eta arkitektura-ondarea balioan jartzea.

Plan hau egitea Arabako Foru Aldundiari dagokio, gainerako erakundeekin elkarlanean eta tokiko erakundeen parte hartzea bermatuz. Plana datozen bi urteetan egingo da (2022-2023) eta Arabako Foru Aldundiak finantzatuko du. Ondoren, toki entitate bakoitzak bere ibilbide orria eginen du, bere guneko azterlan zehatzetan eta bere planean jasotako ondorioetan oinarrituta.

ALBISTEAK

EH Bildu Arabak adinekoei arreta emateko plaza berriak premiaz sortzea eskatu du

2022-01-14 09:36:00

Gogorarazi du argitaratu berri den azterlan batek ondorioztatu duela Araban 730 plazako defizita dagoela

EH Bilduk EAJri eta PSEri eskatu die eskola-kirola berriz abian jartzea

2022-01-11 11:25:00

Xabier Valdor batzarkidea: “Halako neurriek ez dute laguntzen osasun mentala eta bizitzarako funtsezkoak diren ohiturak gara-tzen”

Artziniegak 2022rako aurrekontuak onartu ditu

2022-01-11 09:45:00

Bi milioi euro baino gehixeago izango ditu, eta inbertsioak egingo ditu, besteak beste, hotel-dorrea eraberritzeko lanak amaitzea, Kultur Etxea berritzeko lanak hastea, Mendietako La Llana bidea egokitzea edo Beraza aldapatik Goiko Plazara iristeko bidea hobetzea.

Urkabustaizek 2022rako aurrekontua onartu du, 1,5 milioi euro ingurukoa

2021-12-30 12:14:00

Aurreikusitako inbertsioen artean, besteak beste, aparkalekua birmoldatzea, plaka fotovoltaikoak jartzea eta eskolako eraikinean hainbat hobekuntza egitea