Hamaika herrik osatzen duen udalerri honetan boto bakarraren aldea egon zen aurreko hauteskundeetan EAJ eta EH Bilduren artean eta EH Bilduk Udala eta Kontzejuen harremanetarako batzordea osatzea planteatu du besteak beste.

| 2019-07-02 11:57:00

EH Bilduk Iruraiz Gaunako Udala gobernatzeko elkarlana eskaini dio EAJri. Arabako Lautadako udalerri horretan alkatetza EAJren esku gelditu zen boto bakar baten diferentziagatik. “Pasa den maiatzaren 26ko emaitzak kontuan hartuz gero, Udal Gobernuarekin modu eraikitzailean elkarlana sustatu behar dugula ulertzen dugu eta herritarren bizi kalitatea hobetzeko gure herri programan jasotako hainbat proposamen bultzatu nahi ditugu”, azaldu du Iruraitz-Gaunako EH Bilduko bozeramailea den Iratxe del Barcok.

 

Dagoeneko, aste bat pasa da EH Bilduk EAJri helarazi diola idatziz proposamen bat uztailaren 15a baino lehen egin beharreko funtzionamendu osoko bilkurari begira, baina oraindik orain ez du inolako erantzunik jaso. Idazkian oinarrizko hiru proposamen jasotzen dira. Batetik, Udala eta Kontzejuen harremanetarako batzorde bat osatzea “harremana eta elkarlana” bultzatzeko udalerriak osatzen dituen hamaika toki erakundeekin. Moises Pérez de Arriluzea izango litzateke batzorde horretako arduraduna eta araudi berezia izango luke.

 

Bestalde, Euskara, Kultura, Kirola eta Berdintasunezko zinegotzi ordezkaria sortzea planteatu da eta Iratxe del Barcoren esku geldituko litzateke. Azkenik, EH Bilduk proposatu du Jon Koldo Sáez de Urabain Iruraitz-Gaunako ordezkaria izatea Landa Garapenerako Elkartean eta Elgeako Urkidetzan. 

 

2016an hasitako GOFEko sukaldari laguntzaileen LEPa amaitzea eskatu dio EH Bilduk Foru Gobernuari

Claudia Venceslao: “zentzugabekeriaen kate honekin amaitu behar du foru gobernuak lanpostuak egonkortu behar ditu”

| 2019-06-28 11:04:00

EH Bilduk eskatu dio gaur Foru Gobernuari “behingoz” amaitu dezan GOFE-Gizarte Ongizaterako Foru Erakundea-ren sukaldari laguntzaileen Lan Eskaintza Publikoa. LEP hori 2016ko abenduan hasi zen eta orain, hiru urte eta erdi pasa direnean, ez da amaitu. EH Bilduko batzarkidea Claudia Venceslaok azaldu duen bezala, prozedura bera zentzugabekeria da. “Lehen ariketa 2017ko urrian egin zen, epaimahaia ez da bildu duela ia urte bat eta oraindik ez dira publiko egin azken ariketaren notak azterketa duela urte bat, hau da, 2018ko ekainean egin bazen ere”, azaldu du.

 

Hori guztia ikusita, EH Bilduren ustez, “zaila da asmatzea egungo GOFEko zuzendaritzaren beste gaitasun ezaren aurrean gauden edo EAJren estrategia bat kategoria horretako langileak zigortzeko eta azpikontratatzeko”. Izan ere, GOFEko kategoria guztietarako lan eskaintza publikoa bat egitea izan zen 2016ko aurrekontuen negoziazioan EH Bilduk mahai gainean jarri zuen baldintza bat azpikontratazioa saihesteko.

 

EH Bilduk prozesuan plaza bat ateratzeko aukerak dituzten pertsonei bereahala egonkortasuna eman behar zaiela aldarrikatu du. Udan zehar arazoa konpontzen ez bada, EH Bilduk ohiko kontrol mekanismoak abian jarriko ditu egoera desblokeatzeako Arabako Batzar Nagusiek ohiko jarduera berreskuratzen dutenean.

EH Bilduk Kike Fdez de Pinedo aurkeztuko du Arabako Ahaldun Nagusigai datorren inbestidura osoko bilkuran

Eva López de Arroyabe: “Arabako Batzar Nagusietan bestelako gehiengoak osatu daitezke eta norabide horretan lan egingo dugu lehen egunetik”

| 2019-06-27 11:05:00

EH Bilduk Kike Fdez de Pinedo aurkeztuko du Arabako Ahaldun Nagusigai datorren inbestidura osoko bilkuran. Gaur bertan aurkeztu du EH Bilduk hautagaitza Arabako Batzar Nagusietan. Eva Lopez de Arroyabek nabarmendu duen bezala, EH Bilduk lehen egunetik lan egingo du gobernu alternatiba bat osatzeko eta, ondorioz, datozen lau urteetarako lan ildo nagusiak zehaztuko ditu inbestidura saioan. “Erantzukizunez lanean jarraituko dugu Arabarako alternatiba bat eraikuntzaren ardura EH Bildurena delako. Hori izango da gure betekizuna lehen egunetik datozen lau urteotan”, zehaztu du EH Bilduko bozeramaile ordezkoak.

 

EH Bildu, hamabi batzarkideekin, Arabako Batzar Nagusietako bigarren indarra da eta foru ganbaran politika sozial progresisten alde edo erabakitzeko eskubidearen alde bestelako gehiengoak sortu daitezkeela nabarmendu du. “Indar progresistok Batzar Nagusietan 51 batzarkidetatik 26 dauzkagu, erabakitzeko eskubidearen aldeko batzarkideak 33 gara, autogobernu berriaren aldekoak 29... Foru Ganbera, beraz, bestelako gehiengo zabalak ere sortzeko gauza da”, zehaztu du Lopez de Arroyabek.

 

Ildo horretan, EH Bilduk nabarmendu du Araba anitza dela eta gehiengo absolutua duen gobernu batek erabaki guztiak inposatzen baditu ez die lurraldeko beharrei erantzungo. Datozen lau urteotan konpromiso argia dugu: arabarron bizi baldintzak hobetzeko, lurralde oreka bermatzeko, gure herriak eta gure ingurumena defendatzeko politika progresistak bultzatzea, hau da, Araba justuagoa, solidarioagoa eta progresistagoaren oinarriak ezartzea”, azaldu du EH Bilduko bozeramaileak.

 

Bastidak akordio guztiak adostasunez hartuko dituen gobernu koalizioa izango du

Parekotasunezko Tokiko Gobernu Batzordea eratuko da

| 2019-06-19 10:59:00

Bastidak akordio guztiak adostasunez hartuko dituen gobernu koalizioa izango du  datozen lau urteotan. Horretarako, hainbat mekanismo antolatu dira beti ere bi alderdien programak kontuan hartuz.  Horren berri eman dio EH Bilduk bere kidegoari astelehenean egin zen batzar irekian. Bertan, sinatutako akordioaren xehetasunak azaldu ziren.

 

Akordio horren arabera, “bost zinegotziz eratutako gobernu talde baten oinarrituta, EAJko hiru zinegotzi eta EH Bilduko bi, lan talde indartsua eta bateratua eratuko da, Bastida eta Buradon Gatzagaren alde elkarrekin lan egin eta ahaleginak egingo dituena”. Gobernu talde horren “helburu bakarra eta argia” elkarrekin lan egitea proiektu bateratu bat bi alderdien artean aurrera ateratzea. Horretarako, agintaritzaren hasieran elkarren artean kudeaketa plana sortuko da alderdi bakoitzaren proposamen zehatzak txertatuz. Plangintza honek talde berriaren proposamenei epeak ezartzea eta aurrekontuak aurreikustea baimenduko du.

 

Era berean,  parekotasunezko Tokiko Gobernu Batzordea eratuko da alkatea, EH Bilduren bi zinegotzi eta EAJ-ren zinegotzi batek osatua, udal gobernu akordioa eta udal jardueraren egunerokotasuna kudeatzeko. Konkretuki turismoaren dinamizazioa, merkataritza, memoria historikoaren berreskurapena eta azpiegitura eta egitasmo handien kudeaketa. 

 

Azkenik, EH Bilduren zinegotzi bat Lehen Alkateorde izendatuko da eta kultura, kirola, jaiak, euskara… biltzen dituen arloa alderdi bien zinegotzi banak elkarren artean eramango dute.

EH Bilduk Arabako hamaika udalerri gobernatuko ditu

Horietako bederatzietan gehiengo absolutuarekin gobernatuko ditu

| 2019-06-15 13:13:00

Arabako 53 udalerrietako osaketa egin ostean, EH Bilduk hurrengo legealdian hamaika udalerri gobernatuko ditu guztira, aurreko legealdian baino bi gehiago. Horietako bederatzi udalerrietan gehiengo absolutuarekin gobernatuko ditu. Horrela izango da Aiaraldeko Artziniegan, Lautadako Asparrrenan, Barrundian, Donemiliagan eta Zalduondon eta Gorbeialdeko Aramaion, Legution, Urkabustaizen eta Zuian. Argantzungo kasuan, EH Bilduk zazpi zinegotzitik hiru izango ditu eta beste horren beste Samaniegon.

 

EH Bilduk lehen aldiz izango ditu Artziniega, Samaniego eta Argantzungo alkatetzak eta, era berean, Urkabustaiz berreskuratu du bertan 2011-2015eko legealdian gobernatu ostean. Aurreko legealdiarekin konparatuta, EH Bilduk ez du errepikatuko Laudion eta Zigoitian. Udalerri horietaz gain, EH Bilduk akordioak lortu ditu EAJrekin Bastidan eta Guardian. Arabar Errioxako bi herri horietan, PP kanporatzeaz gain, egonkortasun eta gobernagarritasuna bermatzeko gobernu akordioak egin dira.

 

Guztira, EH Bilduk 121 zinegotzi izango ditu 37 udalerrietan, duela lau urteko hauteskundeen ostean lortutako baino 20 gehiago.

 

• «
• 1
• 2
• ...
• 63
• 64
• 65
• 66
• 67
• 68
• 69
• ...
• 72
• 73
• »