AKTUALITATEA

| 2026-09-13 10:09:00

Eva Lopez de Arroyabe EH Bilduren Arabako Batzar Nagusietako bozeramaileak mezu itxaropentsua bidali die Arabako Errioxako herritarrei Kripanen egin den mahats-bilketaren festan. "Arabako Errioxak eta bertako upategiek etorkizuna dute. Horretarako, administrazioek egin ezin izan duten ariketa bat egin behar dute: sektore osoarekin eseri, hitz egin eta entzun, eskualde-estrategia bakarra eta partekatua ezarri, bereizketaren eta kalitatearen aldeko apustua bultzatu, eta, batez ere, upeltegi txikien eta familiarren biziraupenaren alde egin ", nabarmendu du Lopez de Arroyabek.

Mahats-bilketaren edizio hau Arabako mahastizaintza eta ardogintza sektorearentzat oso une zailean kokatzen dela azpimarratu du EH Bilduk. "Ardoaren kontsumoak maila globalean izan duen beherakadak, Errioxako izendapenaren estrategia okerraren arrasteak, mahatsaren prezioak produkzio-kostuen azpitik izan duen beherakadak, klima-aldaketaren ondorioek eta mahatsa biltzeko eskulan faltak markatu dute mahats-bilketa berriro ere, eta eragin sakona izaten ari dira sektorean eta eskualdearen animoan", zehaztu du.

EH Bilduko bozeramaileak berretsi du Arabako Errioxa, dituen ezaugarri orografiko eta sozialengatik, ardoaren ekoizpenerako munduko ingurune natural onenen artean dagoela. Are gehiago, Arabako Errioxak bere mahatsekin, hau da, Arabako Errioxako lursailetan bildutako mahatsekin egindako ardo-bolumen guztia merkaturatzeko ahalmena du.

Datozen asteetan EH Bilduk Arabako Errioxarako eskualde-estrategiaren proposamen bat aurkeztuko du, eskualdearen etorkizun oparoa modu partekatu eta mailakatuan eraikitzeko oinarria izan dadin. Konpromiso hori hartu du gaur EH Bilduk.
Gainera, EH Bilduk doluminak eta hurbiltasuna adierazi nahi izan dizkie David Callejaren senide eta lagunei. Aldi berean, upategietan zuhurtzia handiz jokatzeko deia egin du, sektoreak egun hauetan jasaten dituen zailtasunak eta estresa gorabehera.