AKTUALITATEA

| 2022-09-21 11:52:00

Araba. 2022-09-21 | EH Bildu Arabako batzarkide taldeak hainbat galdera erregistratu ditu gaur Samaniegoko egoitzako erabiltzaileen lekualdatzeari buruzko informazio ezari buruz, zentroa birgaitzeko lanen ondorioz.

Duela hilabete batzuk Samaniegoko foru egoitzaren erreforma integrala iragarri zen. Gizarte Politiketako Departamentuak EH Bilduri emandako erantzun batean, Foru Erakundeak esan zuen erabiltzaileak lurraldeko beste zentro batzuetara eraman behar zirela, eta erantzun berean jakinarazi zen apirilean informazio-hitzaldiak izango zirela bai familiekin, bai egoitza horretako profesionalekin. Informazio hori ez da iritsi, EH Bilduren arabera.

Zehazki, Gizarte Politiketako diputatuak urriaren 5eko kontroleko osoko bilkuran erantzun beharko du obren epeei eta erabiltzaileen eta langileen lekualdatzeei buruz; izan ere, langile horiek beraiek kezka helarazi diote EH Bilduri zentroaren antolaketari buruz, itxita dagoen bitartean.

Desinformazioa

Claudia Venceslao EH Bilduko batzarkidea kezkatuta agertu da egoera horrek ekar ditzakeen arazoengatik: «Kezkatzen gaitu Foru Erakundeak ez ematea informaziorik, ez familiei, ezta profesionalei ere, eta haiek guregana jo behar izatea informazio gehiago ote dugun jakiteko», adierazi du.

Desinformazioa agerikoa da, baina Venceslaok erabiltzaileen egoera azpimarratu du, duten izaeragatik. «Kontuan izan behar dugu oso adineko pertsonez ari garela, horietako batzuk narriadura fisiko eta kognitibo oso larria dutenak, eta Gasteizera eramateak familia eta gizarte ingurunea deserrotzea ekar dezakeela».

EH Bilduk egoera lehenbailehen konpontzea eta erabiltzaileei, langileei eta senideei beharrezko informazioa ematea espero du. «Espero dugu Gizarte Politiketako Sailak Samaniegoren antolaketari buruz hartzen dituen erabakiak erabiltzaileak eta haien familiak zaintzean eta errespetatzean izatea oinarria».