AKTUALITATEA

Laudioko Udalak parte-hartze eredu berria gauzatzeko lehen pausoak eman ditu, eta, horretarako, hasiera batean 2022ko maiatzetik indarrean dagoen eta oraindik zabaldu ez diren aurrerapen handiak ahalbidetzen dituen Gardentasunaren eta Herritarren Partaidetzaren Erregelamendua hartuko du oinarri. Abian jartzeko lehen fase honetan, Udalak partaidetza-dinamikak birformulatu ditu, koherentzia sekuentzial, sakontasun eta informazio handiagoa eta herritarren ahalduntzea lortzeko, araudiak berak planteatzen duen bezala.

EH Bildu-Omnia Gobernu-taldea lanean ari da Batzarren aurreko informazioa hobetzeko. Horretarako, Udalak azken urteetan egindako batzarren akta guztien laburpena helaraziko die Laudioko auzo guztietako bizilagunei, planteatutako proposamen eta kezka guztiekin, batzarretara doazen pertsonek informazio zehatza eta eguneratua izan dezaten.

“Hau lehen fase bat baino ez da, baina prozesu horien metodologian sakontzen joango gara, parte hartzea zabaltzeko baldintza garrantzitsua delako. Nolanahi ere, 2024ko esperientzian oinarrituta, berrikuntza horiek guztiak berrikusi eta hobetu egingo dira 2025erako”, ziurtatu du Nagore Gomara Zeharkako Politiketako zinegotziak.

AUZO KONTSEILUEN SORRERA

Auzo batzarrak azaroan deituko dira, Udalak erabiltzen dituen ohiko komunikabideen bidez, eta berrikuntza garrantzitsuak izango dituzte, horien artean Auzo Kontseiluen sorrera. Azken helburua auzo bakoitzak bere kontseilua osatzea da, bertan aurkeztutako proposamenak batzarren artean bultzatzeko. Organo horren bidez, gehienez ere bi ordezkari izendatuko dira Auzo Batzarren Jarraipen Batzorderako, eta ordezkari bat udalerriko garapen estrategikoaren, ekonomikoaren, sozialaren, kulturalaren eta jasangarritasunaren inguruan eztabaidatzeko eta parte hartzeko organo gorena den Toki Kontseilurako. Horrela, gune bakoitzeko pertsonen ordezkaritzak defendatuko ditu haren interesak eta beharrak tokiko foroetan eta Laudioko beste eremu batzuetako teknikarien eta ordezkarien aurrean.

Indarrean dagoen araudian jasotakoaren arabera, Udalak premiazko proposamenak eskatuko dizkie Auzo Batzarrei 2024ko aurrekontuetan sartzeko. Erregelamenduaren 26. artikuluak Udal Aurrekontua egiten parte hartzeko eskubidea bermatzeko beharra jasotzen du. Horretarako, Udalak legegintzaldi bakoitzean gauzatu beharreko helburu estrategiko nagusiak hautatzeko prozesua jarriko du abian, bai eta helburu horiek lehenesteko prozesua ere.

Kontua da herritarrek, parte hartzeko askotariko mekanismoen bidez (guneetakoak, sektorialak eta tokikoak), aurrekontu osoaren definizioan parte hartzea, eta ez aurrekontuaren parte txiki batean bakarrik; beraz, helburua da urte batzuen buruan aurrekontu osoak parte-hartzaileak izatea.

Gauzak horrela, orain arte Aurrekontu Parte-hartzaileak deiturikoak “Auzo- partidak” izango dira aurrerantzean, eta aurrekontu osoa egiteko parte-hartze prozesuan jaso ez diren proposamenei bide eta aukera emateko balio izango dute.

“Aurrekontu berriak lantzen ari gara, eta haien parte operatiboenari eta arruntenari dagokionez datorren urtearen hasieran sartuko dira indarrean. Bizilagunen parte- hartzeari bide emateko eta, horrela, onartutako araudia bete ahal izateko, eta 2023ko likidazio erreala izan eta benetan erabilgarri dauden zenbatekoak ezagutu ahal izateko, datorren udaberrian aurrekontuaren aldaketa egingo da”, azaldu du Jakin Artaraz, Gardentasuneko zinegotziak.