AKTUALITATEA

EH Bildu pozik agertu da Araba zeharkatuko zuen linea elektrikoa ez delako eraikiko

| 2025-08-28 11:10:00

Alderdiak lehen ere adierazi zuen ez zegoela ados azpiegiturarekin, eta argudiatu zuen ez zela onargarria Araba zeharkatzea beste erkidego batzuetan sortutako energia husteko

Araba. 2025-08-28 | EH Bildu Araba pozik agertu da gaur Trantsizio Ekologikorako Ministerioak Forestaliako energia ebakuatzeko proiektua ukatu duelako, zeinak jasotzen baitzuen lurraldea goi-tentsioko linea batekin zeharkatzea.

Zehazki, Aragoiko lau parke eolikoren proiektuetarako baimenak ukatu ditu Ministerioak; parke horien energia Miranda de Ebron ebakuatu nahi zuten, Arabako hainbat udalerri goi tentsioko linea batekin zeharkatuz.

Bigarren aldia da Espainiako Ministerioak Forestalia enpresaren proiektu handiak baztertzen dituela, joan den martxoan Arabari eragiten zion beste proiektu handi bat ere baztertu baitzuen.

Albiste horien aurrean, EH Bildu pozik agertu da, eta berretsi egin du aurreko aldietan esandakoa: «Ez du inolako zentzurik autobide elektriko handi horiek Araba zeharkatzea beste erkidego batzuetan sortutako energia husteko: lurraldea eta bertan bizi diren pertsonak kontuan hartuko dituen trantsizio ekosozialaren aldeko apustua egiten jarraituko dugu».

Orain espero daitekeena da Eusko Jaurlaritzak ere arduraz jokatzea eta Solaria enpresak Araban diseinatuta duen proiektua ukatzea. Proiektu horrek Espainiako Gobernuak errefusatutakoaren antzeko ezaugarriak ditu, eta helburu bera du: energia sortzea, ez tokiko komunitateen beharrei erantzuteko, baizik eta energia beste leku batzuetara eramateko, lurralde osoa goi-tentsioko lineen bidez zeharkatuz.