AKTUALITATEA

| 2025-08-29 08:07:00

Upeltegi txikiak eta mahats-ekoizleak babesgabe daudela baieztatu du, ezustean hartutako erabaki baten aurrean, aldez aurretik inolako kontrasterik eta parte-hartzerik gabe, eta beste edozein ohartarazpenen aurrean tabula rasa eginez

Arabako Foru Aldundiari eta Eusko Jaurlaritzari eskatu die Arabatik kanpo hartzen diren eta mahastizainei eta Arabako Errioxako eskualdeari zuzenean eragiten dieten erabakien aurrean ekimena har dezatela

Araba. 2025-08-29 | EH Bilduren ustez, Errioxako JDKren Kontseiluak mahats-bilketa hasi eta aste gutxira mahats-bilketaren errendimenduak murrizteko hartu duen erabakia erabaki txarra da, aldebakarrekoa eta bertikalista baita, eta ez baititu konponduko Arabako Errioxako ardoaren sektoreari eragiten dioten arazo estrategikoak eta epe laburrekoak. Gainera, berriro ere agerian uzten du Ramiro Gonzalezen eta Imanol Pradalesen gobernuek ez dutela beren lege-esparru propioa bultzatzeko eta garatzeko gaitasunik, alde batetik, gure ardoak bereizteko, eta, bestetik, Arabako mahastizaintza eta ardogintzaren sektorea ahalduntzeko, kontuan hartuta oso testuinguru zailean daudela bere norabidea erabakitzeko (ardoaren kontsumoa mundu osoan jaistea, klima-aldaketaren ondorioak, Trumpen gobernuak aldebakarreko muga-zergak ezartzea...).

Kontseilu Arautzailearen erabakiak ez du zerikusirik Errioxako ardoaren kalitatearen defentsarekin, ez du aukerarik emango upategi handi batzuen jarduera irregularrei muga jartzeko, eta ez du eragin positiborik izango mahatsagatik ordaindu beharreko prezioan. Gainera, ezorduko erabakia da, abuztuaren erdialdean hartua, mahats-bilketa hasi aurretik hamabost egun eskasera, nahiz eta mahats-bilketarako errendimenduak maiatzean erabaki zituen Kontseilu Arautzaileak berak. Beste edozein auziren aurrean, tabula rasa egiten duen erabakia da, nahiz eta alde nabarmenak dauden Errioxako herriei aitortutako errendimenduen eta Arabako herri mugakideei aitortutako errendimenduen artean. Errioxako ardoen irudia hondatzen duen erabakia dela ere esan daiteke, Kontseilu Arautzailearen jarrera itxiaren ondorioz (bereizketarik ez egitea), merkatuan kalitate eta prezio aldetik alde handiak dituzten produktuak aurki baitaitezke.

Azkenik, EH Bilduk Foru Gobernuari eta Eusko Jaurlaritzari eskatzen die, beste behin ere, Arabako Errioxako ardoek, horien ekoizleek eta Kuadrilla osoak garapen-esparru endogenoa, ahaldundua eta erabakiak hartzeko eta ezartzeko gaitasuna duena izan dezaten, are gehiago egungo testuinguru konplexuan.