AKTUALITATEA

| 2023-09-29 10:18:00

Ardogintzaz harago, EH Bilduk gogora ekarri du eskualderako plan estrategiko proposamena aurkeztu zuela joan den maiatzean, ikuspegi globalarekin eta bertako eragileekin elkarlanean

Araba. 2023-09-29 | EH Bildu Araba batzarkide taldeak diputatu nagusia interpelatuko du datorren asteazkeneko kontrolerako osoko bilkuran, eskatzeko ibilbide-orri argi bat abiatu dezala Arabako Errioxan, «eskualdearen eta ardogintzaren biziraupenerako».

Eva Lopez de Arroyabe EH Bildu Arabaren bozeramaileak deskribatu du Arabako Errioxaren eta ardogintzaren egungo egoera, eta nabarmendu du ziurgabetasuna eta mesfidantza direla nagusi eskualdean. Horien arrazoi gisa aipatu ditu enpresa-talde handien lehia desleiala, kalitate handiko ardoak ezin posizionatzea, mahatsaren prezioa, ardo soberakina eta lurrak erosteko zailtasunak.

Horren aurrean, Arabako Errioxako eragile guztien parte-hartzea aldarrikatu du bozeramaileak, ardogintzan ari diren pertsona guztien bizi-kalitate duina bermatzeko: «Pertsona, familia-upategi eta upategi txikiei egiturazko laguntza eman behar zaie, denboran zehar mantenduz, eskualdearen parte izateaz harro senti daitezen, etorkizunari aurre egiteko gai, eta erabakien erdigunean daudela senti dezaten, haiek baitira biztanleria finkatzen dutenak eta eskualdearen benetako aberastasuna eta kohesioa sortzen dutenak. Horregatik guztiagatik, mugitzeko eta premiazko erantzunak emateko garaia dela uste dugu». Ibilbide-orri argia eskatu du Lopez de Arroyabek.

Plan Estrategikoa

Hala, diputatu nagusiari interpelazioa egingo dio EH Bilduk, Arabako Errioxako upategiak babes ditzan, bertako ardoen bereiztasunaren eskaeran. Horrekin batera, mahats-bilketa ekonomikoki eta sozialki bideragarria izan dadin laguntzak eskatuko dituzte familiako upategi eta upategi txikientzat. Azkenik, mahatsaren prezio duina bermatzeko neurriak eskatuko dituzte, ekoizpen-kostuen gainetik egon dadin eta elikadura-katearen legea bete dadin.

Ardogintzaz harago, Lopez de Arroyabek gogora ekarri du EH Bilduk joan den maiatzean aurkeztu zuela Arabako Errioxarako Plan Estrategiko proposamena. Dokumentuan, eskualdearen diagnostiko zehatza egin zuten, eta eragiteko 20 ardatz identifikatu zituzten, mahastizain eta langileentzako baldintza duinak bermatzetik, zerbitzuen eta negozioen dibertsifikaziora arte. «Arabako Errioxaren etorkizuna ziurtatu behar da, eta uste dugu beharrezkoa dela eskualde-ikuspegiarekin lan egitea», amaitu du Lopez de Arroyabek.