AKTUALITATEA

| 2026-01-16 11:28:00

EH Bilduk mozioa aurkeztu zuen, gogora ekarrita Arartekoak eskolari euskararen tratamenduari buruzko plan bat egitea gomendatu ziola

Araba. 16-01-2026 | EH Bilduren proposamen batean oinarrituta, Arabako Batzar Nagusiek euskararen erabilera sustatzeko eta normalizatzeko plan bat egiteko eskatu diete gaur Arabako Foru Aldundiaren ordezkaritzari eta Arte eta Lanbide Eskolaren Patronatuko lehendakariari.

EH Bildu Araba batzarkide taldeak aurkeztutako jatorrizko mozioak argudiatzen zuen Arabako Foru Aldundiaren Gobernu Planak jasotzen duela Gobernuaren jarduera-ildoa dela "euskararen zeharkakotasuna sustatzea gizartearen esparru guztietan". Halaber, Araban Euskararen Erabilera Sustatzeko Plan Estrategikoak (2025-2029) helburu orokor gisa jasotzen du Aldundiak lanean jarraituko duela "lurraldean euskaraz bizitzeko aukerak bermatuko dituzten baldintzak sortzeko".

EH Bilduren arabera, «Arte eta Lanbide Eskolak euskara esparru akademikotik atera eta aisialdiko eskaintzan integratzeko lana du», eta gogorarazi du «eskola funts publikoak jasotzen dituen fundazioa»" dela. Izan ere, Aldundia Patronatuko kide da, eta une honetan Kultura eta Kirol diputatuak, Aldundiaren ordezkari gisa, presidente kargua du. EH Bilduren ustez, «eskola gune egokia da hizkuntza politikarako neurriak bultzatzeko, horrela nahi duten herritarrei euskaraz bizitzeko aukerak eskainiko dizkietenak».

Arartekoaren gomendioa

Gainera, EH Bilduk gogorarazi du iaz Arartekoak kexa bat jaso zuela Arte eta Lanbide Eskolan ikasleen eta eskolarekin harremana duten gainerako pertsonen hizkuntza eskubideak bermatzen ez direlako. Arartekoak kexa onartu eta izapidetu zuen, eta eskola-egoera eta dagokion esparruko hainbat araudi aztertu ondoren, gomendio hau egin zuen: Gasteizko Arte eta Lanbide Eskolaren kudeaketa-eremuetan euskararen tratamenduari buruzko plan espezifiko bat egin eta onar dezala. Gomendioa 2025eko ekainaren 9koa den arren, eskolan oraindik ez da plan espezifikorik aurkeztu.

Gaur onartutako mozioan, Arabako Foru Aldundiaren ordezkaritzari eta Arte eta Lanbide Eskolaren Patronatuko Lehendakaritzari eskatzen diete zentro horren egungo Kudeaketa Plana eta euskararen trataerari buruzko neurriak hedatzen jarraitzeko. Halaber, euskararen erabileraren egungo egoeraren azterketa, bete beharreko helburuak eta 2026ko lehen hiruhilekoa amaitu baino lehen ebaluatzeko denbora-aurreikuspenak proposatu eta gidatzea eskatzen da. Azkenik, Euskara Plan bat onartzea eskatzen da, Arte eta Lanbide Eskolan euskararen erabilera sustatzeko eta normalizatzeko ekintzak eta neurriak eta ebaluazio-mekanismoak ezartzeko.