AKTUALITATEA

| 2026-07-21 11:11:00

Aiaraldeko Industria Garapenaren aldeko Mahaiaren saioetan, EH Bilduk 80 proposamen zehatz inguru egin ditu, eta horietako batzuk Ondorioen Txostenean jasota daude

Aiaraldea. 2026-07-21 | Aiaraldeko Garapen Industrialaren aldeko Mahaiaren Ondorioen Txostena jaso ondoren, EH Bilduk uste du ez dela Aiaraldea biziberritzeko behar den ibilbide-orria, baina pozik agertu da, organo horretara eraman dituen 80 proposamenetako batzuk islatuta ikusten dituelako, eta, beraz, bertan parte hartzen jarraitzeko konpromisoa hartu du, mahai hori Aiaraldeko biztanleen errealitatera hurbiltzeko.

EH Bilduk eskualde mailako beharrezko ikuspegia eta koordinazioa azpimarratu ditu, banaketa administratiboa gaindituz. 2025eko azaroan, EH Bilduk salatu zuen Mahaia herren jaio zela, ez zituelako erakunde eta eragile eskudun guztiak batzen. «Gure ustez, ezinbestekoa da inbertsioak Aiaraldearen ikuspegi orokorrarekin koordinatu eta bideratuko dituen zuzendaritza estrategikoa, banaketa administratiboa gaindituz». Hala eta guztiz ere, EH Bildu pozik agertu da bere ekarpenak kontuan hartu direlako.

Azken testuan jasotzen diren EH Bilduren proposamenen artean, Aiaraldeko Eskola Mapa eguneratzeko beharra dago, eskualde naturaleko Lanbide Heziketaren plangintza egiteko, hau da, Bizkaiko herriak barne hartuko dituena, baita industria-lurzoruaren kudeaketa koordinatuta ere, erakunde publiko batek kudeatzen duen udalaz gaindiko industrialde baten bidez.

Era berean, kontsumo-lekutik gertu energia berriztagarria sortzeko beharra jasotzen da, eta, horregatik, ezinbestekoa da udalerri bakoitzaren behar energetikoak eta horiek energia berriztagarriz asetzeko duten gaitasuna ezagutzea, Aiarak eta Artziniegak egin duten bezala, edo Laudiok argitaratu berri duten Eguzki Mapa lantzearekin hasi duen bezala.

Hala ere, EH Bilduk faltan botatzen du azken testuak enpresen aldetik lan baldintza duinak bermatzearen garrantzia ez nabarmentzea edo Aiaraldeak bizi-kalitate duina bermatzeko dituen zerbitzuetan inbertitzea, «Aiaraldea bizitzeko eta lan egiteko leku ona delako». Talde subiranistak bi faktore horien garrantzia azpimarratu nahi izan du, lan-baldintzak eta zerbitzuak, herritarren ongizatea bermatzeko giltzarriak direlako. Ildo horretan, C3 aldirietako linea hobetzeko premia nabarmena azpimarratu dute, une honetan langileek lanera joateko trena erabiltzeko behar den fidagarritasuna eskaintzen ez duena. Hori dela eta, ezinbestekoa da, alde batetik, haren erabilera sustatzeko funtzionamendua optimizatzea, eta, bestetik, maiztasunak handitzea, Aiaraldean bertan ere garraiobide bat izan dadin.

Gainera, EH Bilduk uste du etsigarria dela ondorioetan kontuan hartu ez izana «Aiaraldeak "talentu kolektibo" handia duela, horixe utzi baitute agerian eskualdeko enpresetako plantillek ». EH Bilduren arabera, «talentu kolektibo hori eskualdeko industria-ehunari eusteko gai izan da eta da, baita unerik txarrenetan ere, edo eskualdeko enpresak punta-puntakoak izan daitezen laguntzeko gai». Gaitasun horren egiaztapena eskualdeko produktibitate-datuetan islatzen da, Euskal Autonomia Erkidegoko altuena baita.

Berrikuntzari dagokionez, EH Bilduk enpresa handien eta txikien errealitatea ezagutuko duen dinamizazioa proposatu zuen, enpresa handiek egiten dituzten ikerketak txikietara halarazi ahal izateko. Gainera, azken testuak ez du aipatzen EH Bilduk eskualdeko industrialdeen hobekuntzan inbertitzeko egindako proposamena. Ekoizpenari dagokionez, EH Bilduk industriako hondar-beroa berreskuratzea proposatu zuen, baita etxebizitzen berokuntza-sistemetara zabaltzea ere.

Azkenik, EH Bilduk beste behin nabarmendu nahi izan du koordinazio handiagoa behar dela. «Sei urte dira eskualde naturaleko udalerri guztiak bilduko dituen eta ekonomia- eta gizarte-eragileak ere bilduko dituen organo bat sortzeko beharra planteatu genuela. Uste dugu denbora oso baliotsua galtzen ari garela eskualde honetako industriaren beharrezko dibertsifikazioari eta deskarbonizazioari ekiteko, eskualdearen benetako biziberritzea bultzatzeko», adierazi dute EH Bildutik.