AKTUALITATEA

| 2021-06-30 12:25:00

. Legegintzaldiaren bi urte bete direnean, EH Bildu Agurainek azken bi urteetako udalerriaren bilakaera aztertzeko aprobetxatu du, EAJren Gobernuak "ekimen gutxi" izan dituela eta "zegoenari eta ezer gutxi gehiagori eustera mugatu dela" ondorioztatuz. Gainera, herriaren beharrak eta iritziak sistematikoki baztertu dituela uste du, Eusko Jaurlaritzak Iturrietako mendietan inposatu nahi duen zentral eolikoarekin frogatu den bezala. Hausnarketa horiek guztiak partekatzeko, EH Bildu Agurainek batzar ireki batera deitu ditu herritarrak, bihar, uztailak 1, 18: 30ean, Aguraingo Udaletxeko bilkura aretoan.

 

EAJren jarrera horren aurrean, EH Bilduk oposiziotik legealdiaren lehen bi urteetan egindako lana goraipatu du. "Lan nekaezina egin dugu, eta bi urte hauetan dozenaka proposamen egin ditugu: hobekuntzak udal-langileentzat, gizarte-zerbitzuak, aurrekontuak, koronabirusak eragindako krisi soziosanitarioa gainditzeko neurriak, hobekuntza Ergoienentzat, kirola, kultura, energia, zaborra eta abar. Horietako asko Udalean proposatu ondoren jarri dira martxan, eta gehienak gure udalerriko eragile sozial, ekonomiko eta kulturalekin izandako bileren ondorio dira. “EH Bildurentzat parte-hartzea ezinbestekoa delako eta aurrera eramatea ere, ez dira hitzak, ekintzak baizik”,  zehaztu du Raul Lopez de Uralde Aguraingo EH Bilduren bozeramaileak.

 

EH Bilduk egindako proposamenen artean kirol proiektua nabarmentzen da. Ildo horretan, EH Bilduk kirol batzorde bat martxan jartzearen alde egin du, egungo instalazioen gabezia larriak konponduko dituen proiektu bat adosteko. EH Bilduk dagoeneko mahai gainean jarri du erabilera anitzeko instalazio berri bat eraikitzeko eta egungo instalazioak konpontzeko beharra. Horrez gain, aire zabaleko kirol-espazioak sortzearen eta Ergoienetara bide berde bat egitearen aldeko apustua egin du.

Garraioari dagokionez, EH Bilduk Agurain eta Gasteiz lotzen dituen autobus zerbitzua berehala hobetzea eskatu du, maiztasuna nabarmen murriztu baita. Era berean, EH Bilduk tren soziala bultzatzen jarraituko du Altsasu eta Miranda arteko korridorean, korridoreko herriei zerbitzua emateko eta kalitatezko garraioa izateko.

 

Azkenik, EH Bildu Agurainek kaleko langile kopurua handitzearen aldeko apustua egin du, eta, horrela, Udalak langile gabeziei aurre egiteko martxan jarri duen azpikontratazio politikarekin amaitu nahi du. Horrez gain, Barrioko eta Sallurtegiko baserrietara edateko ura eramateko beharra azpimarratu du.