Agurain

EH Bilduk milioi bat euroko zuzenketak aurkeztu dizkio Aguraingo aurrekontu proiektuari

Udal gobernuak aurkeztu dituen aurrekontu kontinuista eta irrealen aurrean, EH Bilduren zuzenketek hiru helburu dituzte: pandemiak eragindako beharrei erantzutea, babes soziala indartzea eta ingurumenaren aldetik arduratsuagoa den udalerri baterantz aurrera egitea

| 2020-11-11 12:44:00

EH Bilduk milioi bat eurotik gorako balioa duten zuzenketak egin dizkio Aguraingo aurrekontuen proiektuari.  Guztira, hamar zuzenketa dira eta bihar eztabaidatuko dira osoko bilkuran. EH Bilduren ustez, EAJren Udal Gobernuak aurkeztu dituen aurrekontuak “kontinuistak eta irrealak” dira. Hori dela eta, hiru dira zuzenketa horien helburuak: pandemiak eragindako beharrei erantzutea, babes soziala indartzea eta ingurumenaren aldetik arduratsuagoa den udalerri baterantz aurrera egitea.
Lehenengo kasuan, pandemiaren ondorio sanitarioak eta sozioekonomikoak gehien pairatzen ari diren sektoreei laguntzak emateko aurrekontu partida bikoiztea proposatu du EH Bilduk. Partida hori 130.00 eurokoa izango litzateke. Ildo horretan, EH Bilduk proposatu du hiri-altzarietan inbertitzeko dirua handitzea eta eraikin eta parke publikoen garbiketa eta desinfekzioa indartzeko beste diru partida bat sortzea, 35.000koa hain zuzen.

Bigarren kasuan, babes soziala indartzeko asmoz, pandemiaren garaian sortu diren herritarren zaintza sareekin elkarlanean aritzeko 10.000 euroko partida bat sartu du EH Bilduk. Halaber, Oinarrizko Gizarte Zerbitzuan langile gehiago izateko beharra azpimarratu du, eta, horretarako, administrazioan pertsona bat gehiago kontratatzea eta gizarte-laguntzen partida 10.000 eurora igotzea proposatu du, Udal Gobernuak aurreikusitako 1.500 euroen ordez.

"Datorren urterako aurrekontuak pandemiak sortutako behar berriei erantzun behar diela uste dugu, ondorioak pairatzen ari direnei programak eta laguntzak eskaini behar dizkiegu eta Agurain iraunkorrago baterantz jo behar dugu. Inori ez zaio ihes egiten gure gizarte-arreta hobetu behar dugula, pertsona askok lana galdu dutela edota lana galtzeko arriskua dutela edo establezimenduak itxita dituztela. Zentzu horretan ekarpenak egin ditugu eta ildo horretan akordioak lortzeko prest gaude ", esan du Raul Lopez de Uralde Aguraingo EH Bilduko bozeramaileak.

Bestalde, EH Bilduk proposatu du 275.000 euroko partida bat sortzea gazteentzako alokairu sozialeko etxebizitzak egiteko Bustamante Jauregian. Proiektu hori finantzatzeko, EH Bilduk Eusko Jaurlaritzaren eta Arabako Foru Aldundiaren laguntzak ere aurreikusi ditu.



Plaka fotovoltaikoak 22 eraikin publikotan


Azkenik, trantsizio energetikoari dagokionez, EH Bilduk hiru zuzenketa egin dizkio aurrekontu proiektuari. Handiena 500.000 eurokoa da, 22 eraikin publikotan plaka fotovoltaikoak jartzeko. Beste 150.000 euro, berriz, Jubilatuen Etxean eta igerileku estalian gasoliozko berogailua biomasarekin ordezkatzeko izango lirateke. Mugikortasunari dagokionez, EH Bilduk 5.000 euro sartu ditu udalerriaren beharrei erantzungo dien tren soziala bultzatzeko, orain, trenaren eta autobusaren maiztasunak nabarmen murriztu baitira.

Hau guztia aurrera eramateko, EH Bilduk lehentasunezkoak ez diren hainbat proiektuei edo geroratu daitezkeen proiektuei aurrekontu sailak erabili ditu. Horien artean, besteak beste, bilketa neumatikoaren zabalpena edo San Juan plazako konponketa daude.

 

 

Koronabirusak eragindako krisiaren aurkako 15 neurri proposatu ditugu Aguraingo Udaletxean

Raúl Lopez de Uralde: “Eragile ezberdinekin harremanetan izan ostean, osasun krisiari eremu sozialean, zerga politikan eta garapen ekonomiko arloan erantzuteko hainbat proposamen egingo ditugu”

| 2020-04-03 21:00:00

COVID 19-k eragindako krisi sozio-sanitarioa hasi zenetik, behin eta berriz eskatu dugu udal krisi mahai bat sortzea talde politiko guztien artean orain arte hartutako neurrien balorazioa egiteko eta aurrera begirako proposamenak egiteko, elkarlanean aritzeko, alegia. López de Uraldek azpimarratu duen moduan, “krisi honen hasieratik luzatu diogu elkarlanerako eskua Gobernu Taldeari baina, behin eta berriz, Aguraingo Alkateak entzungor egin du, ez du elkarlanerako inolako borondaterik adierazi”. Hainbat proposamen egin genizkion Udalari pasa den martxoaren 18an eta hauetako asko berandu eta oposizioarekin kontatu gabe gauzatzen joan da Udala. “Espero dugu, oraingoan, arlo sozialean, zerga politikan eta garapen ekonomikoan aurkezten ditugun neurri berriak elkarlanean eztabaidatu eta aurrera eramateko aukera ematea” gaineratu du Lopez de Uraldek. Izan ere, “krisi honetatik ahalik eta azkarren eta ahalik eta hobekien ateratzea guztion ardura da”

Enplegu publikoari dagokionez, udaleko langileek eta azpikontratatutako enpresetako langile subrogatuek beraien lan baldintzetan krisiaren ondoriozko kalterik ez pairatzeko neurriak proposatu ditugu, hala nola, azpikontratatutako enpresekin kontratuak indarrean mantentzea, telelana bultzatzea edota langileei online bidezko formazio kurtsoak eskaintzea adibidez. Horrez gain, langileen osasuna zaintzeko segurtasun protokoloak betetzen direla kontrolatzea ere eskatu dugu.

Neurri sozialei dagokienez, planteatzen dugu adinekoak eta behar bereziak dituzten pertsonak laguntzeko Agurainen sortu den herritarren sarearekin elkarlana sustatzea bilatu behar duela Udalak, behar dituzten baliabideak eta laguntza eskainiz. Horrez gain, gure ustez, bakarrik edo arrisku egoeran egon daitezkeen herritarrak identifikatzeko bideak erraztu behar dira, bai telefono bat eskainiz, bai zuzeneko jarraipena eginez udal zerbitzuetatik. Indarkeria matxista pairatzen duten emakumeei arreta berezia jartzea ere eskatu dugu.

Bestalde, etxeko langileei zaintza eta babesa berezia eskaintzea ezinbestekoa jotzen dugu, askok lana galdu dutelako eta beste askok lan-baldintzak zein osasun-baldintzak bermatuta ez dituztelako. Era berean, Etxez Etxeko Laguntza eta Sallurtegi Egoitzako gizarte langileei ostatu seguruak eskaintzeko saiakera egitea ere eskatu dugu.

 

Zerga politika eta tokiko aktibazio ekonomikoa

Zerga politikari dagokionez, alarma egoeran jarduera eten edo minimoetan mantendu behar izan duten enpresa txiki, ostalari, zerbitzu edo merkatariei laguntzeko hainbat neurri proposatu ditugu. Hala nola, zerga, tasa eta prezio publiko ororen ordainketa atzeratu edo zatikatzea, Agurainen jarduera ekonomikoa gauzatzen duten ibilgailuen gaineko zergari %50eko hobaria aplikatzea, lurzoru publikoaren okupazio tasa martxotik ekainera bitartean salbuestea, edota zabor eta ur tasetan %25eko hobaria aplikatzea, besteak beste.

Azkenik, garapen ekonomikoaren arloan, enpresa eta merkataritzaren aktibazioa dinamizatzeko gaur egun ACICSArekin dadoen Udal hitzarmena indartzea proposatzen dugu eta, tokiko eta eskualdeko ekoizle eta merkatariak babesteko asmoz, haientzako astearteko azoka mantentzea ere proposatu dugu. “Horretarako baliabideak eskaini behar dira, erosleei nahiz ekoizleei eragingo dien segurtasun neurri berezien protokolo bat jarraituta eta salmenta egungo errealitatera egokituta” azaldu du Lopez de Uraldek.

Hemen duzue osorik Udalera bideratutako idatzia https://issuu.com/ehbilduagurain/docs/200403_medidas_covid-19

UDALETXEKO GURE BULEGOA IREKIKO DUGU ASTEARTERO, HERRITARREKIN HARREMANA SUSTATZEKO

“Asteartero goizeko 10etatik 12etara bulegoan egongo gara jendeak behar duen guztirako prest. Informatu nahi dugu, baina baita entzun ere. Nahi duten guztiek gugana jo dezakete bulegora hurbilduz, ordutegi horren barruan 607269024 zenbakira deituz edota agurain@ehbildu.eus helbidera idatziz”

| 2020-02-05 12:12:00

Datorren asteartean, otsailaren 12an, udaletxeko bigarren pisuan dugun bulegoa nahi duen herritar ororentzat irekiko dugu, modu honetan zalantzak, kexak eta proposamenak modu egokiagoan artatuko ditugularik.

Gardentasuna eta herritarrekin harreman zuzenaren aldeko apustua egin dugu beti eta komunikazio bide bat gehiago eskaini nahi diogu biztanlegoari, kaleko harremana, batzar irekiak eta sare sozialez gain. Honen helburua gure udal lanaz eta alkatetzan dagoen EAJk hartutako erabakiez informatzea da. EAJk udal arauditik herritarron partehartzea sustatzeko kapitulua kendu zuen alkatetza berreskuratzean eta honi batzar irekien murrizketa, zein udal aldizkarian eta zaharkitutako webgunean dagoen informazio falta gehituz gero, jendeak duen informazio falta ez dela asetzen uste dugu. Abiatuko dugun arreta zerbitzu honen bitartez, Agurain zein Ergoinetako biztanleek merezi duten informazioa jasotzea ahalbideratuko dugula espero dugu.

Udal igerilekuetako erabiltzaileek online egindako 200 iritziak erregistratu ditu EH Bilduk Aguraingo Udalean

Alkateak zerbitzuaren balorazio bat egin nahi du soilik iritzi teknikoa eta politikoa sartuz

| 2019-11-20 11:38:00

EH Bilduk Aguraingo Udalean udal igerilekuetako erabiltzaileen iritziak erregistratzea erabaki du alkateak iraileko bilkuran zin egin zuen balorazioan. Izan ere, Gobernu taldeak egin nahi duen zerbitzuaren balorazion soilik iritzi teknikoa eta politikoa hartuko ditu kontutan. Egoera horren aurrean, EH Bilduk erabiltzaileei galdetzea eskatu zuen baina Ernesto Sainz Lanchares alkateak baztertu zuen aukera hori eta “soilik jasotako kexak kontuan hartuko direla” iragarri zuen, aldeko zein kontrako beste iritziak kontuan izan gabe. Hau horrela, EHBilduk online inkesta bat egitea erabaki zuen iritzi hauek azken hilean zehar jasoz.

Bestalde, EH Bilduk hainbat zerbitzuen inguruan iritziak jaso zituen bere agintean (jolastoki, musika eskola, udako igeri lekua…) eta ezinbestekoa ikusten du erabiltzaileen iritziak jasotzea herritarrei eskaintzen zaien zerbitzua hobetu nahi bada. Hori dela eta, online egiteko inkesta bat abian jarri zuen eta modu eraikitzailean 200 bat herritarrek bete dute.

Azken urtean emandako aldaketarik inportanteena eta erabiltzaileek okerren baloratu dutena, tabernaren ordez saltzeko makinak jartzea izan da. EH Bilduk bere kezka adierazi zuen kontratuaren bete haustea izan zitekeelako eta, oraindik orain, kezka ez da argitu aldaketa hori bermatzen duen txosten juridikorik ez dagoelako.

Udal Gobernuak iritzi horiek behar bezalako garrantzia eman diezaien eta hobetzeko neurriak hartzeko orduan kontuan izan ditzan espero du EH Bilduk.

ALBISTEAK