AKTUALITATEA

| 2026-11-13

EH Bildu Mercabilbaoko instalazioetan izan da gaur, azken urteotan prezioek izan duten gorakada eta horrek euskal langileen eta familien ekonomian eragiten dituen ondorioak salatzeko. Testuinguru horretan, Oskar Matute Kongresurako Bizkaiko zerrendaburuak eta Idurre Bideguren Senaturako Bizkaiko zerrendaburuak alderdiak Kongresuan eta Senatuan defendatuko dituen proposamenak aurkeztu dituzte, bizitzaren kostuaren garestitzeari aurre egiteko eta herritar guztiei bizi-baldintza duinak bermatzeko.

EH Bilduren proposamenen artean dago Euskal Herriko errealitate sozioekonomikora egokitutako Langilearteko Gutxieneko Soldata (LGS) propioa ezartzea, baita soldatak eta lan-baldintzak hobetzeko neurriak hartzea ere. Era berean, energiaren eta elikagaien sektoreko enpresa handiek kostuen igoeraren zati bat beren gain hartzea proposatzen du koalizioak, garestitze horren zama kontsumitzaileen eta familien gain gera ez dadin.

Oskar Matute Kongresurako Bizkaiko zerrendaburuak azpimarratu duenez, "dena igotzen ari da, bai, langileon soldata izan ezik". Horren aurrean, EH Bilduk "langileen eta familien alde balantza berrorekatzeko" konpromisoa hartu du, soldatak handituz eta lan-baldintzak hobetuz.

Matutek azaldu duenez, ezinbestekoa da energiaren eta elikagaien sektoreko enpresa handiek kostuen igoeraren erantzukizuna beren gain hartzea, "gehiegizko prezio horiek kontsumitzaileek ordaindu ez ditzaten". Haren hitzetan, "azaroaren 29an asko dugu jokoan. Soldata duinak eta bizitza eskuragarriak posible egitea ere dago jokoan".

Bestalde, Idurre Bideguren Senaturako Bizkaiko zerrendaburuak gogorarazi du herritarrek gero eta gehiago ordaintzen dutela eguneroko oinarrizko gastuetan: erosketa-saskian, argindarraren eta gasaren fakturetan zein erregaian. "Prezioen gorakada honek familia askotan du eragina; izan ere, haientzat gero eta zailagoa da hilabete amaierara iristea", adierazi du.

Bidegurenek nabarmendu du EH Bildu egoera horren jakitun dela, eta "anbizioz eta erantzukizunez lan egiteko" konpromisoa hartu duela. Ildo horretan, Euskal Herriko bizi-kostura eta errealitate sozioekonomikora egokitutako Langilearteko Gutxieneko Soldata propioa ezartzea proposatu du, "guztiontzako bizitza duina ziurtatzeko".