AKTUALITATEA

Ekonomia | 2026-09-16

EH Bilduk eta Esquerra Republicana de Catalunyak (ERC) bilera egin dute gaur goizean EH Bilduren Bilboko egoitzan, Espainiako Estatuko eta Munduko egoera politikoa aztertzeko ezker subiranista indar subiranistekin eta ezker konfederaleko alderdiekin egiten ari den aldebiko bileren barruan.

EH Bilduren ordezkariak hauek izan dira: Arnaldo Otegi idazkari nagusia, Sonia Jacinto Antolakuntza idazkaria eta Gorka Elejabarrieta Harreman idazkari eta Senatuko bozeramailea. ERCren aldetik, berriz, Oriol Junqueras presidenteak, Elisenda Alamany idazkari nagusiak eta Oriol Lopez idazkari nagusiaren albokoak parte hartu dute.

Topaketan zehar, bi alderdiek aspalditik duten lankidetza politiko eta estrategikoa indartzen jarraitzeko borondatea berretsi dute, agendak partekatzeko, ekimenak koordinatzeko eta Euskal Herriko eta Kataluniako herrien interesen defentsan elkarlanean sakontzeko helburuarekin. Zentzu horretan, Euskal Herria eta Katalunia herri zapalduak direla azpimarratu dute, eta konpromisoa agertu dute indarrak batzeko eta elkarrekin lanean aritzeko, independentzia lortzeko bidean.

Horren harira, Galesen (Plaid Cymru), Eskozian (Scottish National Party) eta Irlandan (Sinn Féin) agintean dauden alderdi independentistek hasitako estrategia txalotu dute. Aste honetan bertan, ordezkatzen dituzten nazio eta komunitateek anbizio gehiago, aukera ekonomiko gehiago eta ahots indartsuagoa merezi dutela uste duten agiria izenpetu dute hiru alderdiek. Horretarako, lankidetza esparru bat adostu dute, autodeterminazio eskubidea erreferendum baten bidez gauzatzeko.

Ezker subiranistak eta Esquerrak kezka agertu dute Espainiako Estatuan, Europan eta Munduan olatu autoritarioa eta atzerakoia gero eta handiagoa delako, eta nabarmendu dute bai Euskal Herriak eta bai Kataluniak lehen eskutik dakitela zer ondorio dituzten ideario horiek herritarren baldintza nazional eta sozialetan.

Testuinguru horretan, balio demokratikoekin konprometituta dauden indarren arteko lankidetza indartzeko beharra defendatu dute bi indar politikoek, erronka horri aurre egiteko.

Era berean, 0 kilometroko erakundeen eta politiken papera aldarrikatu dute, herritarren beharrei modu eraginkorrean erantzuteko funtsezko tresna gisa. Zentzu horretan, herri bakoitzeko errealitatera egokitutako eta biztanleriaren ongizatera bideratutako politika publikoak bultzatzearen garrantzia azpimarratu dute.

Azkenik, EH Bilduk eta ERCk berretsi egin dute oinarrizko eskubide sozialak eta zerbitzu publikoak defendatzeko eta indartzeko konpromisoa, batez ere osasun unibertsalaren, hezkuntzaren edo etxebizitza eskuratzearen esparruetan.