AKTUALITATEA

Ekonomia | 2026-09-24

EH Bilduko Nafarroako Parlamentuko bozeramaile Laura Aznalek indar aurrerakoien arteko akordioak sendotzeko eta gehiengo zabalak artikulatzen jarraitzeko beharra azpimarratu du ostegun honetan Foru Komunitatearen Egoerari buruzko Eztabaidan. Aznalen hitzetan, egungo testuinguru politiko eta sozialak “ausardia, zintzotasuna eta ekiteko konpromisoa” eskatzen ditu.

Parlamentuan egindako hitzaldian, EH Bilduko bozeramaileak adierazi du gaur egungo errealitatea “konplexua, askotarikoa eta multipolarra” dela, eta ohartarazi du erronka berriei ezin zaiela erantzun “errezeta sinpleekin”. Horren esanetan, orain arte erabilitako formulak ere ez dira nahikoak etorkizuneko erronkei aurre egiteko.

Horregatik, Aznalek defendatu du “orain arte egin ez dena egiteko garaia” dela, eta gehiengo politiko aurrerakoiak eguneratu eta indartu behar direla Nafarroarentzat proiektu eraldatzaile bat eraikitzeko. “Etorkizun hori oraina ere bada, gaur bertan hasten da”, nabarmendu du.

Hauteskunde-ziklo berri baten atarian, ezker subiranistako ordezkariak ohartarazi du atzera egiteko arriskuak badaudela, eta erresistentziatik ekintzara igarotzeko beharra azpimarratu du. “Dagoeneko ez du balio erresistitzea; ekiteko garaia da”, adierazi du, datozen urteetan “turbulentzia handiak” espero direla gaineratuz.

Aznalek, halaber, indar aurrerakoien arteko desberdintasunak aitortu ditu, baina horiek ez direla oztopo izan behar defendatu du. Bere ustez, beharrezkoa da gehiengo zabalak eraikitzen jarraitzea, “bloke atzerakoiari bidea ixteko” eta egungo une historikoak eskatzen dituen konpromisoak lortzeko.

Ildo horretan, zoru komun baten gainean eraikitako akordioak defendatu ditu. Aznalen esanetan, adostasun horietatik abiatuta, alderdi bakoitzak bere proiektu politikoa garatu ahal izango du, elkarlanaren eta errespetuaren bidetik.

Hitzaldia amaitzeko, EH Bilduren izenean, gainerako indar aurrerakoiei eta gizarte osoari lankidetzarako eskua luzatu die. “EH Bilduk aurrera egiteko ausardia, zintzotasuna eta ekiteko konpromisoa eskaintzen ditu”, adierazi du.