AKTUALITATEA

| 2023-12-19 12:58:00

Sopelako EHBildu, EAJ, PSE eta Elkarrekin Sopela talde politikoek, guztira 16 zinegotzik Udal Osoko Bilkuran dauden 17 zinegotzietatik), agiri bateratu eta indartsu bat sinatu dute Abaroko Plan Partzialaren garapena dela-eta, Sopelako Auzo Elkarteak aurkeztutako administrazioarekiko auzi-errekurtsoa bertan behera uzteko eskatuz. Sopelako Auzo Alternatibak zinegotzi bakarra du.

Abaron "Iberre" irakaskuntza ertainetako institutua handitzea, 490 BOE eraikitzea eta Gobelako ibarra biziberritzea aurreikusten da. Administrazioarekiko auzi-errekurtsoa hori aurkezte hutsak Abaroko garapena bi edo hiru urtez gelditzea ekar dezake, eta lehen ondorioa jadanik eman da: une honetan sortutako segurtasun juridikorik ezagatik jabeek ukatu egin diote udalari institutua handitzeko lurrak aldez aurretik lagatzea. Izan ere, okupazio aurreratu hori abenduaren bigarren hamabostaldirako programatuta zegoen eta prozesu hau atzeratu egin behar da.

EHBilduk, EAJk, PSEk eta Elkarrekin-Sopelak defendatzen duten Abaroko Plan Partzialaren proiektua urte askoko negoziazio askoren emaitza da urteetan izan dituzten jarrera desberdinak gaindituz. Lau alderdi politiko horien arteko gaur egungo adostasun horrek Abaroko lurren jabeen % 100en onarpen sinatua zuen, eta Eusko Jaurlaritzako Etxebizitza Sailarekin sinatutako akordio batean oinarritzen ziren.

Komunikatu bateratua osorik publikatzen dugu

EHBilduk, EAJk, PSEk eta Elkarrekin-Sopelak, Sopelako Auzo Alternatibak aurkeztutako Administrazioarekiko Auzibidea kentzeko eskatzen dute.

Sopelako EHBildu, EAJ, PSE eta Elkarrekin Sopela talde politikoek (guztira 16 zinegotzi gure herriko Udal Osoko Bilkura osatzen dugun 17etatik) Sopelako Auzo Alternatibako zinegotzi bakarrak Abaroko hirigintza-garapenari buruz aurkeztutako Administrazioarekiko Auzi-errekurtsoa ez dugu ulertzen ezta onartzen ere, eta ondorioz kentzeko eskatzen dugu.

Errekurtso hori aurkezte hutsak eskualde honen garapena geldiaraztea ekar lezake, gutxienez bi edo hiru urterako eta ondorioz Abaro inguruan Sopelako Iberre Hezkuntza Ertainetako Institutuaren handitzea, babes publikoko 490 etxebizitzen eraikuntza eta Gobela ibarraren eraztun berdearen biziberritzea kolokan jartzen dira.

Gure ulertezintasuna erakutsi nahi dugu, Sopelako Auzo Alternatibako udal-hauteskundeetarako programak hitzez hitz esaten baitzuen "Zipiriñe eta Iberre handitzeko bide guztiak babestea" eta "babes ofizialeko etxebizitzak eraikitzen laguntzea" Sopelako gainontzeko alderdi politiko zein beste eragile sozial batzuek babesten dugun bezala. Era berean, gure gaitzespena adierazten dugu; izan ere, geldialdi honen kaltetuak Sopelako hezkuntza publikoan ikasten ari diren ikasle guztiak lirateke, egun beren beharrei erantzuteko txiki geratu diren eraikin batzuetan baitaude eta Batxilergoko ikasketak udalerritik kanpo amaitu behar dituztelako, kaltetuak ere badira babes publikoko etxebizitza bat eskuratzeko aukera zuten pertsona guztiak, Abaron 490 eraikitzea aurreikusita baitzegoen eta gure ingurugiroaren hobekuntza nahi dugun herritar guztiok. Ez dugu ulertzen nork izan dezakeen onura administrazioarekiko auzi honekin.

Zinegotzi honek errekurtso hori aurkezteko duen legitimitate osoa onartuta, kentzeko eskatzen diogu, eta Sopelako herritar guztiei gogorarazten diegu udalak emandako urratsek gehiengo argia dutela (aldeko 16 boto eta kontrako 1), Abaroko lurren jabeen % 100en onarpena dutela eta Eusko Jaurlaritzako Etxebizitza Sailarekin sinatutako akordio batean oinarritzen direla.