Pasaia

Pasaiako EH Bildu, Podemos eta PSE-EE udal taldeek gogor salatzen dugu Boliviako estatu kolpea

Wiphala, Andeetako etniek erabiltzen duten zazpi kolorez osatutako bandera lau-angeluarra.

Bolivia,Estatu Kolpea,Adierazpena | 2019-11-15 13:00:00

Azaroaren 10ean Boliviako Estatu Plurinazionaleko Presidente Evo Moralesek bere dimisioa aurkeztu zuen, poliziek eta militarrek behartuta. Dimisioa eman baino lehen Morales presidentearen, bere gobernuko kideen eta Boliviako beste hainbat hautetsien senideen kontrako erasoak eman zirelarik.

Estatu Kolpe honen ondorioz, egoera benetan larria da eta konfrontazio zibilerako arriskua handia dela azpimarratu nahi dugu, izan ere estatu kolpea bultzatu duten indarrek errepresioarekin erantzuten ari zaizkio Moralesen alde antolatutako herritarrei. Egoera honen aurrean, Pasaiako EH Bildu, Podemos Pasaia Equo Berdeak eta PSEE-EE Pasaia udal taldeok adierazpen bat adostu dugu, hurrengo puntuak jasotzen dituena:

  • Gogor salatzen dugu Bolivian ematen ari den estatu kolpea.

  • Eskubide zibil eta politikoen errespetua eta gatazka negoziazio eta akordioaren bidez konpontzera dei egiten diegu herritarrei, eta Estatu Kolpe honen kanpo-bultzatzaileei injerentzia gelditu eta Boliviako soberania errespetatzera deitzen ditugu.

  • Gure babesa adierazi nahi diogu Boliviako herriari, bere demokraziari eta etorkizuna modu baketsuan eta interferentziarik gabe erabakitzeko eskubideari.

Azkenik, Pasaiako herritarrei Estatu kolpe honi aurre egiteko antolatzen diren mobilizazioetan parte hartzera dei egiten diegu.

Azken plenoan herritarron bizitzak zentroa hartzea lortu genuen berriro

Pasaiako EH Bilduko sei zinegotziak udalbatzarrean.

Udalbatzarra | 2019-10-30 13:00:00

Pasaiako EH Bilduk atzoko plenoa oso era baikorrean baloratzen du, herritarren bizitza zentroan jartzen duten alorretan adostasun zabalak lortu zirelako, kasu batzuetan aho batekoak.

Bereziki poztekoa da guretzat egungo Pasaiako zahar egoitzaren geroaz plenoan lortutako adostasuna. EH Bildun argi dugu herri gisa defendatu behar dugula Pasaiak behar duen zahar egoitza berria, jada eraikita beharko lukeena, eta horrekin batera zaintza duina eta guztientzakoa. Horretarako da Aldundiarekin Udalak sinatuko duen hitzarmena, zeinak bermatzen duen orain arteko egoitza ere gizarte arloari atxikitua eta, zehazkiago, gure aiton-amonen zaintzari atxikitua iraungo duela beti. Hitzarmenak, beraz, alde guztien artean landu izanak eta adostu izanak pozten gaitu.

Bide beretik, Antxon gaur egun erabiltzen ez diren trenbideen espazioa berreskuratzearen alde lortutako adostasuna oso garrantzitsua da. 800 sinadura bildu ondoren, plenoan lortutako talde guztien babesa gakoa da, gure ustez, hemendik aurrera egin beharreko lanketa partekatuan. Espazio horren berreskuratzeak garrantzi handia du gure herriaren geroari begira.

Egindako lana herritarrei aitortzeaz gain, eskertzen diegu plenoan bertan guztien artean adostasuna bilatzeko azaldutako borondatea, EH Bildurentzat lurrak berreskuratzea bezain garrantzitsua baita ur-laminarekin lotura berreskuratzea.

Aitzitik, ez da nahikoa diagnostikoak eta helburuak adostea. Hauek gauzatzeko burutu beharreko ekimen zehatzak adostu behar ditugu: helburu bat, bide orri bat. Horren alde egingo du EH Bilduk herritarrekin zein udaleko taldeekin.

Zentzu honetan, atzo bezalako adostasunak bilatzen jarraituko dugu beste alorretan ere.

2019-2023 legegintzaldiko lehen 100 egunen balorazioa

| 2019-10-11 13:00:00

Esaten da gobernuak baloratzeko kortesiazko 100 egun utzi behar direla, eta 100 egun baino gehiago egin ditu Izaskun Gomezek zuzentzen duen udal gobernuak, 100 egun zeinetan PSE eta PNVren artean ardurak banatzetik haratago ez duten ezer egin, ez gobernu programarik, ez proiektu nagusien inguruko adostasunik ere. Ardurak banatu eta herritarrekiko arreta orduak murriztu, dena esan beharra badago.

Herritarrek azken hauteskundeetan Pasaiako lehen indar bilakatu gintuzten, eta konfiantza horri erantzunez, ekinbidea hartu dugu EH Bildutik, are gehiago PSE eta PNVren paralisia ikusita.

Izan ere, hauteskundeen aurretik behin eta berriz esan genuen bezala, gure herriaren erronkek talde guztien arteko elkarlana eta adostasuna eskatzen dute, eta berdin pentsatzen jarraitzen dugu. Ildo horretan, azken plenoan proposatu genuen udal talde guztien artean Portuaren ingurumen eraginaren protokoloa berritzeko adostasuna bilatzea, badiaren inguruan bizi eta lan egiten dugunon bizi-kalitatea erdigunean jarriz.

Udal gobernuaren aldetik, ordea, ez da inolako ekimenik martxan jarri. Ez dago berririk lau urteko atzerapenarekin datorren zahar egoitzaz, ezta hamarkadetako atzerapenarekin datorren saneamenduaz, topoaren lurperatzeaz, edota San Pedroko lonjaz. Zeintzuk dira legealdirako gobernu berriaren asmoak? Zeintzuk euren arteko adostasunak? Soilik euren artean ardurak banatzea?

Eta berriro diogu, gakoa ez da soilik udal gobernuko bi alderdiak ados jartzea, talde guztiak ados jartzea baizik; baina lehen indarrari gobernua kendu ondoren, zer gutxiago udal gobernu plan bat izatea eta aurkeztea baino?

Pasaiako EH Bildutik gure herriarentzat proposamenik onenak lantzen, eta herritar, eragile zein beste talde politikoei proposamen horiek eskaintzen jarraituko dugu, herritarrek eman diguten konfiantzari erantzunez.

Pasaiako Portuko mahai teknikoa bildu da eta Pasaiako Udalak ez du ordezkaririk bidali

Pasaiako Portuko deskarga batek eragindako hautsa hodeia

Portua | 2019-10-09 13:00:00

Pasaiako EH Bildutik larritzat jotzen dugu gertakari hau eta 2018an intzidentziek goraka egin duten honetan Pasaiak bertan egon beharko lukeela uste dugu.

Pasa den urtean (2018), soinuari dagozkion 22 kexu, atmosferara egin diren isuri inkontrolatuen 12 kexu eta usainei zein itsasontziek sortutako keari dagozkion pare bat kexu jaso dira Pasaiako Portuan zein mahaia osatzen duten erakunde ezberdinetan (batez ere Lezo eta Pasaiako Udaletan).

Portuko Erakundeen Arteko Mahai Teknikoa sei hilabetean behin biltzen den organoa da. Bertan, badia inguruko udaletako teknikariak, Eusko Jaurlaritza, Gipuzkoako Foru Aldundia eta Portuko ordezkariak biltzen dira. Mahai honen helburua, gertatu diren intzidentzien inguruko informazioa trukatzea eta horren azterketa teknikoa egitea da, beste hainbaten artean.

Pasa den irailaren 24ko plenoan Pasaiako EH Bildutik funtzionamenduan dagoen kexuak erregistratzeko protokoloa indartzeko neurriak adostu behar zirela esan genuen. Neurri hauek, alderi guztien artean adostutako proposamen batean jasotzeko eskea egin genuen, eta Alkateak proposamena onartu zuen, bozeramaile batzordea deituko zuela esanez. Oraindik ez dakigu beste alderdiek gaiari heldu dioten, baina, EH Bilduk badu bere proposamenak jasotzen dituen dokumentu bat prest.

Dokumentu horretan, neurri zehatzak jasotzen dira. Horien artean, mahai politiko eta teknikoaren bilera maiztasuna handiagoa izatea eta intzidentziak gertatzekotan, eskumena erakundeak legediak dioena bete eta dagokion neurriak ezartzea.

Ondo dago Izaskun Gomez alkateak Portu Agintaritzari legedia bete dezala eskatzea, baina, hori ez dadila izan titularra lortzeko itxurakeria bakarrik. Pasaiako indar bozkatuena izanik, gainontzeko taldeei ere arduraz jokatzeko eskea egiten diegu, proposamenak lehenbailehen landu eta datorren urriaren 23an egingo den Erakundeen Arteko Mahai Politikoan aurkezteko.

Pasaiaren osasuna jokoan dago eta gure ordezkariek toki guztietan egon behar dute hori defendatzeko.

Pasaiako Udal Gobernuak tasa eta zerga igoera onartu du

Oposizioko alderdiok ezezkoa bozkatu genion igoera honi.

Zergak,Tasak | 2019-09-25 13:00:00

Atzoko plenoan, Pasaiako Udal Gobernuak (PSEE-PNV) tasa eta zerga igoera onartu zuen 2020 urterako, oposizioaren kontrako botoekin. Tasak %2 igotzea erabaki zen, zergak aldiz %1.

Pasaiako EH Bilduko zinegotziok, galdera hauek planteatzen dizkiogu geure buruari:

  1. Udal Gobernuak onartu dituen igoerak egokiak dira?
  2. Igoera edo neurri hauek ba al dute helburu estrategikorik?
  3. Pasaitarron gain aplikatuko den presio fiskala egokia da edo zama handia da?
  4. Diru-bilketarako erabiltzen ditugun baliabideak zein erramintak efizienteak eta  nahikoakal dira?
  5. Gure inguruan ditugun erakundeek nahikoa babestu eta laguntzen gaituzte?

Gure ustez, Udal Gobernuak onartu zituen igoerak ez dira egokiak. Azken urteetan, Gobernu honek igoera orokortuak besterik ez ditu onartu, eta neurri hauek, ez dute inongo helburu fiskalik; xede bakarra kontuak koadratzea da. EH Bildutik igoera neurrizkoago baten aldekoak gara, KPI-aren araberako igoera bat (momentu honetan %0,61ekoa litzatekela). Pasaiako egoera sozio-ekonomikoa denongatik aski ezaguna da, eta INEko azken datuek babesten duten bezala, Trintxerpeko barrutia Gipuzkoako pobreena da errentari dagokionez.

Gainera, ez dugu uste gure inguruan ditugun erakundeek behar bezala babesten gaituztenik. Aspaldiko kontua da, bai, baina Gipuzkoako Foru Aldundiak Foru Funtsaren bidez egiten duen banaketa ezegokia dela uste dugu. Pasaiak dituen hainbat berezitasun eta behar ez dira banaketa horretan kontutan hartzen, eta ondorioz, jaso beharko genukeena baino askoz gutxiago jasotzen dugu.

Legealdi hasieran egin genuen bezala, berriro ere gure elkarlanerako proposamena luzatu genuen plenoan. Instituzioetara elkarrekin joateko prest gaude, herri gisa, Pasaiari eta pasaitarroi dagokiguna defendatzeko.

Horregatik eta aurretik aipatutakoengatik, EH Bilduk kontrako botoa eman zion Udal Gobernuaren proposamenari.

ALBISTEAK

Antxon, elkarbizitza, elkartasuna eta segurtasuna

2020-09-10 14:30:00

Pasaiako EH Bilduren zinegotziak Antxoko Zumardian.

Instituzio nagusiek Pasaiarekiko eta Pasaiako Portuarekiko duten arduragabekeria salatzen du EH Bilduk

2020-08-01 14:00:00

Artxibo irudia. Pasaiako EH Bilduko zinegotziak Pasai Antxo eta Buenavistako moilaren parean.

2019-2020 ikasturte politikoaren balorazioa

2020-07-23 14:00:00

Pasaiako EH Bilduko zinegotziak San Pedroko Torreatzen (Argazkia: Elena Viñas).

EH Bilduk eskatuta batzorde berezia sortu da San Pedron eta Donibanen ematen ari diren zenbait egoerari irtenbidea emateko

2020-07-18 12:40:00

Torreatzeko trafiko ordenamendua zein Donibanen gertatzen ari diren hainbat egoera jorratuko ditu batzordeak.