Lezo

KORONABIRUSAREN AURREAN GUZTIOK BATERA ARDURAZ JOKA DEZAGUN

| 2020-03-12 15:45:00
  • Koronabirusaren ondorioei guztiok batera, elkarrekin, herri gisa aurre egin behar diegu.

 

  • Koronabirusak eragin ditzakeen sektore guztiak eta horien ondorioak bilduko dituen mahai bat sortzeko eskatzen diogu Jesus Mari Martiarena alkateari.

 

Lezoko EH Bilduren ustez, koronabirusaren ondorioei guztiok batera, arduraz eta herri gisa aurre egin behar diegu.

Beharrezkoa da krisi honi jada bilakatzen ari dena bezala heltzea: gizarte honetako sektore guztiei eragingo dien krisia. Horrela, EH Bilduk uste du sektore guztiek
zuzenean ezagutu behar dutela kasuari buruzko informazioa, eta batera tratatu behar dituztela har daitezkeen neurrien ondorioak.

Horretarako, koronabirusak eragin ditzakeen sektore ezberdinak hartuko dituen mahaia sortzea garrantzitsua iruditzen zaigu.

Lezoko EH Bilduk konpromiso osoa eta zintzoa du mahai horretan parte hartzeko.

Guztiok batera, elkarrekin aritzeko unea dugu. Konbentzituta gaude elkarrekin, herri gisa aurre eginez, hobekiago eta eraginkorrago erantzungo dugula.

ALKATEAK EZTABAIDARI UKO EGIN DIO BESTE BEHIN

Zaldunbordari buruz Euskaldendakek aurkeztutako mozioa eztabaidatzeari uko egin zion Martiarena alkateak

| 2020-02-14 13:31:00
  • Gaintxurizketan eraiki nahi duten outletak talka egiten du EH Bilduk Lezorako defendatzen duen merkataritza ereduarekin

Martiarena alkateak  Gaintxurizketan eraiki nahi duten Zaldunbordako outletari buruzko eztabaida eragotzi zuen otsailaren 5eko Osoko Bilkuran.

Euskaldendakek (Euskadiko Merkatari, Ostalari eta Zerbitzu enpresen Elkarteen Konfederazioa) Zaldunbordako outletari buruz eztabaidatzeko mozioa aurkeztu bazuen ere, Alkateak ez zuen gai-ordenean sartu nahi izan.

EH Bildu Udal Taldetik, puntu hau gai-ordenean sartu ez izanaren arrazoia zein zen azaltzeko eskatu genion Alkateari. Euskaldendaken mozioa aintzat hartuta, Zaldunbordako outletari buruz eztabaidatzea zergatik ukatu zuen argitu zezala. Ez genuen inolako erantzunik jaso. Oraingoan ere, gure galderen aurrean, Martiarena alkateak mutu jarraitu zuen, arrazoirik eta azalpenik eman gabe.

Zaldunbordako outletak zuzenean eragingo die Lezoko eta inguruko denda eta komertzioei, hauen egoera gehiago zailduz.

Argi dago halako mega-proiektu batek, bertako merkataritzarekin, herriko denda eta komertzio txikiaren ereduarekin talka egiten duela.

Ehun saltoki baino gehiago eraiki nahi dituzte, 28.000m² instalazioa eta 1.800 autorentzako aparkalekua izango duena.

Dendarteanek (Gipuzkoako Merkataritza Elkarteen Elkarteak) esaterako, honako hau adierazten du mozioan: Europan egindako azterlan guztiak bat datoz, eredu horiek sortzen dituzten enpleguen bikoitza suntsitzen dutela ondorioztatzen. Gainera, enplegu prekarioa bultzatzen dute eta lehia desleiala sustatzen dute, zentro horiek ez baitute gure lan akordioa aplikatzen, Estatuarena baizik.

Harrigarria, kezkagarria iruditzen zaigu, honen guztiaren aurrean, Alkateak eta EAJ-PSE Gobernu taldeak ostrukarena egitea eta gaia Osoko Bilkuran eztabaidatzeko aukera ukatzea.

Lezoko EH Bildutik eskaera zuzena egiten diogu EAJ-PSE gobernu taldeari:

  • Bertako merkataritza, herriko denda eta komertzio txikiak, guztiok elkarrekin defenda ditzagun halako mega-proiektuen aurrean.
  • Hondarribiako Udalari Zaldunbordako outlet proiektua behin betiko bertan behera utz dezala eskatzea.
  • Euskaldendakek aurkeztu zuen mozioa Osoko Bilkuran eztabaidatu dadila.

EAJ-PSE gobernu taldeak 13.000€ xahutu nahi ditu

arriskurik sortzen ez duten eta beharrik ez duten zuhaitzak kimatzeko.

| 2020-02-06 12:15:00

Euskal Herria plazan dauden 30 urte inguru dituzten 22 platanondo dira. Kimaketa hauek egiteko ez dago inolako arrazoirik, behar teknikorik. Alderantziz, aurkeztu diren txosten tekniko ezberdinek, zuhaitz hauek ez
kimatzea aholkatzen dute.


Lezoko lorezaintza lanen ardura duen enpresako teknikariaren txostena:
- Egoera naturalean hazi diren zuhaitzak dira, inongo kopa jaitsierarik jaso gabe, hau dela eta, zuhaitzaren estruktura naturala mantendu egin da eta honek adarrak hausteko arriskua gutxitu egiten du.
- Kimaketak egiterakoan zuhaitzaren estruktura naturala aldatu egiten da. Kimaketa puntu hauetan sortzen diren adarrek toki berdinean tentsio handia eragiten dute, arriskutsuak diren puntuak dira, egoera normalean (adarrak handitu ahala) edo haizete garaian bertatik adarrak puskatzea errazagoa baita, bere estruktura normalean hazi, jaio den adar puntutik baino.
Proposamena:
- Kimaketa lanik ez egitea, segurtasun maila handiagoa bermatuta egongo delako. Gainera kimaketa lanak egiten badira, zuhaitzak maiztasun batekin kimatu beharko dira.


Udaleko Ingurugiro teknikariaren txostena:
- Euskal Herri plazan dauden 22 platanondo horiek kimatzeak ez ditu haien segurtasun baldintzak hobetuko.
- Zuhaitz horiek kimatzen badira lorezaintza zerbitzuarentzako gain-kostua suposatuko du, urtero mantenu lanak egin beharko baitira.
- Kimaketak eragin paisajistiko handia edukiko du, eremua guztiz itxuraldatuz.
Honetaz gain, Gipuzkoako Foru Aldundiko Bide Azpiegituretako - Bide Artapenetako eta Kudeaketarako Zerbitzuatik ere, zuhaitz hauek ez dutela errepidearentzat arriskurik suposatzen adierazi dute.
Proposamena:
- Kimaketa lanek dakarten gastua ez dagoela justifikatua.


Hala eta guztiz, txosten tekniko hauek guztiak eskuartean izanda ere, EAJ-PSE gobernu taldeak 13.000€ xahutuko ditu zuhaitz hauen kimaketan.
EH Bildu Udal taldetik, EAJ-PSE gobernu taldeari atzera egin dezala eskatzen diogu. Ez dago inolako arrazoirik Euskal Herria plazan dauden 22 platanondo hauek kimatzeko: ez segurtasun arrazoirik (kimatuz gero segurtasun maila txikiagoa litzake), ez eta bestelakorik ere.
Inbertitu ditzagun 13.000€ horiek herriko beste beharrak asetzeko, hobetzeko, edo eta Jaizkibelen bertako zuhaitzak eta landareria berreskuratzeko.

LEZO ERROTIK parte hartze prozesuko azkeneko saioa burutuko dugu datorren larunbatean

Lezo Errotik parte-hartze prozesua amaierara iristen ari da, eta laugarren fasea bukatzeko bilera egingo dugu datorren larunbatean, apirilak 6, 10:00etatik, 13:00 etara, Lezoko Ikastolan.

lezoErrotik,parteHartzea |

Hiru puntu landuko ditugu batzarrean. Lehenengoan, Lezo Errotik parte hartze prozesuan zehar lantzen aritu garen txostena aztertuko dugu. Talde eragileak, prozesuan zehar bildutako ekarpenak dokumentu batean batu ditu. Hala ere, azkeneko ekarpenak egin ahal izango dira, eta lana bukatzeko, txostenari onarpena emango diogu.

 

Orain arte parte-hartze prozesuan aritu diren lezoarrei banatu zaie jada talde eragileak atondu duen txostena. Bestetik, aldizkari bat ere argitaratua eta herriko postontzietan banatu dugu. Aldizkari horretan, prozesuan zehar lortutako emaitzaren laburpen bat ageri da. Landu ditugun bederatzi arloetan (euskara, parte-hartzea eta herri nortasuna, etxebizitza, hezkuntza, mugikortasuna, sozio-ekonomia, feminismoa, ingurumena eta ongizatea) zein ekintza konkretu burutu beharko liratekeen, alegia.

 

Batzarreko bigarren puntuan maiatzaren 26an ospatuko diren Udal hauteskundeetarako Lezoko EH Bilduko zerrendaren onarpena bozkatuko dugu. Pasa den abenduaren 13an erabaki genuen batzarrean  Mikel Arruti Salaberria izango zela zerrendaburua, honakoan, Arrutirekin elkarlanean zein talde ariko den berretsi beharko dugu.

 

Batzarreko azkeneko zatian Udal hauteskundeetarako aurkeztuko dugun herri programaren lanketarekin hasiko gara. Eta, jakina, Lezo Errotik parte-hartze prozesua oinarri hartuko dugu herri programa hau osatzeko.