Legebiltzarra

"Legebiltzarrak transexualitatea despatologizatzea aurrerapauso handia da", dio Oihana Etxebarrietak

EH Bilduk transexualen eskubideak aitortzeari buruzko legea aldatzeko proposamena aurkeztu du arau horrek pertsona horiei eskatzen dien aldez aurretiko azterketa psikiatrikoa ezabatzeko.

| 2019-05-16 15:26:00

EH Bilduk lege proposamena aurkeztu du Legebiltzarrean 14/2012 Legea, transexualak genero-identitateagatik ez baztertzeari eta haien eskubideak aitortzeari buruzkoa, aldatzeko. Proposamena, EH Bildurekin batera, beste talde parlamentario guztiek ere sinatu dute, PPk izan ezik. Legebiltzarrak gutxi barru onartuko duen lege aldaketa hori dela medio, 2012ko legeak aitortutako eskubideak baliatu nahi dituzten pertsonek ez dute azterketa psikiatriko bat egin beharko, eta horrek, Oihana Etxebarrietak azaldu duenez, “aldaketa txikia dirudien arren, aldaketa nabarmena dakar, hain zuzen ere, aldez aurretiko azterketa psikiatrikoa ezabatzen duelako legetik”. Izan ere, 2012an onartu zen legeak arazo handia zeukan, “legea bera patologizazioaren norabidean mantentzen zuelako; hortaz, orain transexualitatea despatologizatzea aurrerapauso handia da, LGTBI mugimenduak etengabe eskatu duena, hain zuzen ere. LGTBI mugimenduaren bultzada da ekimen politiko honen jatorrian egon dena”.
Legebiltzarkideak adierazi du “2012ko legeak zeukan muga hori ezabatzea ezinbestekoa zela EH Bildurentzat”, eta koalizioaren konpromisoa berretsi du “despatologizazioaren norabidean urratsak ematen jarraitzeko”. Horri jarraituz ohartarazi du “oraindik asko dagoela egiteko norbanakoen eskubideak modu osoan betetzeko”. Bere hitzetan, “identitate anitzak barne bilduko dituen eta eskubidedun subjektu bilakatuko dituen lege eta dekretuak behar ditugu; gaurkoan zehazki transexualitateari buruzko legeari erreferentzia egiten zaion arren, jakin badakigu hainbat identitate hortik kanpo geratzen direla eta norabide horretan lanean jarraituko dugu haientzako”.
 

EH Bilduk Barakaldoko Larrea ikastetxean proiektu-pilotu bat martxan jartzea proposatu du, inklusioa xede

Rebeka Uberak premiazkotzat jo du Hezkuntza Sailak neurriak hartzea Larrea eskolak pairatzen duen estigmatizazioa larria delako.

| 2019-05-10 13:27:00

EH Bilduk legez besteko proposamena aurkeztu du Legebiltzarrean Barakaldoko Larrea Haur eta Lehen Hezkuntzako ikastetxean inklusioa sustatzeko eta eskola horrek egun pairatzen duen estigmatizazioa gainditzeko. Zehazki, Rebeka Uberak inklusioa xede izango duen proiektu-pilotu bat abian jartzea proposatu du hezkuntza arloan zein sozialean esku hartzeko. Proposamenaren arabera, horrelako proiektuetan eskarmentua duten unibertsitateko ekipoek parte hartuko lukete eta, horretarako, Hezkuntza Sailak lankidetza hitzarmenak sinatu beharko lituzkete Euskal Herriko Unibertsitatearekin edota Mondragon Unibertsitateko Humanitate eta Hezkuntza Zientzien Fakultatearekin.
Uberak proposamena aurkeztu du Barakaldon zenbait ikastetxe estigmatizazio arazo larriak pairatzen ari direlako eta, haien artean, Larrea delako okerren dagoena. EH Bilduko legebiltzarkidearen iritziz, premiazkoa da Hezkuntza Sailak politika ausartak martxan jartzea eta neurri eraginkorrak hartzea, egoera hori iraultzeko. Uberak azpimarratu du helburu hori lortzeko ezinbestekoa izango dela Jaurlaritza elkarlanean aritzea Barakaldoko gainerako erakunde eta eragileekin; beraz, Barakaldako Hezkuntza Mahaia sortzea proposatu du, bertako hezkuntza komunitate osoa elkarlanean aritu eta proiektu komunak abiatzeko.
Halaber, Hezkuntza Sailari eskatu dio aztertu dezala ea aukera dagoen Larrea Ikastetxeak praktika onak partekatzeko eta elkarlanean aritzeko inklusio sozialaren eremuan Katalunian urteetako ibilbidea duen Magnet sarearekin.
 

EH Bilduk merkataritza txikia babestu eta legea sustatu du saltoki handiei mugak jartzeko

Iker Casanovak Jaurlaritzari utzikeriaz aritzea egotzi dio. “Oposizioak hartu behar izan du lidergoa saltoki handien irekitzea eta handitzea arautzeko eta merkataritza txikiaren apokalipsia saihesteko”.

| 2019-05-09 15:07:00

Donostialdean, Bidasoaldean eta Ezkerraldean bereziki saltoki handiak ireki edota handitzeko martxan dauden proiektuek “merkataritza txikiaren apokalipsia” ekar dezaketela ohartarazi du EH Bilduk gaur Legebiltzarrean, eta, arrisku horrekin arduratuta, bide eman dio saltoki handiak ireki eta handitzea arautzen eta mugatzen duen lege proposamen bati, oposizioko beste bi taldeekin batera. Helburua, finean, merkataritza txikiaren jarduera  babestea da, azpimarratu du Iker Casanovak.
EH Bilduko legebiltzarkideak azaldu duenez, EH Bildu planteatzen ari den legeak “segurtasun juridiko osoa dauka europar epaitegien legedia eta jurisprudentzia aintzat hartzen duelako” eta dendari txikien etengabeko eskari bati erantzuten dio. Horren ildotik, Casanovak sektorean ordena jarri beharra aldarrikatu du, ez delako onargarria instituzioek mota guztietako abantailak eta erraztasunak ematea konpainia handiei merkatari txikien kaltetan, horrek ehunka dendaren etorkizuna arriskuan jartzen baitu.
Auzitegi Gorenak –adierazi du Casanovak– bertan behera utzi zituen 2015ean merkataritza arloa arautzen zuen Lurraldeko Plan Sektorialean jasotako mugak eta, geroztik, Araban, Bizkaian eta Gipuzkoan ez dago saltoki handiak irekitzeko edo handitzeko mugarik, baina, legebiltzarkideak zehaztu duenez, ez legalki ezinezkoa delako, interes orokorra lehenestearren, baizik eta EAJ-PSE Gobernuak horretarako eta merkataritza txikia babesteko behar ziren urratsak eman ez dituelako. Hori dela eta, Casanovak utzikeriaz aritzea leporatu dio Jaurlaritzari. Oposizioak hartu behar izan du ekimena horregatik, sektorean ordena jarriko duen legea sustatzeko. “Tarte honetan, 2015etik, EAJ eta PSEk erabateko ezgaitasuna erakutsi dute, ez dira kapazak izan saltoki handien erregulazioan euren zabarkeriaren ondorioz zeuden gabeziak konpontzeko”. Eta are okerrago, 2015az geroztik bi alderdi horiek erraztasun guztiak eman dituzte saltoki handiak irekitzeko hainbat udaletan, Donostia eta Hondarribikoetan kasu.

Hezkuntzak lidergoa hartu behar du behingoz itunpeko ikastetxeetako gatazka desblokeatzeko

EH Bilduk legez besteko proposamena aurkeztu du Lakuak esku hartu eta patronalaren eta sindikatuen arteko akordioa bultza dezan lanpostuen kontsolidazioaren eta langileen birkokapen eta soldaten inguruan.

| 2019-05-08 15:32:00

Ikusirik Kristau Eskolan eta AICEn bildutako itunpeko ikastetxeetako lan gatazkak konpondu gabe jarraitzen duela eta gaur eta biharko greba jardunaldiek konponbidea oso urrun dagoela erakusten dutela, EH Bilduk ezinbestekotzat eta premiazkotzat jo du Hezkuntza Sailak behingoz bere ardurari heltzea eta lidergoa hartzea gatazka desblokeatzeko. Hori dela eta, Rebeka Uberak legez besteko proposamena aurkeztu du Legebiltzarrean helburu horrekin. “Parlamentuak patronalaren eta sindikatuen artean bitartekaritza lanak egiteko eskatu zion martxoan Jaurlaritzari, baina honek muzin egin dio agindu horri eta eskuak garbitu baino ez du egin. Hezkuntza Sailaren arduragabekeria itzela da eta bada garaia dagokion erantzukizunez jokatzeko eta behingoz esku hartzeko. Gobernuak ezin du ahaztu itunpeko irakaskuntzaren ardura ere berari dagokiola, hezkuntza sistema osoaren arduraduna delako eta ikastetxe horiek finantziazio publikoa jasotzen dutelako”.
EH Bilduren ekimenaren arabera, Hezkuntza Sailak lidergoa hartu behar du gatazka desblokeatzeko eta esku hartu behar du patronalaren eta sindikatuen arteko akordio bat sustatzeko. Uberak proposatu duenez, bi aldeek adostasunak bilatu behar dituzte langileen birkokapenaren eta soldaten inguruan, betiere kontuan hartuta azken urteotan eroste ahalmena galdu dutela, akordioaren iraupena eta lanpostuen kontsolidazioa. Halaber, akordioak, dio Uberak, “lan pertsonalerako erreserbatutako ordu osagarriei buruzko planteamendu bat jaso beharko luke”.
 

Elkarte gastronomikoak eta gazteen lokalak 01:00etik aurrera erabiltzeko debekua bertan behera utzi behar du Lakuak

EH Bilduk proposamena aurkeztu du Jaurlaritzak dekretua alda dezan, “arazo bat sortu duelako inolako arazorik ez zegoen leku batean”.

| 2019-05-07 16:48:00

EH Bilduk legez besteko proposamena aurkeztu du Legebiltzarrean Jaurlaritzari eskatzeko Jendaurreko Ikuskizunen eta Jolas-Jardueren Legearen garapenaren baitan txoko eta elkarte gastronomikoei eta gazteen lokalei ezarri dien debekua bertan behera utz dezala. Izan ere, Lakuak onartu duen dekretuaren arabera, ez gazteen lokalak ez elkarte gastronomikoak ezin dira erabili 01:00etik aurrera, eta horrek, Josu Estarrronak ohartarazi duenez, “sekulako arazoak sortzen dizkio txoko eta lokal horietako milaka erabiltzaileei, ordutegi hori bete ezean, isunak eta salaketa administratiboak jaso ditzaketelako”. Bere hitzetan, “Urkulluren Gobernuak ezarritako debeku horrek ez du ez hankarik ez bururik, arazo bat sortu duelako inolako arazorik ez zegoen leku batean; ez du inolako zentzurik”.
EH Bilduko legebiltzarkideak azaldu duenez, Araba, Bizkaia eta Gipuzkoan 1.500 elkarte gastronomiko baino gehiago daude eta 62.000 gazte inguruk erabiltzen dituzte lonjak aisialdian, Gazteen Euskal Behatokiaren datuen arabera. Gazteen lokalei buruz Arartekoak esana ere ekarri du gogora Estarronak, “Arartekoak berak aitortu duelako errealitate hori positiboa eta baketsua gertatu dela kasurik gehienetan eta, taberna edota diskoteken aldean, gatazka gutxi sortzen dutela eta, beraz, oso mugatua izan behar izan da administrazioen esku-hartzea jarduera hori kontrolatzeko”.
Legebiltzarkidearen iritziz, “Jaurlaritza arazo bat sortzen ari da arazo orokortu bat ez dagoen lekuan, ezin da horrelako debeku orokor bat ezarri gehiengoaren kalterako arazo eta kasu zehatz gutxi batzuengatik”. Hori dela eta, 01:00etik aurrerako debekua bertan behera uzteko eskatzeaz gain, EH Bilduk Lakuari galdegiten dio ordutegiak zehazten dituen erregelamendua adostu dezala Eudelekin, Euskadiko Gazteriaren Kontseiluarekin eta Elkarte Gastronomikoen ordezkariekin, betiere interes ezberdinak uztartuz, segurtasuna bermatuz eta pertsona guztien atseden hartzeko eskubidea errespetatuz.
 

ALBISTEAK

AHT eta Donostiako Metroko obretako lan baldintzak salatu ditu EH Bilduk

2021-12-17 11:37:00

Pazis Garciak lan baldintza duinak bermatzeko eta diru publikoarekin enplegu prekarioa sustatzeari uzteko exijitu dio Jaurlaritzari. Beldur da AHTko lanen kudeaketa Lakuaren esku uztea ez den lan baldintzak hobetzeko baliatuko.

Izurritearen kolpea arintzeko Lakuak hedabideei emandako laguntzen banaketa kritikatu du EH Bilduk

2021-12-16 14:07:00

Jasone Agirrek azalpenak eskatuko dizkio bihar kontrol bilkuran Bingen Zupiria sailburuari. Euskarazko komunikabideek laguntzen %6,6 bakarrik jaso dituzte eta beste asko kanpo geratu dira.

Lehen Arreta indartzea eta aztarnari taldeetan eginiko murrizketak iraultzea eskatu du EH Bilduk

2021-12-10 12:28:00

Rebeka Uberak Lehen Arreta ahultzea leporatu dio Osakidetzari, hain justu, lehentasuna eta premia anbulatorioak indartzea denean.

Haur eta nerabeen artean sare sozialen erabilera seguru, arduratsu eta kritikoa sustatzeko akordio bat lortu du EH Bilduk

2021-12-09 15:28:00

Jaurlaritzak Zeuk Esan zerbitzuko materialak eguneratu eta kontzientziazio eta informazio kanpaina bat abiatuko du.