Legebiltzarra

EH Bilduren ekimenez, Legebiltzarrak EITBri eskatu dio albistegietan independentzia eta aniztasuna bermatzeko

Jasone Agirrek ezinbestekotzat jo du EITBn erredaktoreen karrera profesionala sustatzea eta ardura postuak banatzerakoan irizpide profesionalak bakarrik aintzat hartzea, gardentasuna eta aukera berdintasuna independentziaren bermea baitira hedabide publiko batean

| 2019-06-13 17:17:00

EH Bilduren proposamen bati jarraituz, Legebiltzarrak aho batez eskatu dio EITBko zuzendaritzari informazio zehatza eman diezaiola haren albistegien independentzia eta pluraltasuna bermatzeko eta erredaktoreen karrera profesionala sustatzeko eman dituen urratsei buruz. Legebiltzarrak helburu horiek lortzeko proposamen zehatza egiteko eskatu zion duela urtebete, 2018ko maiatzaren 31n, EITBko zuzendariari, gaur egun ildo editoriala erabakitzen duten karguak izendatzeko erabiltzen duen sistemak, konfiantza pertsonalaren araberakoak, ez independentzia ez aniztasuna bermatzen ez dituelakoan. EAJ eta PSE horren kontra agertu ziren orduan; gaur, aldiz, independentzia eta pluraltasuna ziurtatu beharra onartu dute eta, inplizituki, aitortu dute gaur EITBk ez duela ez bata ez bestea bermatzen.

EITBko zuzendaritzari Legebiltzarrak duela urtebete emaniko agindua ez betetzea leporatu ostean, Jasone Agirrek gogorarazi du gaur EITBn “ardura guztiak atzamarrez banatzen” direla, konfiantza pertsonalaren arabera, eta hori bateraezina dela albistegien independentziarekin. Horretarako, azpimarratu du, ezinbestekoa da bertako erredaktoreen karrera profesionala sustatzea, “albistegien egunerokoa erabakitzen dutenak irizpide profesionalen arabera soilik hautatzeko, gardentasunez eta aukera berdintasunez”. Izan ere, “gardentasuna eta aukera berdintasuna komunikabide publiko baten independentziaren bermea dira” eta, beraz, karrera profesionala sustatzea da “EITBk hartu beharreko lehen neurria, kalitatezko komunikabide publikoa izan gura badu, eta ez Jaurlaritzaren  komunikabidea; bertako profesionalak libre izan behar dira, independenteak, eta euren karrera profesionala ezin liteke zuzendaritzaren konfiantzaren menpekoa izan”.

Gehiengo parlamentarioak talka plan bat eskatu du enplegu arloan gazteek jasaten duten prekarietatearen aurka

EH Bilduren proposamenaren arabera, Jaurlaritzak kalitatezko enplegua sortzeko plana diseinatu eta diru-laguntzak emango lituzke gazteen kontratazioa sustatzeko, betiere lan baldintza duinak bermatuta.

| 2019-06-13 13:41:00

Gehiengo parlamentarioa gazteek pairatzen duten egiturazko prekarietateari aurre egiteko talka plan bat diseinatzearen alde agertu da gaur goizean eta hala egiteko eskatu dio Jaurlaritzari, EH Bilduk proposatu bezala. Podemosek eta PPk babestu duten arren, koalizioaren proposamena ez da onartu PPko legebiltzarkide bat bajan dagoelako eta, ondorioz, ezin izan duelako botoa eman. Edonola ere, Josu Estarrona legebiltzarkidearen iritziz, “argi geratu da zein den gehiengo parlamentarioaren borondatea eta, politikoki, Urkulluren Gobernua talka plana diseinatzera behartuta dago, gazte prekarietatea gure herrian dugun arazo estruktural nagusietariko bat delako”.
Proposamenaren arabera, Lanbidek diru-laguntzak emango lituzke gazteen kontratazioa sustatzeko, betiere lan baldintza duinak bermatuta. Horri dagokionez, EH Bilduk uste du diru publikoak babestutako kontratu horiek mugagabeak eta lanaldi osokoak izan beharko lirateke eta gutxieneko soldata, garbia, 1.200 eurokoa.
Estarronak gazte prekarietatearen larritasunaz ohartarazi du eta arlo horretan utzikeriaz aritzea egotzi dio Jaurlaritzari, “porrot egin duelako gazteen artean kalitatezko enplegua bultzatzerakoan”. Horren froga dira, bere ustez, gazteen langabezia tasa, EAEkoak Europakoa bikoizten duelako, eta bataz besteko soldata 16-29 urtekoen artean, 1.000 eurokoa baino ez delako.
 

Eskandalagarria da Osasun sailburuak naturaltasunez onartu izana Osakidetzako oposizioetan azterketak filtratzea

Rebeka Uberaren iritziz, Nekane Murgak sinesgarritasuna galdu du Lan Eskaintza Publikoari buruzko barne ikerketa zuzentzeko, aurreko oposizio batean filtrazioen jakinaren gainean zegoela ezagutu eta gero.

| 2019-06-11 12:47:00

EH Bilduko legebiltzarkide Rebeka Uberak eskandalagarritzat jo du egun Osasun sailburua denak, Nekane Murgak, aurreko Lan Eskaintza Publiko (LEP) batean naturaltasunez onartu izana Osakidetzan azterketak filtratzen direla pertsona zehatz batzuek plaza lor dezaten. “Ez lehendakariak ez Murgak berak ezin dute pentsatu hemen ez dela ezer gertatu, gaur ezagutu dugun audio batek erakusten duelako aurreko LEP batean egungo sailburua filtrazioen jakinaren gainean zegoela eta ontzat ematen zituela ohiko sistemaren baitan. Hori ezagutu ostean, Murgak ez du sinesgarritasunik Osakidetzaren barne ikerketa zuzentzeko eta irregulartasunak argitzeko”.
Uberak eldiario.es egunkari digitalak argitara emandako audioa aipatu du, Osakidetzak eginiko barne ikerketaren grabazioak jasotzen dituena, alegia. Audio horrek agerian uzten du Nekane Murgak ondo zekiela aurreko oposizioetan ere azterketak filtratzen zirela, hala azaldu baitu orain ikertzen ari den lan eskaintza publikoan Kardiologia arloko epaimahaia osatu duten doktoreetariko batek.
Hori dela eta, EH Bilduko legebiltzarkideak interpelazioa egingo dio ostiralean Kontroleko Plenoan Osasun sailburuari, eta salatuko du Osakidetzaren barne ikerketa zuzentzeko ardura Belen Greaves jeltzalearen eskuetan jarri izana, “horrek horrelako kasu batean ezinbestekoak diren independentzia eta neutraltasun politikoaren printzipio guztiak urratzen dituelako”. Uberaren esanetan, “lehendakaria eta bere gobernua iseka egiten ari zaizkio euskal gizarteari; Greaves EAJko Euskadi Buru Batzarreko idazkaria izan da eta ezinezkoa da bera orain neutrala izatea, bere alderdiak Osakidetzan egin duen kudeaketa politikoa ezbaian jartzen duen ikerketa bat egiten ari denean. Inork ez zukeen onartuko Gürtel auzian ikerketa Marotoren esku uztea”.
Uberaren aburuz, argitara ateratzen ari den informazio guztiak agerian uzten du ez Osakidetzak ez Osasun Sailak inoiz ez dutela nahi izan jendeak oposizioen egia osoa ezagutzea. “Garden eta zorrotz jokatu dutela behin eta berriz esan duten arren, gertatu denak frogatzen du hori ez dela horrela izan. Horretaz jabetzeko aski da ikustea epaileak dokumentazioa osorik bidaltzeko eskatu behar izan diola Osakidetzari, lehenengo momentuan epaitegira igorritako informazioan atal garrantzitsuak falta zirelako, Murgari buruzko grabazioa, esaterako”.
 

Donostiako Kontserbatorioari kokapen berria emateko prozesuari bultzada eman dio EH Bilduk Legebiltzarrean

Josu Estarronak salatu du egungo eraikinak ez dituela baldintza minimoak betetzen musika eskolak duintasunez emateko. Kontserbatorioa konponbide baten zain dago 1992az geroztik.

| 2019-06-10 14:08:00

Legebiltzarrak EH Bilduren legez besteko proposamen bat onartu du gaur aho batez eta, hala, Francisco Escudero Donostiako Kontserbatorioari kokapen berri eta egokia bilatzeko prozesua martxan jartzeko eskatu dio Hezkuntza Sailari, musika eskolak duintasunez eman ahal izateko. Izan ere, Josu Estarronak salatu duenez, “Kontserbatorioa oso egoera prekarioan ari da lanean eta 1992az geroztik konponbide baten zain dago, eraikinak ez dituelako eskolak emateko baldintza minimoak betetzen, eta musika eskolak are gutxiago”.
EH Bilduren ekimenez gaur onartutakoaren arabera, Jaurlaritzako Hezkuntza Sailak elkarrizketa prozesua ireki beharko du Kontserbatorioko zuzendaritza eta organo gorenarekin hilabete bateko epean aztertzeko zein liratekeen bere curriculuma duintasunez gauzatzeko baldintza eta kokapen egokiak. Prozesu horren baitan zentroaren beharrak aseko dituen espazio bat aurkitu beharko du, arrazoizko epe batean trasladoa egin ahal izateko.
Estarronak gogora ekarri du Kontserbatorioak egoitza duen eraikinaren jabegoa Jaurlaritzari dagokiola eta azken honen utzikeria kritikatu du, urteetan arazoak konpontzeko gai ez izateagatik. Bere iritziz, premiazkoa da bertan ari diren ikasle eta irakasleei konponbide egokia eskaintzea, Donostiako Udalak ere duela urtebete eskatu zuen moduan. Udalbatzak aho batez onartu zuen EH Bilduren mozio bat 2018ko ekainaren 21ean eta Hezkuntza Sailari eskatu zion 2019-2020 ikasturtea hasi aurretik Kontserbatorioaren kokapen berria erabakitzeko prozesua egiteko.
 

EH Bilduk Euskaltelen akzioen %15 erosteko operazioa bultzatzeko eskatu dio Lakuari enpresaren erabakigunea berreskuratzeko

Iker Casanovak lapurretatzat jo du Zegona inbertsio funtsak Euskaltelen kontrola eskuratu izana, eta ohartarazi du hemendik aurrera enpresaren etorkizuna Londresen, Zegonaren egoitzan, erabakiko dela, euskal gizartearen interesak, beharrak eta lehentasunak kontuan hartu gabe.

| 2019-06-06 17:06:00

EH Bilduk ezinbestekotzat jo du gaur Euskaltelen egoitzak eta erabakiguneek Euskal Herrian jarraitzea eta, hori hala izango dela bermatu ahal izateko, Jaurlaritzari eskatu dio telekomunikazio konpainiaren akzioen %15 (%5 lehenengo fase batean eta %10 gehiago ondoren) erosteko operazio bat bultza dezala Kutxabank eta Vital, BBK eta Kutxa fundazioekin batera. Iker Casanovak azaldu duenez, modu horretan ziurtatuko litzateke jabegoaren %25 baino gehiago euskal eskuetan egongo dela (Kutxabankek %19’88 du egun), eta horrek ezinezko egingo luke enpresaren egoitza eta erabakiguneak kanpora ateratzea, horrelako erabakiak hartu ahal izateko gutxienez akzioen %75aren oniritzia behar delako. “Hori egin daiteke eta egin behar da”, dio Casanovak; “bestela, Euskaltel iraganeko gauza bat izango da eta etorkizunean Virgin Spain edukiko dugu”. Izan ere, Lakuak behin eta berriz kontrakoa esan arren, gaur Euskaltelen errotzea arriskuan dago, ekonomikoki operazioa interesgarritzat jo izanez gero, Kutxabank ez beste jabe guztiek bat egin lezaketelako enpresaren egoitza eta erabakiguneak Euskal Herritik ateratzeko.
EH Bilduko legebiltzarkidearen iritziz, Euskaltelen gaineko kontrola Zegonari eman dion operazio eta prozesua lapurreta izan da, Euskaltel diru publikoarekin sortu zelako 1995ean herri gisa estrategikoak ziren helburu batzuk lortzeko eta orain, aldiz, inbertsio funts britainiar baten eskuetara pasatu delako. Horren haritik, Casanovak ohartarazi du hemendik aurrera Euskaltelen etorkizuna Zegonaren egoitzan, Londresen, erabakiko dela, egoitza formalki hemen eduki arren, eta erabaki horiek irizpide soilik ekonomikoei jarraituz hartuko direla, euskal herritarren interesak, beharrak eta lehentasunak kontuan hartu gabe. Hori dela eta, berretsi du ezinbestekoa dela euskal instituzioek Euskaltelen kontrola berreskuratzea, XXI. mendean telekomunikazioen sektorea estrategikoa delako edozein herrirentzat.
Euskaltelen gertatu denaren arduradunak zein izan diren ere zehaztu du Casanovak. Lehenik eta behin, Patxi Lopez lehendakari ohia aipatu du, bere garaian zuntz optikoaren sarea pribatizatu zuelako; bigarrenik, Iñigo Urkullu, bere gobernuak segida eman diolako prozesuari eta urrats guztiak babestu dituelako, Euskaltelen kontrola Zegonari emateraino; hirugarrenik, Kutxabankeko presidentea, bankuak enpresan zeuzkan akzio gehienak saldu dituelako azken urteotan; eta laugarrenik, Euskaltelen beraren presidentea.
 

ALBISTEAK

EH Bilduk Pasaia Antxoko anbulatorioa barrakoietatik ateratzeko eskatu du, baina EAJ eta PSE kontra agertu dira

2021-12-20 14:08:00

Rebeka Uberak salatu duenez, Antxoko osasun zentroak 10 urte daramatza behin-behinekotasunean eta ez ditu baldintza egokiak eskaintzen zonaldeko biztanleak, 5.000 baino gehiago, behar bezala artatzeko.

AHT eta Donostiako Metroko obretako lan baldintzak salatu ditu EH Bilduk

2021-12-17 11:37:00

Pazis Garciak lan baldintza duinak bermatzeko eta diru publikoarekin enplegu prekarioa sustatzeari uzteko exijitu dio Jaurlaritzari. Beldur da AHTko lanen kudeaketa Lakuaren esku uztea ez den lan baldintzak hobetzeko baliatuko.

Izurritearen kolpea arintzeko Lakuak hedabideei emandako laguntzen banaketa kritikatu du EH Bilduk

2021-12-16 14:07:00

Jasone Agirrek azalpenak eskatuko dizkio bihar kontrol bilkuran Bingen Zupiria sailburuari. Euskarazko komunikabideek laguntzen %6,6 bakarrik jaso dituzte eta beste asko kanpo geratu dira.

Lehen Arreta indartzea eta aztarnari taldeetan eginiko murrizketak iraultzea eskatu du EH Bilduk

2021-12-10 12:28:00

Rebeka Uberak Lehen Arreta ahultzea leporatu dio Osakidetzari, hain justu, lehentasuna eta premia anbulatorioak indartzea denean.