Legebiltzarra

EH Bilduk EAJren jarrera kritikatu du eta Memoria Historikoaren Legea aurkezteko prest agertu da, Frankismoaren Krimenen aurkako Plataformak hala nahi badu

Julen Arzuagak behar-beharrezkotzat jo du Legebiltzarrak Memoria Historikoari buruzko lege bat onartzea eta lan horretan EH Bildu Frankismoaren Krimenen aurkako Plataformaren esanetara dagoela adierazi du.

| 2019-07-24 16:21:00

EH Bilduk ezinbestekotzat jo du Legebiltzarrak Memoria Historikoaren Legea onartzea eta gogora ekarri du iaz, otsailean, EAJ, PSE eta PPk bat egin zutela koalizioak helburu horrekin aurkeztu zuen lege proposamena bertan behera uzteko. Gaur, ordea, Frankismoaren Krimenen aurkako Plataformaren Herri Ekimen Legegilea bidean da Parlamentuan, baina EAJ berau tramitatzearen aurka agertu da berriro ere, oraingoan Jaurlaritza, antza, gai horri buruzko lege-proiektua lantzen ari omen delako. EH Bilduko legebiltzarkide Julen Arzuagaren iritziz, “EAJ ekimena kapitalizatzen saiatzen ari da, Frankismoaren biktima ahaztuei egia eta justizia eskaintzea helburu duen plataformaren ekimen legegileari ateak itxita”.

Arzuagak jeltzaleen oportunismoa kritikatu du horren haritik, eta ohartarazi du Jaurlaritzaren lege proiektua herri ekimen legegilea baino dezente motzago geratuko dela Frankismoaren biktimei erreparazioa emateko orduan. Plataformako bozeramaileek kezka hori adierazi dute gaur bertan, eta euren proposamena bideratzeko eskatu diete talde parlamentarioei. Horren aurrean, “EH Bildu –esan du Arzuagak– plataformaren esanetara jartzen da eta, egokia iruditzen baldin bazaio, herri ekimen legegilearen testua lege proposamen gisa aurkezteko prest dago, oinarri horien gainean Memoria Historikoaren Legea onar dadin”.

Arzuagak azaldu duenez, “EAJ horrelako lege bat onartzearen kontra agertu da behin baino gehiagotan, Gogora institutuak arlo horretan egiten duen lana nahikoa delakoan”. Hala ere, EH Bilduko legebiltzarkidearen aburuz, “Gogorak ezin die justizia eta erreparazioa eskaini Frankismoaren biktimei, ez duelako horretarako gaitasunik. Horregatik, blokeoa etengabea zelako, Frankismoaren Krimenen aurkako Plataformak aurrera egin eta herri ekimen legegilea aurkeztu zuen, baina orduan, lege proposamena jada mahai gainean zegoenean hain justu, Jaurlaritzak iragarri zuen lege proiektu bat prestatzen ari zela, presaka eta korrika, aurreko diskurtsoa goitik behera aldatuz eta inorekin hitz egin gabe, ordura arte beharrezkotzat jotzen ez zuen legea, orain bai, egiteko”.

Osasun Sailak mediku espezialisten ebazpen prozesua eten behar du oposizioei buruzko ikerketa amaitu arte

EH Bilduren iritziz, ez da nahikoa lanpostuen esleipena zortzi kategoriatan soilik paralizatzea. “Orain hala egitea erabaki dute, baina maiatzean legez ezinezkoa zela esan zigun EAJk; argi dago gezurretan eta noraezean ari direla”, kritikatu du Rebeka Uberak.

| 2019-07-23 13:08:00

EH Bilduk 2016-2017 Lan Eskaintza Publikoan ateratako mediku espezialisten ebazpen prozesua kautelaz eteteko eskatu dio berriz ere Osasun Sailari, ospitalez kanpoko pediatria eta familia medikuena izan ezik, oraindik zabalik dagoen oposizioei buruzko ikerketa amaitu arte. Rebeka Uberak adierazi duenez, “zentzugabea da lanpostuak esleitzeko prozesuan aurrera egitea, agian ikerketa horren ondorioz hainbat erabaki atzera bota beharko direlako, eta horrek prozesua eteteak baino kalte handiagoa egingo luke; bai Osasun Sailak, bai Osakidetzak hori kontuan hartu eta zuhurtziaz jokatu beharko lukete, beraz”.
Hori dela eta, Uberak eznahikotzat jo du Osasun Sailak lanpostuen esleipena zortzi kategoriatan paralizatzea. “Ez da nahikoa, ez eta koherentea ere. Batetik, Osakidetzak egin zuen barne-ikerketaren arabera, hiru kategoriatan izan ezik oposizioak garbiak izan direlako guztiz, eta hala bada, zergatik paralizatu ditu zortzi? Eta bestetik, 11 kategoria direlako Gasteizko epaitegi batean ikertzen ari direnak; hau da, 11 dira susmopean daudenak, baina zortzi bakarrik eten ditu Osasun Sailak; ez da batere koherentea”.
Horren haritik, Uberak gogora ekarri du EH Bilduk oposizioetako ebazpen prozesua espezialitate guztietan kautelaz etetea eskatu zuela maiatzean, “eta EAJ horren aurka agertu zen, gure proposamena araubidearen kontra zihoala argudiatuz eta, gelditzekotan, barne-ikerketan irregulartasunak azaleratu ziren kategoriak bakarrik geldi zitezkeela esanez”. Orain, ordea, Osakidetzak zortzi kategoriatan paralizatu du prozesua. “EH Bilduren proposamena legezkoa zela aitortu du praktikan eta, aldi berean, agerian utzi du Osasun Sailean gezurretan eta noraezean ari direla”.
 

Lakuak obskurantismoa, inprobisazioa eta baliabide falta erakutsi ditu inbertsio funtsak iragartzean

Jaurlaritzak iragarri duen inbertsio funts publikoa motz geratzen dela dio Iker Casanovak. Ikusmen estrategiko falta egotzi dio Lakuari, bai eta baliabide ekonomiko nahikorik ez bideratzea ere.

| 2019-07-22 14:35:00

EH Bilduren iritziz, Urkullu lehendakariak gaur aurkeztu dituen inbertsio funtsek ez diete behar bezala erantzungo Araba, Bizkaia eta Gipuzkoako ehun industrialak dituen beharrizanei eta ez dira iristen Jaurlaritza bera orain arte iragarritako mailara, 2016az geroztik iragartzen ari baitzen 250 milioi euro bideratuko zituela inbertsio funts bat sortzera eta gaur, ordea, bakarrik 75 milioiko funts publiko bat sortuko duela esan du, gehi beste bat, publiko-pribatua, non Lakuak eta aldundiek 15 milioi baino ez dituzten ipiniko.
Iker Casanovaren hitzetan, “legealdi osoan zehar iragarri duen inbertsio funtsa aurkeztu du gaur Jaurlaritzak, baina gaurkoa ez da orain arte agindu egin zaiguna; funtsa aldatu eta murriztu egin baita. Azken urteotan Gobernuak gai horretaz egin duen agerraldi bakoitzean bertsio ezberdin bat eman du funts horren inguruan, bai helburuei dagokienez, bai osaketari dagokionez, eta orain, zenbatekoari begiratuz gero, bistakoa da hasierako planteamendua murriztu duela 250 milioitik 75 milioira pasatu baita. Hasierako planteamenduan baliabideak nahikoak ez baziren, gaur iragarri duten kopuruarekin esan dezakegu funts horrek izaera sinbolikoa izango duela eta ez duela benetan balio izango Euskaltel, Gamesa edo Ibermatica bezalako enpresa nagusien errotzea mantentzeko eta bermatzeko”.
Finean, erantsi du Casanovak, “Urkulluren Gobernuak erakutsi du inprobisatzen ari dela, ez daukala ikusmen eta planteamendu estrategikorik, ez eta baliabide ekonomiko nahikorik ere, besteak beste, zerga politika atzerakoia egiten ari delako”.
 

Estrasburgoko Auzitegiaren erabakiaren ostean Estatuko terrorismoaren biktimekin bat egin behar da

Estrasburgoko Auzitegiaren erabakiak euren eskubideen alde borrokatzen jarraitzera behartzen ditu Estatuaren biktimak, eta EH Bilduk bide horretan babesa eta laguntza emateko determinazio osoa dauka.

| 2019-07-18 19:44:00

Giza Eskubideen Europako Auzitegiak BVEren eta GALen zenbait biktimaren eskabidea aintzat hartzeari uko eginda, “Estatuko terrorismoaren biktimekin bat egiteko unea” da, Julen Arzuaga EH Bilduko legebiltzarkidearen iritziz. Arzuagaren esanetan, “erabaki horrekin Estrasburgoko Auzitegiak euren eskubideen alde borrokatzen jarraitzera behartzen ditu Estatuko terrorismoaren biktimak, beste biktimekiko berdintasun baldintzetan tratatuak izatea lortzeko”.
EH Bilduko ordezkariak azpimarratu du “Estatuaren biktimak ahaztutako biktimak direla, instituzioek baztertutakoak, eta gaur ere, ikusi dugunez, euren eskubideak ez dira babestuak izan. Hori dela eta, EH Bildutik gure elkartasuna eta gertutasuna adierazi nahi diegu, bai eta egiaren eta justiziaren bidetik laguntzeko gure determinazioa ere”.
 

Euren programa legegilea ez betetzeaz gain, EAJ eta PSEk oposizioaren lege ekimenak blokeatzen dituzte sistematikoki

EH Bilduk Jaurlaritzaren paralisia salatu eta oposizioaren lege ekimenak gelditzea egotzi die EAJ eta PSEri. Oposizioak proposatu dituen 27 legeetatik hiru bakarrik onartu dira.

| 2019-07-18 12:38:00

EH Bilduk legealdi honetan onartutako lege kopuruaren inguruko balantzea egin du gaur, eta ondorio argi batera heldu da: “Legealdiak ezaugarri bat baldin badu, Jaurlaritzaren paralisia da, eta ez bakarrik EAJ eta PSE ez direlako euren programa legegilea betetzeko gai, baizik eta oposizioko taldeon lege ekimenak blokeatu eta geldiarazten ari direlako etengabe. Beraiek ez dute egiten, eta egin nahi dugunoi ez digute egiten uzten. Jaurlaritzaren paralisia eta Urkulluren bultzada politiko falta agerian uzten duen ekimen oro atzera botatzen dute sistematikoki”.
Unai Urruzunok haien lege egutegia ez betetzea leporatu die EAJ eta PSEri, legealdiaren hasieran iragarri zituzten 28 legeetatik zazpi baino ez dituztelako onartu. “Are okerrago, beraiek dira Gobernuaren hiru lege-proiekturen tramitazioa blokeaturik dutenak: Gardentasunari, Enplegu Publikoari eta Sektore Publikoari buruzkoak, hain zuzen”. Gainera, erantsi du, EAJ eta PSE tematuta daude oposizioaren lege ekimenak blokeatzearekin: “Oposizioko taldeok 27 lege proposatu ditugu eta hiru bakarrik iritsi dira lege izatera: bata, saltoki handiei buruz; beste bat, Eskola Kontseiluei buruz eta, hirugarrena, Industriaren Sustapenerako Baltzuari buruz. Beste guztiak, edo ez zituzten tramitera onartu edo blokeatzen ari dira tramitazioan”.
EH Bilduko legebiltzarkideak salatu duenez, oposizioaren ekimen politikoa eragozteaz gain, gizartearen beraren proposamenak ere atzera bota dituzte gobernukideek. “Legealdian zehar hiru Herri Ekimen Legegile iritsi dira Legebiltzarrera. Pobreziaren eta eskola segregazioaren aurkakoak zuzenean baztertu zituzten, eztabaidatu gabe, eta hirugarrena, memoria historikoari buruzkoa, berdin amaituko da, zantzu guztien arabera, nahiz eta Parlamentuko zerbitzu juridikoen txostena oso argia den: ez dago inolako oztopo legalik memoria historikoari buruzko Herri Ekimen Legegilea tramitatzeko. Borondate politiko baino ez da behar”.
 

ALBISTEAK

Jaurlaritzak inbertsio ekonomikoak areagotuko ditu Aiaraldea suspertzeko, EH Bilduren ekimenez

2021-11-24 11:59:00

Unai Fernandez de Betoño pozik agertu da Aiaraldeko susperraldi sozioekonomikoa bultzatzeko ponentzian lortutako akordioarekin.

EAJk eta PSEk Ingurumen Administrazioari buruzko Legeak udal autonomian duen inpaktua juridikoki aztertzea galarazi dute

2021-11-23 14:21:00

Lakuak Ingurumen Administrazioaren Legea Lurralde Antolamenduarena atzeko atetik aldatzeko baliatu nahi duela ikusirik, EH Bilduk azterketa juridiko bat eskatu du. “Prozedura horrek udal autonomia urratzen du eta, beraz, legezkoa den aztertu behar da nahitaez”. EAJ eta PSE bakarrik geratu dira ezezkoan.

Ulertezina da Jaurlaritzak alokairuen prezioak mugatzeko dituen aukerak erabiltzeari uko egitea

2021-11-18 14:01:00

EH Bilduk berretsi du, alokairuen garestitzeari muga jartzeko, ezinbestekoa dela EAEk berez dituen tresna legalak erabiltzea, Madrilen onartuko den eta eraginkortasun mugatua izango duen Etxebizitza Legearen zain egon beharrean.

EH Bilduk industria eredu berri bat proposatu du sektorea suspertzeko

2021-11-16 14:55:00

Iker Casanovak Industria Garatzeko Plana erretiratzeko eskatu dio Jaurlaritzari “guztiz etsigarria” delako. 67 proposamen aurkeztu ditu industriak ekonomian zeukan pisua berreskuratzeko, Ikerketa eta Garapenean inbertsioa BPGren %3ra igotzeko eta enpresa estrategikoen errotzea bermatzeko.