Legebiltzarra

Kooperatiben Legearen tramitazioan Confebasken esku-sartze onartezina salatu du EH Bilduk

Patronalak Legebiltzarrera jo du lege proiektuaren tramitazioa baldintzatu nahian, EH Bilduren zuzenketak direla eta. Kooperatibek Lanbiden ordezkari bat izatea proposatu du koalizioak, baina Confebaskek enpresa-erakundeen ordezkaritzaren monopolioari eutsi nahi dio.

| 2019-09-16 14:17:00

Leire Pinedo eta Larraitz Ugarte EH Bilduko legebiltzarkideek Kooperatiben Lege Proiektuaren tramitazioa eta haren edukia bera baldintzatzen eta bideratzen saiatzea egotzi diote gaur Confebaski, eta patronalaren esku-sartzea onartezina dela salatu dute. “Oso larria da Legebiltzarraren jarduera legegilean eskua sartzea eta Legebiltzarrari esatea nola bideratu behar duen lege proiektu bati buruzko eztabaida; Confebask ez da nor Parlamentuari esateko zer nolako legeak onartu behar dituen”. Izan ere, patronalak gutuna bidali dio Legebiltzarreko presidenteari, ados ez dagoelako Kooperatiben Lege Proiektuaren tramitazioaren baitan EH Bilduk eginiko zenbait zuzenketarekin; areago, patronalak tramitazioa eteteko eskatu du, Lan Harremanetarako Kontseiluak zuzenketa horiei buruzko iritzia eman arte.
Pinedo eta Ugarteren ustez, “Confebasken eskaria oso larria da, helburu duelako Legebiltzarraren jarduera legegilea baldintzatzea eta haren interes partikularren arabera bideratzea”. “Ondo dakigu lobby ekonomikoak ohituta daudela botere politikoaren erabakiak bideratzen, eta euren boterea erabiltzen dutela, ezkutuan, alderdiak eta instituzioak presionatzeko, baina Confebaskek harago joan da, inolako disimulurik gabe jo duelako Legebiltzarrarengana zer egin behar duen esateko, eta guztia enpresa-erakundeen ordezkaritzaren monopolioa nahi duelako Lanbideko Administrazio Kontseiluan”.
Horretan, enpresa-erakundeek Lanbiden duten ordezkaritzan, alegia, datza hain justu Confebasken desadostasuna EH Bilduren proposamenekin. “Gaur egun enpresa-erakundeek bost ordezkari dituzte Lanbiden eta Confebaskenak dira bostak. Guk, ordea, proposatu dugu bost ordezkari horietatik bat mugimendu kooperatibistarena izango dela bermatzea, eta horrek, jakina, Confebaskek ordezkari bat galtzea ekarriko luke”. EH Bilduren proposamena guztiz logikoa dela defendatu dute Pinedok eta Ugartek: “Guztiok dakigu zer nolako garrantzia duten kooperatibek herri honetan (Barne Produktu Gordinaren %7 eta 55.000 langile baino gehiago) eta guztiz arrazoizkoa da haiek ere Lanbideko Administrazio Kontseiluan egotea. Ezinbestekoa da Lanbiden enpresa-erakundeen ordezkaritzak Araba, Bizkaia eta Gipuzkoako errealitate ekonomiko eta sozial osoa islatzea, eta horretarako lekua utzi behar zaie kooperatibei; Jaurlaritzak berak ere ondo ikusten du aukera hori”.
Gutun bidez egin duen eskariari erantzunez, EH Bilduko legebiltzarkideek Confebaski gogorarazi diote “Lanbiden ordezkaritza duela Legebiltzarrak hala erabaki zuelako, eta Legebiltzarrak berdin-berdin, zilegitasun berberarekin, erabaki dezake orain ordezkaritza hori mugimendu kooperatibistarekin partekatu behar dela”. Beraz, erantsi dute, “Confebaski eskatu behar diogu betiko bazter ditzala Legebiltzarra presionatzea baino bilatzen ez duten gutunak eta jokabideak, jabetu dadila herri honetako errealitate sozial eta ekonomikoaz, ikus dezala berak ez duela enpresa-munduaren monopolioa, eta, ondorioz, onar dezala kooperatibek ordezkaritza izan behar dutela Lanbiden”.
Bestalde, Legebiltzarreko presidenteari galdegin diote “Kooperatiben Lege Proiektuaren tramitazioak berdin-berdin jarrai dezala, Confebasken gutuna aintzat hartu gabe, eta patronalari argi utzi diezaiola gutun horiek, presionatzeko forma horiek, onartezinak direla eta soberan daudela”.
 

EH Bilduk udalgintzaren alde egiten duen apustu estrategikoaren baitan, Goirizelaia eta Larrion udal politikan zentratuko dira aurrerantzean

Biek utzi dute Legebiltzarra eta euren tokiak Diana Urreak eta Ibon San Saturninok beteko dituzte, hurrenez hurren.

| 2019-09-16 14:10:00

Jone Goirizelaiak eta Miren Larrionek legebiltzarkide karguari uko egin diote eta hemendik aurrera udal politikan zentratuko dute euren lan instituzionala Bilbon eta Gasteizen, hurrenez hurren, iragan maiatzeko hauteskundeetan bertako herritarrekin hartu zuten konpromisoari jarraituz. Erabaki hau EH Bilduk udalgintzaren alde egiten duen apustuaren baitan kokatzen da, tokiko eskalak garrantzi estrategikoa baitu ezkerreko subiranismoarentzat. Batetik, biharko Euskal Errepublikan baliagarriak izango diren gobernantza eredu berriak saiatzeko aukera eskaintzen duelako; bestetik, gure balioetan oinarritutako gobernugintza garatu dugun lekuetan gizarte sektore zabalak bildu ditugulako. Ikuspegi nazional batetik ere, udalgintzak euskal lurraldeak artikulatzeko egitasmoak martxan jartzea eta, beraz, haien arteko kohesioa indartzea ahalbidetzen du.
Goirizelaia eta Larrionen ordezkoei dagokienez, Diana Carolina Urreak (Armenia, Colombia, 1987) lehenengoaren tokia hartu eta Legebiltzarrera itzuliko da, aurreko legealdian ere talde parlamentarioan aritu baitzen. Urrea Turismoan diplomatua da Deustuko Unibertsitatean eta Emakume eta Gizonen arteko Berdintasunari buruzko Masterra egin du UPV-EHUn.
Larrionen ordez Ibon San Saturnino (Gasteiz, 1975) arituko da. Egun Arabako EH Bilduko arduradun politikoa da eta aurretik arlo instituzionaleko burua izan zen. Eskubide sozialen aldeko eta arrazakeriaren aurkako herri mugimenduko kide ere izan da. Prestakuntza akademikoari dagokionez, San Saturnino arkitektoa da (UPV-EHUko Donostiako Arkitektura Goi Eskola Teknikoan).
 

Ander Rodriguezek ordezkatu du Pello Urizar Legebiltzarrean

Legebiltzarkide berria Gizarte Politikako foru diputatua izan da Gipuzkoan.

| 2019-09-10 11:40:00

Pasa den ekainean Pello Urizarrek kargu politiko guztiak uzteko erabakia ezagutzera eman ondoren, EH Bilduk haren erreleboa gauzatu du jada talde parlamentarioan eta Ander Rodriguez Lejarzak (Arrasate, 1982) kargua hartu du gaur bertan, Urizarren ordezko gisa.

Rodriguezen ibilbide instituzionala 2003an hasi zen Arrasaten, zinegotzi bezala, 2015era bitartean. Batzarkide ere izan da Gipuzkoako Batzar Nagusietan bi etapa ezberdinetan (2007-2011 eta 2017-2019) eta 2011tik 2015era Gizarte Politikako diputatua izan zen Gipuzkoako Foru Aldundian.

Prestakuntza akademikoari dagokionez, EH Bilduko legebiltzarkide berria Historiako Gradua (EHU/UPV) dauka, Masterra egin du Ikerketa Historiko, Artistiko eta Geografikorako Metodo eta Teknika Aurreratuei buruz, Analisi Geoespazialari buruzko Graduondoa dauka eta egun doktoretza-tesia egiten ari da: Teoria Ebolutiboaren Aplikazioa Transmisio Kulturalari Historiaurrean.

EH Bildu eta Elkarrekin Podemosek Memoria Historikoari buruzko Lege Proposamena aurkeztu dute

Frankismoaren krimenen aurkako Euskal Plataformak eskatu bezala, bi taldeek haren herri ekimen legegileari bide eman diote eta lege proposamen gisa eramango dute Osoko Bilkurara. “EAJk inoiz ez du halako lege bat nahi izan”.

| 2019-09-09 13:24:00

EH Bilduk eta Elkarrekin Podemosek Memoria Historikoari buruzko Lege Proposamen bat aurkeztu dute Legebiltzarrean, Frankismoaren krimenen aurkako Euskal Plataformak uztailean egin zuen eskaria aintzat hartuta. Jaurlaritza haren herri ekimen legegilea tramitatzearen aurka agertu zenez, Plataformak dei zuzena egin zien talde parlamentarioei herri ekimena berrartu eta bideratzeko, eta horixe da hain justu Julen Arzuaga EH Bilduko legebiltzarkideak eta Jon Hernandez Elkarrekin Podemosekoak egin dutena, herri ekimen legegilea zenajon hitzez hitz lege proposamen gisa erroldatzea, alegia. Legebiltzarreko Mahaiak bihar bertan tramitatuko du eta aste gutxi barru eztabaidatzeko moduan egongo da.
Arzuaga eta Hernandezek behar-beharrezkotzat jo dute Memoria Historikoari buruzko Euskal Legea onartzea frankismoaren biktimak aitortzeko eta dagokien erreparazio integrala emateko, gizarte bezala haiekin oraindik dugun zorra guztiz kitatzeko eta biktima gisa dituzten oinarrizko eskubideak bermatzeko. Biktimei aitortza eta erreparazioa emateaz gain, lege proposamenak xede du baita ere frankismoaren gorazarrea galaraztea eta krimen haien egileak epaitzeko bideak irekitzea.
Arzuaga eta Hernandezek gogora ekarri dute legealdi honetan EAJk helburu horiek zituzten bi lege proposamen atzera bota dituela jada. Bata, Elkarrekin Podemosek aurkeztutakoa, epai frankistak deuseztatzeko; bestea, EH Bildurena, memoria historikoari buruzko lege integrala. Legebiltzarkideek salatu dutenez, jeltzaleek berdin jokatu dute Frankismoaren krimenen aurkako Euskal Plataformak aurkeztu zuen herri ekimen legegilearekin. “Jaurlaritza memoria historikoari buruzko lege proiektua lantzen ari dela argudiatu zuten, hori izan zen euren ezezkoa justifikatzeko aitzakia, baina, egia esan, EAJk inoiz ez du memoria historikoari buruzko lege bat nahi izan eta Lakuan ez dute inolako interesik izan gai horretan Plataformak herri ekimena aurkeztu arte. Jokaldia, dena den, gaizki atera zaie, EH Bilduk eta Elkarrekin Podemosek herri ekimena berreskuratu dugulako, eta orain iraingarria litzateke biktimentzat EAJ berriz ere aitortza eta erreparazioa ematearen aurka agertzea eta lege proposamena bertan behera uztea”.

EH Bildu eta Elkarrekin Podemos akordio batera iritsi dira euskara ikastea doakoa izan dadin C1 mailara arte

Euskara jakiteko eskubidea bermatzeko legea onartzea adostu dute, sektorean adostasuna oso zabala dela azpimarratu dute eta EAJ eta PSEri dei egin diete akordioan sartzeko, “aukera paregabea dugulako euskara indarrez bultzatzeko”

| 2019-09-06 12:56:00

EH Bilduk euskara jakiteko eskubidea bermatzeko lege proposamena aurkeztu zuen 2018ko urrian eta gainerako talde parlamentarioek aurkeztutako zuzenketei buruzko eztabaida martxan da jada Legebiltzarrean. Marko horretan, ponentzian, koalizio independentista eta Elkarrekin Podemos akordio batera iritsi dira euskara ikastea doakoa izan dadin C1 maila (EGA zena) lortu arte, Lander Martinezen taldeak proposatu zuen moduan. Martinezek berak eta Rebeka Ubera EH Bilduko legebiltzarkideak bi taldeen arteko akordioaren garrantzia nabarmendu dute gaur goizean eta dei egin diete EAJ zein PSEri akordio horrekin bat egin dezaten, euskalgintzan ere adostasuna erabatekoa delako horren inguruan. Esan dutenez, “euskara indarrez bultzatzeko aukera paregabea dugu, adostasun zabal-zabala lortuta eta bide berriak irekita”, hizkuntza politikan urteetan ezarrita egon den “abertzale eta ez abertzaleen arteko dikotomia” historikoa gainditzen dituztenak.
Horren haritik, Uberak azpimarratu du euskara ez dela inorena, guztiona baizik; bakoitzak bere arrazoiak izan ditzake euskara ikasteko eta euskara ikastea doakoa bilakatzeak ez du inor kaltetzen; guztiok irabazten dugu horrela, elkarbizitzan, kohesioan, administrazio publikoan, esparru guztietan. Lortu dugun akordioa jauzi kualitatiboa da eta onura besterik ez du ekarriko gizartean, euskararen ezagutzan eta erabilpenean bultzada emateko”.
Martinezek, bestalde, gogora ekarri du euskara ikastea C1 mailara arte doakoa izan dadila lehentasuna izan dela beti Elkarrekin Podemosentzat eta, ondorioz, EH Bildurekiko akordioa garrantzitsutzat jo du, “euskara ikasteko eta jakiteko eskubidea babesten duelako eta prozesu hori oztopatu dezaketen muga ekonomikoak ezabatzen dituelako”. Azaldu duenez, legea onartuz gero, egun indarrean dagoen diru-laguntzen sistema, “doakotasuna bermatzen ez duena eta diglosian sakondu besterik egiten ez duena, alegia”, gaindituko litzateke.
Euskararen doakotasunetik harago, EH Bildu-Elkarrekin Podemos akordioak bestelako neurriak ere jasotzen ditu, hala nola, Administrazio Publikoa euskalduntzeko baliabideak handitzea, lan munduan euskararen erabilpena sustatzea eta etorkinei euskara ikasteko aukera gehiago ematea.
 

ALBISTEAK

Jaurlaritzak inbertsio ekonomikoak areagotuko ditu Aiaraldea suspertzeko, EH Bilduren ekimenez

2021-11-24 11:59:00

Unai Fernandez de Betoño pozik agertu da Aiaraldeko susperraldi sozioekonomikoa bultzatzeko ponentzian lortutako akordioarekin.

EAJk eta PSEk Ingurumen Administrazioari buruzko Legeak udal autonomian duen inpaktua juridikoki aztertzea galarazi dute

2021-11-23 14:21:00

Lakuak Ingurumen Administrazioaren Legea Lurralde Antolamenduarena atzeko atetik aldatzeko baliatu nahi duela ikusirik, EH Bilduk azterketa juridiko bat eskatu du. “Prozedura horrek udal autonomia urratzen du eta, beraz, legezkoa den aztertu behar da nahitaez”. EAJ eta PSE bakarrik geratu dira ezezkoan.

Ulertezina da Jaurlaritzak alokairuen prezioak mugatzeko dituen aukerak erabiltzeari uko egitea

2021-11-18 14:01:00

EH Bilduk berretsi du, alokairuen garestitzeari muga jartzeko, ezinbestekoa dela EAEk berez dituen tresna legalak erabiltzea, Madrilen onartuko den eta eraginkortasun mugatua izango duen Etxebizitza Legearen zain egon beharrean.

EH Bilduk industria eredu berri bat proposatu du sektorea suspertzeko

2021-11-16 14:55:00

Iker Casanovak Industria Garatzeko Plana erretiratzeko eskatu dio Jaurlaritzari “guztiz etsigarria” delako. 67 proposamen aurkeztu ditu industriak ekonomian zeukan pisua berreskuratzeko, Ikerketa eta Garapenean inbertsioa BPGren %3ra igotzeko eta enpresa estrategikoen errotzea bermatzeko.