Legebiltzarra

Legebiltzarrak larrialdi klimatiko egoera deklaratuko du bihar, EH Bilduk hala proposatuta

Mikel Oteroren iritziz, pauso garrantzitsua da, larrialdi klimatikoa deklaratzeak konpromiso politikoak hartzea eskatzen duelako. “Horrek esan nahi du Legebiltzar eta Jaurlaritzaren politika, lege, aurrekontu eta plangintza guztiek deklarazio hori aintzat hartu beharko dutela”.

| 2019-09-25 14:03:00

EH Bilduren proposamen bati jarraituz, Legebiltzarrak larrialdi klimatikoa deklaratuko du bihar, Mikel Oterok gaur iragarri duenez. Oterok berak aurkeztu zuen onartuko den mozioa eta, bere iritziz, biharkoa “aurrerapauso garrantzitsua” izango da, aurrerantzean konpromiso politikoak hartzea eskatuko duelako. “Horrek esan nahi du Legebiltzar eta Jaurlaritzaren politika, lege, aurrekontu eta plangintza guztiek larrialdi klimatiko egoera aintzat hartu beharko dutela. Herri gisa dugun erronka nagusietariko bat da, eta arduraz, modu kohesionatuan, erantzun behar diogu”.
EH Bilduko legebiltzarkideak azaldu duenez, “larrialdi klimatikoa deklaratzea garrantzitsua da egoera zein den politikoki onartzea suposatzen duelako, legeak eta aurrekontuak onartzerakoan arazo klimatikoa kontuan hartzeko konpromiso zehatzak eskatuko dituelako, zeharkako politikak martxan jarri beharko direlako eta bestelako neurriak hartzea ahalbidetuko duelako, betiere norabide horretan, aldaketa klimatikoaren aurka”. Oterok helburu horrekin ostiralerako mundu osoan zehar deitu diren mobilizazioak ekarri ditu gogora, eta garrantzitsutzat jo du Legebiltzarrak ere une honetan mezu argi eta sendo bat bidaltzea larrialdi klimatikoaz ohartarazteko.
Bere esanetan, “krisi klimatikoa eztabaida politikoaren erdigunean kokatuko da, jendearen kezka nagusien artean ere kokatzen ari den bezalaxe; larrialdi klimatikoa krisi ekologiko orokor baten baitan txertatzen da, orain urtetan egindako politika arduragabeen ondorioak pairatzen ari baikara”. Hori dela eta, Oterok adierazi duenez, ezinbestekoa da “aldaketa sakonak” egitea, besteak beste, berotegi efektuko gasen isuriak murrizteko. “Krisi ekologikoa ez da kontu sektorial bat, muinean krisi politikoa da sektore guztiei eragingo dielako, batez ere ekonomiari”.
 

EH Bilduk frankismoaren biktimak erreparatzeko anbizio falta egotzi dio Jaurlaritzari

Koalizioaren irudiko, Lakuak aurkeztu duen Memoria Historikoaren Legearen zirriborroa Frankismoaren Krimenen Aurkako Plataformaren ekimena baino askoz motzago geratzen da. “Gobernuak inoiz ez du nahi izan Legebiltzarrak Memoria Historikoaren Lege bat onartzea”.

| 2019-09-25 10:17:00

EH Bilduk “anbizio falta” egotzi dio Jaurlaritzari frankismoaren biktimen erreparazioari dagokionez, Lakuako bozeramaile Josu Erkorekak gaur aurkeztu duen Memoria Historikoaren Euskal Legearen zirriborroa “oso motz” geratzen delako, Julen Arzuaga legebiltzarkidearen esanetan. Gainera, ezinezkoa izango da legealdia amaitu aurretik lege hori Legebiltzarrean onartzea. Halaber, Arzuagak kritikatu du Jaurlaritza EH Bilduk eta Elkarrekin Podemosek gai horretaz erroldatu duten lege proposamena tramitatzearen kontra agertu izana. Azaldu duenez, EH Bildu zein Podemos Frankismoaren Krimenen Aurkako Plataformaren Herri Ekimen Legegileari bide ematen saiatu dira Legebiltzarrean, proposamen horrek planteatzen dituen neurriek gaur Gobernuak aurkeztu dituenek baino askoz anbizio handiagoa dutelako.
EH Bilduko legebiltzarkideak gogora ekarri du bere egunean Jaurlaritza koalizioaren lege proposamen baten kontra agertu zela, “Gogora Institutuaren funtzioak mugatuko zituelakoan”, eta Frankismoaren Krimenen Aurkako Plataformak aurrea hartu zionean bakarrik erakutsi zuela Memoria Historikoaren Legea egiteko interesa. Arzuagaren iritziz, “Gobernuaren jokaera horren atzean dagoena ez da protagonismo kontu hutsa; badauka arrazoi politiko bat. Izan ere, bai EH Bilduren proposamena, bai Plataformaren ekimenak oso altu jartzen dute frankismoaren biktimen aitortza eta erreparazioa, eta anbizio handikoak dira kalte-ordainak zehazterakoan, frankismoaren biktimak besteen pare jarrita, eta hori gehiegizkoa da, antza, Gobernuarentzat, bere zirriborroan ez baitu aipatzen inolaz ere zein diren baldintzak eta kopuruak frankismoaren biktimak erreparatzeko, Gogorari eskuak libre utzita hori guztia zehazteko”.
Jaurlaritza Frankismoaren Krimenen Aurkako Plataformaren ekimena Legebiltzarrean tramitatzearen kontra agertu da, eta hori ere gogor kritikatu du Arzuagak, “Erkorekak esan duelako Plataformaren testuak eta Gobernuarenak antzekotasun handia dutela”. Beraz, “hala bada, zergatik ez dio uzten Plataformaren testuari bidea egiten, gero tramitazioan zehar zuzenketak txertatzeko?” Galdera horrek erantzun argia du, legebiltzarkidearen ustez: “Argi dago, Jaurlaritzak inoiz ez du Memoria Historikorako Lege bat nahi izan, exijentzia gutxiagoko testua nahiago duelako, Gogorari eskuak libre utziko dizkiona”.
 

EH Bilduk eskatu du irakasleen ordezkapenak kudeatzeko sistema ixtea akatsak zuzendu arte

“Egoera onartezina da. Milaka kaltetu daude. ‘Ordezkagunea’ plataformaren funtzionamendu kaxkarragatik sortzen ari diren arazoek izugarrizko haserrea sortu dute irakasle, ikasle eta familien artean”, salatu du Rebeka Uberak.

| 2019-09-24 15:00:00

EH Bilduk Legez Besteko Proposamen bat aurkeztu du gaur Legebiltzarrean, urgentziazko prozeduraz, Hezkuntza sailari eskatzeko ‘Ordezkagunea’ plataforma bertan behera utz dezan, behintzat, inongo arazorik gabe funtzionatzen duela erabat bermatu dezakeela ziurtatu arte. Era berean, Jaurlaritzari eskatu dio ikasturte hasieratik sistemak eragin dituen akatsak identifikatu, kuantifikatu eta eragindako kalteak konpentsatu ditzala. Besteak beste, irakasleek galdutako lan egunen puntuazioa jaso dezatela, eta baita dagokien ordain saria ere

Rebeka Ubera legebiltzarkideak azaldu duenez, 2019-2020 Kurtsoaren hasierarekin batera, Jaurlaritzako Hezkuntza Sailak ikastetxe publikoetako irakasleen ordezkapenak kudeatzeko ‘Ordezkagunea’ plataforma informatiko berria jarri zuen martxan. Horren emaitza, “inoiz bizi izan den ikasturte hasiera kaotikoena izaten ari da”. Gertatutako akatsak oso larriak izan dira: postu bera eskaini zaie irakasle bati baino gehiagori; existitzen ez diren lan postuak eskaini dira; aldiz, ikasleak klaseek galdu dituzte hutsik dauden plazak atera ez direlako; beste alde batetik, punturik ez duten hainbat irakasleri sistemak plaza eman die, puntu gehiago dituztenak lanik gabe utziz.  “Azken finean, anabasa. Hezkuntza sailaren hamaikagarren txapuza da hau”.

EH Bilduko legebiltzarkidearen hitzetan, “egoera hau onartezina da. Langile askoren oinarrizko eskubideak urratzen ari dira. Eta, ondorioz, gure ikasleenak. Asteak daramatzagu kaos hau pairatzen. Arduragabekeria ikaragarria da kaosaren jakitun den Hezkuntza sailak honen gainean urgentziazko neurririk hartu ez izana oraindik orain. Sindikatu guztiek salatu dute egoera hau, ehunka irakaslek publiko egin dituzte jada euren kexak, bai Jaurlaritzan zein sare sozialetan, baina Cristina Uriarteren saila beste alde batera begiratzen ari da”.

Horregatik, Uberak adierazi du urgentziazko neurriak hartu egin behar direla lehenbailehen, eta gaur bertan erroldatu du ekimen bat Hezkuntza sailari eskatzeko ‘Ordezkagunea’ plataforma itxi dezan akatsak zuzendu arte, eta eragindako kalteak konpentsatu ditzala.

Estatu espainolaren izaera antidemokratikoa salatzea proposatu du EH Bilduk, independentista katalanen aurkako auzia dela eta

Auzitegi Gorenaren epaia hemendik gutxira argitaratuko dela jakinda, absoluzioa aukera onargarri bakarra dela dio EH Bilduk Legebiltzarrean egin duen proposamenak.

| 2019-09-24 14:27:00

Kataluniako politikarien aurkako prozesu judizialaren baitan Auzitegi Gorenaren epaia argitaratzear dagoela, EH Bilduk legez besteko proposamena aurkeztu du Gasteizko Legebiltzarrak adieraz dezan independentista katalanen aurkako auziaren jatorrian “Estatu espainolaren izaera antidemokratiko eta autoritarioa” dagoela. Proposamenak, Unai Urruzunok sinatuta, eransten du Katalunian “ariketa demokratikoa” egin zutela herriaren iritzia ezagutzeko eta, beraz, auzipetu guztien absoluzioa dela Gorenean onar daitekeen aukera bakarra.
EH Bilduren proposamenak dioenez, gatazka politikoak ez dira auzitegietan konpondu behar, baizik eta “elkarrizketa politikoaren bidez eta herritarren borondatea errespetatuz”. Halaber, koalizioak euskal gizarteari eta herri ordezkariei dei egiten die Gorenak auzipetuak zigortuz gero deituko diren mobilizazioetan parte hartzera. Izan ere, “injustizia bat eta demokraziaren aurkako eraso bat izateaz gainera, horrelako epai batek, orain Kataluniarekin bezala, aurrerantzean gurea bezalako beste herriei ere beren etorkizuna erabakitzea saihestea” izango luke helburu.
 

Irakasleen ordezkapenak kudeatzeko sistema kaos bilakatu da Hezkuntza Sailaren kudeaketa negargarria delako

“Milaka kaltetu daude eta haientzat iraingarria da Uriarte sailburuak esatea Ordezkagune sistema telematikoan arazo puntual batzuk baino ez direla egon”, dio Rebeka Uberak. Azalpenak eskatu ditu Legebiltzarrean.

| 2019-09-17 14:55:00

EH Bilduk azalpenak eskatu dizkio Cristina Uriarte Hezkuntza sailburuari Legebiltzarrean, irakasleen ordezkapenak kudeatzeko sistema kaos bilakatu delako ikasturte hasiera honetan. Rebeka Uberak, zehazki, sailburuaren agerraldia eskatu du eta hainbat galdera erroldatu ditu Uriartek argitu dezan nolako baldintzetan jarri duen martxan Ordezkagune sistema telematikoa Hezkuntza Sailaren zerrendetan dauden irakasleei lanpostuak esleitzeko eta zer egiten ari den sortu dituen kalteak zuzentzeko. Uberaren iritziz, “Hezkuntza Sailaren lana negargarria izaten ari da legealdi osoan zehar, eta oraingo honetan Ordezkagunearekin gertatu dena kudeaketa txar etengabe horren beste adibide bat besterik ez da”.
EH Bilduko legebiltzarkideak Uriarte sailburuak emandako azalpenak kritikatu ditu, “Jaurlaritzaren kudeaketa penagarriak kaltetutako milaka irakasleentzat iraingarria delako sailburuak esatea ikastetxeetan ordezkapenak kudeatzeko sisteman arazo txiki eta puntual batzuk bakarrik egon direla”. Uberaren esanetan, “gertatu denari ezin zaio disfuntzioa deitu, inprobisazioa eta kudeaketa txarra baizik; Ordezkagunea behar bezala ezartzeko behar diren neurriak hartu beharrean, Hezkuntza Sailak edozein modutara martxan jartzea nahiago izan du, eta horrexek ekarri ditu orain irakasle ordezkoak pairatzen ari diren arazoak: plaza guztiak ez ateratzea, puntuazioa ordenari jarraituz ez esleitzea, lanpostu partzialak behar bezala ez ematea… Ez da onargarria gertatu dena”.
 

ALBISTEAK

Jaurlaritzak inbertsio ekonomikoak areagotuko ditu Aiaraldea suspertzeko, EH Bilduren ekimenez

2021-11-24 11:59:00

Unai Fernandez de Betoño pozik agertu da Aiaraldeko susperraldi sozioekonomikoa bultzatzeko ponentzian lortutako akordioarekin.

EAJk eta PSEk Ingurumen Administrazioari buruzko Legeak udal autonomian duen inpaktua juridikoki aztertzea galarazi dute

2021-11-23 14:21:00

Lakuak Ingurumen Administrazioaren Legea Lurralde Antolamenduarena atzeko atetik aldatzeko baliatu nahi duela ikusirik, EH Bilduk azterketa juridiko bat eskatu du. “Prozedura horrek udal autonomia urratzen du eta, beraz, legezkoa den aztertu behar da nahitaez”. EAJ eta PSE bakarrik geratu dira ezezkoan.

Ulertezina da Jaurlaritzak alokairuen prezioak mugatzeko dituen aukerak erabiltzeari uko egitea

2021-11-18 14:01:00

EH Bilduk berretsi du, alokairuen garestitzeari muga jartzeko, ezinbestekoa dela EAEk berez dituen tresna legalak erabiltzea, Madrilen onartuko den eta eraginkortasun mugatua izango duen Etxebizitza Legearen zain egon beharrean.

EH Bilduk industria eredu berri bat proposatu du sektorea suspertzeko

2021-11-16 14:55:00

Iker Casanovak Industria Garatzeko Plana erretiratzeko eskatu dio Jaurlaritzari “guztiz etsigarria” delako. 67 proposamen aurkeztu ditu industriak ekonomian zeukan pisua berreskuratzeko, Ikerketa eta Garapenean inbertsioa BPGren %3ra igotzeko eta enpresa estrategikoen errotzea bermatzeko.