Legebiltzarra

EH Bilduk Lege Proposamen bat aurkeztu du alokairuen prezioen igoera legez mugatzeko

Maddalen Iriarte: “Etxebizitzaren alokairuaren prezioaren hazkundea amaierarik gabeko espiral batean sartu da eta egoera oso kezkagarria bilakatu da EAEn. Ordua heldu da erakunde publikoek interbenitzeko”

| 2019-11-27 14:27:00

EH Bilduk Lege Proposamen bat aurkeztu du gaur Legebiltzarrean etxebizitzen alokairuen prezioa mugatzeko, bereziki, tenkatuta dauden eta prezioetan presioa eragiten duten zonaldeetan. Maddalen Iriarte bozeramaileak Maider Otamendi eta Ander Rodriguez legebiltzarkideekin batera aurkeztu du Lege Proposamena.

Iriarteren hitzetan, “alokairuaren prezioaren hazkundea amaierarik gabeko espiral batean sartu da eta egoera oso kezkagarria bilakatu da bai hiriburuetan eta bai Euskal Autonomi Erkidegoko hainbat udalerritan”. Zentzu honetan, datuak aipatu ditu: Alokairu-Merkatuaren Estatistika-ren arabera, 2018aren asken hiru hilabeteetan, alokairu librean sinatzen ziren kontratuen batez besteko hileko errenta 672 eurokoa zen, 2 urte lehenago baino % 6 gehiago. Erreminta zabalago eta eguneratuagoak erabiltzen baditugu, adibidez, Higiezinen Eskaintzaren Inkesta, 2013tik hona, % 25eko igoera izan du alokairuak, eta hazkunde hori are larriagoa da zonalde batzuetan. EAEn 115.000 familia alokairuan bizi dira. Familien aurrekontuetan, alokairu kontzeptuan ordaindutakoaren pisua handitu egin da, gomendatutako gehieneko % 30ko muga zeharo gaindituz”.

EH Bilduko bozeramaileak adierazi du egoera honek “ondorio larriak” dituela: “Kaleratze kasuak gehitu egin dira, zaurgarritasun egoerak, segregazio arazoak... Gazteen emantzipazio-tasak eta jaiotza-tasak behera egin dute. Goi-mailako ikasketak libreki aukeratzeko eskubidea ere erabat baldintzatuta geratu da, hiri batzuetan prezioak jasanezinak direlako”.

Horregatik, EH Bilduk ekimen bat aurkeztu du merkatuaren etengabeko igoerari muga jartzeko. Lege Proposamenaren arabera, alokairu “prezioen erreferentzia indizea” ezarriko da “etxebizitza merkatu tenkatua” duten eremuetan. Prezio horien gainetik dauden kontratu berriak ez dira legalak izango.

 

 

Etxebizitza merkatu tenkatua: Alokairuak garestitzea bereziki pairatzen duten zonaldeak “etxebizitza merkatu tenkatua duten eremuak” deklaratuko dira. Izendapen hori izatea derrigorrezkoa izango da alokairuen prezioak mugatu ahal izateko. Legeak jasotzen dituen hainbat kasutan aplikatu ahal izango da kategoria hori. Besteak beste, udalerriko alokairuaren igoeraren batez bestekoa lurraldeko hazkunde eutsiaren alokairuen prezioa baino 2 puntu altuagoa bada. Deklarazio prozedura Jaurlaritzak edo udalek abiarazi dezakete.

Alokairuen prezio-indizea: Jaurlaritzak zehaztuko du euro/m2-etan, ingurune berean batez besteko alokairu prezioetan eta etxebizitzaren baldintzetan oinarrituta. Alokairu kontratu berrietan, edo berriztatzean, hitzartutako errentak ezingo du gainditu erreferentzia-indizea.

 

Legea aplikagarria izango da honako baldintzak betetzen direnean:

  1. Errentariaren ohiko etxebizitza izatea (izaera hau ere izango dute ikasturteak dirauen bitartean ikasleen bizitoki direnek).
  2. Etxebizitza merkatu tenkatua duen eremu batean kokatuta egotea.
  1. Babes publikoko kalifikazioa ez duen etxebizitza izatea.

 

EH Bilduk formula juridiko berritzailea jorratuko du ekimen hau aurrera ateratzeko. Proposamena da Euskal Zuzenbide Zibilari buruzko  ekainaren 25eko 5/2015 Legeari Titulu berri bat gehitzea, Etxebizitza Errentamenduaren Prezioa Mugatzeko Lege Proposamenaren bidez.

Osasun Sailak azalpenak eman behar ditu LABek Gasteizko Santiago Ospitalean ustezko iruzur kasu bat salatu ostean

EH Bilduk Nekane Murga sailburuaren eta Osakidetzako zuzendariaren agerraldiak eskatuko ditu Legebiltzarrean. “Diru publikoaren erabileran zorrotzak izan behar dugu eta Santiago Ospitaleko sukalde zerbitzuan ustez gertatu dena onartezina da”, esan du Rebeka Uberak.

| 2019-11-20 16:35:00

EH Bilduren iritziz, larria da LAB sindikatuak gaur bertan salatu duen iruzur kasua, Gasteizko Santiago Ospitaleko sukalde zerbitzuan ustez egon diren irregulartasunek 200.000 euro galtzea edo desbideratzea ekarri dutelako, antza, 2016az geroztik. Hori dela eta, LABek salaketa aurkeztu du jada EAEko Fiskaltza Nagusian.
Ezbaian dagoena diru publikoaren kudeaketa den heinean, EH Bilduk argi du Osasun Saila eta Osakidetza azalpenak ematera derrigortuta daudela eta, beraz, Nekane Murga sailburuaren eta Juan Diego Osakidetzako zuzendariaren agerraldiak eskatuko ditu Legebiltzarrean, LABek salatutako kasuaren inguruko xehetasunak eman ditzaten, “azalpen horien arabera erabaki ahal izateko bestelako neurriak, ardurak garbitzea barne, eskatu behar ditugun ala ez”, Rebeka Uberak zehaztu duenez. Haren esanetan, “diru publikoaren erabileran zorrotzak izan behar dugu eta Santiago Ospitaleko sukalde zerbitzuan ustez gertatu dena onartezina da”.
 

ALBISTEAK

Hauteskundeak direla eta bertan behera geratu ziren lau lege berreskuratu ditu EH Bilduk, tramitazioa amaitzeko

2020-09-15 10:07:00

EH Bilduk indarkeria matxista kasuetan zaintza partekatua ukatzeko, ustelkeriaren aurkako bulegoa sortzeko, euskara doan ikasteko eta Herri Kontuen Epaitegiaren Legea aldatzeko lege proposamenak aurkeztu ditu berriz, aurreko legealdian hasitako tramitazioa burutzeko. Jaurlaritzak koherentziaz jokatzea eta prozedura ez oztopatzea espero du koalizioak.

Aldi baterako lan erregulazioan dauden langileentzako laguntzak handitu eta hobetzea proposatu du EH Bilduk

2020-09-11 15:56:00

Ander Rodriguezek proposamena aurkeztu du Legebiltzarrean, Jaurlaritzak egoera horretan dauden langileei emandako erantzunak ez duelako egoerak eskatzen duen maila ematen.

EH Bilduk atzera egiteko eta Emakunde berriz ere Lehendakaritzari atxikitzeko eskatu dio Urkulluri

2020-09-09 14:08:00

Oihana Etxebarrietaren iritziz, “akats larria da” Emakumearen Euskal Erakundea Lehendakaritzatik ateratzea, gai sektoriala balitz bezala, politika feministek ezinbesteko duten zeharkakotasuna galtzen delako horrela. Interpelazioa egingo dio lehendakariari Legebiltzarrean.

Iriarteren gobernu programak enplegua, osasuna, hezkuntza, gizarte politikak eta trantsizio energetikoa ditu lehentasun

2020-09-03 13:53:00

EH Bilduren lehendakarigaiak gobernantza eredu alternatiboa ipini du mahai gainean, eta erabakitzeko eskubideak Legebiltzarrean duen babes teoriko handia praktikara eraman beharra azpimarratu du, Estatu espainolarekin berdinen arteko harreman konfederala izateko.