AKTUALITATEA

EH Bilduk proposatu du farmaziek autodiagnostikorako probetako positiboak zuzenean Osakidetzaren sarean erregistratzea

| 2021-07-28 11:28:00

Ikusirik kutsatzeen kopuru altuaren ondorioz Lehen Arreta kolapsaturik dagoela eta positiboen kontaktuen identifikazioa gehiegi atzeratzen ari dela aztarnariak gainezka daudelako, EH Bilduk proposamen bat aurkeztu du Legebiltzarrean pandemiaren kudeaketa hobetzeko, osasun sistemaren gainkarga arinduz eta eraginkortasuna irabaziz. Zehazki, Rebeka Uberak proposatu du farmazietan egiten diren test azkarren emaitzak, positibo emanez gero, farmaziek beraiek zuzenean Osakidetzaren sarean erregistratu ditzatela. Adierazi duenez, “proposamena farmazeutikoekin kontrastatu dugu eta begi onez ikusten dute; Osakidetzak eta farmaziek sare bat partekatzen dute jada errezetak kudeatzeko. Zergatik ez elkarlanean sakondu farmaziek positiboak komunikatu eta pandemiaren kudeaketan laguntzeko? Neurri horrek Osakidetzak une honetan duen zama arindu, arakatzaileen lana erraztu eta, finean, kudeaketa eraginkorrago bat ekarriko luke”.

Sistema hori martxan dago dagoeneko Nafarroan, Katalunian eta Kantabrian, azaldu du Uberak, eta “interesgarria litzateke EAEn ere farmaziak eta Osakidetza eskutik aritzea birusaren diagnostikoan eta kudeaketan pandemiak iraun bitartean”. Izan ere, “momentu honetan Osakidetzan Osasun Publikoa, arakatzaileak eta Lehen Arreta ezinean dabiltza, gainditurik, proba diagnostikoak egin eta datuak kudeatzeko orduan; ezin diete behar bezala erantzun erregistraturik dauden positiboei eta egon daitezkeen kutsatu posible guztiei. Horregatik, sekulako laguntza litzateke farmaziak Osakidetzaren sarean sartzea eta, autodiagnostikorako testak bertan egiteaz gain, farmaziek beraiek erregistratzea emaitza positiboak Osakidetzaren sarean”.