AKTUALITATEA

| 2022-12-16 13:11:00

Kongresuak datorren astean eztabaidatuko du EH Bilduk aurkeztutako mozioa, administrazio publikoan sektore askok pairatzen duten arrakalari digitalari aurre egiteko. Mertxe Aizpurua bozeramaileak defendatuko duen egitasmoak erakunde publikoetarako sarbidean dagoen bazterketarekin amaitzeko eskatu dio gobernuari, herritar guztien sarbidea ziurtatu eta arreta presentzial nahikoa bermatuta. Horretarako, ordutegiak zabaltzea eta tramite guztietan aholkularitza eskaintzea proposatzen du EH Bilduk, administrazio publikoaren egoitza eta bulego guztietan, biztanle gutxiko landaeremuetan arreta berezia jarriz.

Aizpuruak gogorarazi du baliabide gutxien dituzten herritarrak direla administrazio publikora jotzeko oztopo gehien dituztenak, eta ohartarazi du zailtasunak daudela Bizitzeko Gutxieneko Diru Sarrera bezalako laguntzak lortzeko, herritar askok teknologia berriak erabiltzeko dituzten zailtasunengatik. «Bi milioi familia bizi dira arrakala digitalean egunero. Eta arrakala digitala bazterketa sozial eta ekonomikoari gehitzen zaionean, laguntzak jasotzeko zailtasunetan sakontzen da. Zenbat pertsona geratzen dira laguntzarik gabe prestazioak eskatzeko ezintasunagatik?», galdetu du.

 

Sarbide zuzena, erraza eta irisgarria

Jakitun izanik administrazioa dela herritarrengana zuzenean, erraz eta oztoporik gabe iristeko erantzukizuna duea, EH Bilduk galdegin du laguntza eta eskaera guztietara bide ez-telematikoen bidez iristeko aukera kontuan hartzea, baita Bizitzeko Gutxieneko Diru Sarreraren kasuan ere: "Administrazio publikoak bermatu egin behar du bide telematikoetatik iristea herritar guztietara, salbuespenik gabe. Horretarako, sarearen irismena lurralde guztietara zabaltzeko eta Internetera sartzeko gune publikoak ezartzeko neurriak hartu behar ditu, bereziki herritarrek zailtasunak erabiltzeko dituzten lekuetan".

Ildo horretan, EH Bilduk administrazio publikoan sartzeko zailtasunak dituzten kolektiboen eskubideak babestearen alde egin du, eta trantsizio-epe bat ezartzera deitu du, inor atzean ez uzteko arreta pertsonalaren eta zerbitzu telematikoen artean. Horretarako, datorren astean eztabaidatuko den mozioan, administrazio publikoak erabiltzen dituen APPak eta Interneteko atariak "plataforma intuitibo eta sinplifikatuagoetara" aldatzeko eskatu du, ezagutza gutxien edo erabiltzeko zailtasun handienak dituzten kolektiboek plataforma horiek erabil ditzaten.

 

Doako ikastaroak

Mozioak, era berean, kolektibo eta pertsona zaurgarrientzako oinarrizko laguntza sozioekonomikoak lortzeko tramiteak erraztea eta arintzea eskatzen du, laguntza horiek eskuratzeko aukera unibertsalizatuz. Zehazki, EH Bilduk ezinbestekotzat jotzen du prestakuntza ikastaro laburrak abian jartzea administrazio publikoarekin hartu-emanak izateko eta kudeatzeko baliabide telematikoak ezagutarazteko.

Horretarako, herritarren irismena eta ezagutza handitzeko beharrezkoak diren informazio kanpainak martxan jartzea proposatu du, eskura dauden laguntza sozial, ekonomiko, laboral, kultural edo bestelakoen berri emateko. Banku eta kutxen bulego guztien arreta presentziala Praktika Egokien Kodean txertatzeko ere eskatu du, "aurrez aurreko tramiteetarako ordutegiak zabalduz, horretarako ordainketarik egin gabe".