Iruñea

Albisteak

Saltokietan erabilera bakarreko plastikozko eskularruen kopurua mugatzea, gel hidroalkoholikoak lehenestea eta maskara berrerabilgarrien aldeko apustua egitea proposatu du EH Bilduk, ingurumena babesteko neurri eraginkor gisa


| 2020-06-02 13:49:00

Estrategia honen baitan, "autorik gabeko igandeak" ekimena abian jartzea planteatu du hiriko hainbat gunetan

 

Bihar Iruñeko Udaleko Hirigintza Batzordean eztabaidatuko den EH Bilduren adierazpen batek honakoa proposatzen du:  ingurumena errespetatzeko eta hondakinen sorrera gutxitzeko printzipioei jarraiki, Udalak herritarren artean maskara berrerabilgarrien banaketa eta erabilera sustatzea eta tokiko saltokietan erabilera bakarreko plastikozko eskularruen kopurua mugatzea, batez ere supermerkatuetan, hipermerkatuetan eta azalera handietan. Proposamenak, besteak beste, "maskara berrerabilgarriak egitea eta banatzea" eskatzen du, horretarako lantegi-eskola eta enplegu soziala baliatuz, edo "irabazi asmorik gabeko elkarteekin hitzarmenak sinatuz".

Halaber, idatziak "hiriko merkataritza-sektorearekin lan egitea" eskatzen du, eta gidalerro bakar eta argi bat ezartzea: eskularruak erabiltzearen alferrikakotasuna azalduz, eta horien ordez saltoki sarrera zein irteeratan desinfekzio-gel edo alkohol-soluzioak erabiltzea sustatuz". Hirugarren puntu batek proposatzen du "informazio- eta sentsibilizazio-kanpaina bat egitea, herritarrek ingurumenarekiko konpromisoa har dezaten osasun-krisi honetan ere, bereziki maskara berrerabilgarriak erabiliz".

Adierazpenak dioenez, uste sendoa dago pandemia horrek "planetaren ingurumen-egoera larriarekin" zerikusia duela, eta gogorarazi du komunitate zientifikoak dioela "etorkizunean pandemia arriskuak murrizteko modua gure ingurunea zaintzea" dela. Eta horren aurrean, paradoxa da "batzuetan kontraesankorrak diren material eta ohituretara jotzen ari garela", hala nola erabilera bakarreko maskarak eta eskularruak eta material plastikodunak. Testuak gogorarazten duenez, Trantsizio Ekologikorako Ministerioak jada praktika horien alde egiten du, eta Udalari ere, bere eskumenen esparruan, honako hau eskatzen dio: "Maskara nahitaezkoa eta eraginkorra den arren, eskularruen erabilera merkataritza-establezimenduetan ez da beharrezkoa ez eta gomendagarria osasun publikoaren ikuspuntutik".

Bestalde, Koalizio soberanistak bigarren adierazpen bat defendatuko du Mugikortasun Batzordean, udal taldeekin, Mankomunitatearekin eta inplikatutako sektoreekin, "autorik gabeko igandeak" ekimenaren sustapena adosteko. "Pandemiako bi hilabete hauek hiri jasangarriago baten aldeko apustua egiteko beharraz jabetzeko balio izan digute", dio idatziak. "Mugikortasunari dagokionez, galtzadek hartzen duten espazio handi horren zati bat herritarrei, haurrei, oinezkoen erabilerari, txirrindulariei eta adinekoei astean egun batez uztea litzateke helburua. Hiriko egungo ibilbideetan pilaketa arazoak saihestuko lituzke alternatiba berriak eskainiz. Azken batean, Iruñea berraurkitzeko aukera paregabea da ", gaineratu du.