AKTUALITATEA

| 2026-07-16 09:52:00

Vitoria-Gasteizko Udalak proiektu pilotua jarriko du abian adinekoen eta gazteen nahi gabeko bakardadeari aurre egiteko. Bidegile izeneko ekimenak bederatzi hilabeteko iraupena izango du, eta parte-hartzaileen babes-sareak eta harreman sozialak zabaltzea izango du helburu, etengabeko laguntzaren bidez. Programa hau Udal Gobernuak eta EH Bilduk 2026ko ekitaldirako adostutako aurrekontu-akordioaren barruan kokatzen da.

Ekimenari buruzko xehetasunak gaur goizean eman dituzte Rocío Vitero EH Bilduko bozeramaileak eta Ana López de Uralde Gazteria Saileko zinegotziak parte hartu duten prentsaurrekoan.

Viterok zehaztu duenez, “belaunaldien arteko jarduerek adin desberdinetako pertsonen arteko elkartasuna, elkarrekiko ikaskuntza eta ulermena sustatzea dute helburu. Horrela, gainera, isolamendu sozialari aurre egingo zaio, adinkeriari aurre eginez eta zahartzearen ikuspegi positibo eta erreala sustatuz. EH Bildutik horrelako ekimenen alde egiten dugu; izan ere, adinekoak zein gazteak inplikatzen dituzte eta, komunitatea egiteaz gain, gizarte-kohesioa eta bizikidetza indartzen dituzte”.

Bestalde, Lopez de Uraldek azaldu duenez, “ohiko aisialdi-proposamenen alternatiba gisa planteatzen dugu ekimen hau, nahi ez den bakardadearekin lotutako pandemia isil hori arintzeko, eta gure hiriko 16 eta 30 urte bitarteko gazteen eta 60 urtetik gorakoen arteko elkarrekiko ikaskuntza eta esperientzien trukea sustatzeko”.

Bidegilek kohesio soziala indartu nahi du, adinari lotutako mitoak eta estigmak deseraikiz, parte-hartzaileen sare sozialak zabalduz, eta, aldi berean, adin-talde horien autonomia eta garapen soziala sustatuz, eragile eraldatzaile gisa.

Proiektuak bat egiten du Udalaren V. Gazte Planaren printzipioekin, eta horien artean, errespetua, bizikidetza eta aukera-berdintasuna nabarmendu behar dira. Esparru horretan, parte-hartzea zailtzen duten oztopoak ezabatu nahi dira, jarduera bidezkoagoak, inklusiboagoak eta irisgarriagoak bermatzeko, aisialdiaren esparruan ere hezkidetza sustatuz.

Ekimenak herritar guztiei zuzendutako hezkuntza integralaren alde egiten du, gazteen aniztasunari balioa emanez eta adinari lotutako estereotipoei eta aurreiritziei aurre eginez. Horrela, gizarte inklusiboagoa, kohesionatuagoa eta belaunaldien artekoa sustatzen laguntzen du.

Talde eragilea

Jarduera guztiak belaunaldien arteko talde eragileak diseinatuko ditu. Talde horrek bermatuko du proposamenek bi kolektiboen interes partekatuei erantzuten dietela, eta elkarrekiko ikaskuntza, esperientzien trukea eta ekimen bakoitzean elkarrekikotasuna sustatuko ditu.

Jardueren edukiak adinari lotutako estigmei aurre egitera bideratuta egongo dira, belaunaldien irudi inklusiboagoa eta positiboagoa bultzatuz. Horretarako, aisialdi osasungarri eta prebentiboko jarduerak, sorkuntza artistiko eta kulturalerako proposamenak eta espazio publikoetan dinamizazio komunitarioko ekintzak programatuko dira, bizikidetza eta belaunaldien arteko topaketa errazteko.