AKTUALITATEA

| 2024-11-05 10:55:00

Udalaren proiektua 1.500 m²-ko azalera egokituz gauzatuko da eta 2 milioi euroko inbertsioa egingo da PSE, EAJ eta EH Bilduren arteko aurrekontu-akordioari esker.

Salburua auzoan eraikiko dute adinekoentzako hurrengo etxebizitza komunitarioa, Gasteizko Udaleko Gizarte Politiketako Sailak sustatuta. Udal-gobernuaren eta EH Bildu taldearen arteko aurrekontu-akordioan jasotako 2 milioi euroko kontu-sailari esker, hamar plaza inguru prestatu ahal izango dira 1.500 metro koadroko udal-lonja batean, Norteko Trenbidearen kaleko 2. zenbakian.

21 Zabalguneak idatziko du proiektu arkitektonikoa eta bertan zehaztuko dira etxebizitzen kopuru zehatza eta eraikitze-lanaren kostua. Aurreikuspenen arabera, proiektua 2024ko azken hilabeteetan idatziko dute eta obrak 2025ean lizitatu eta hasiko dituzte.

Adinekoentzako ostatu-zerbitzuak Udalaren eskumenekoak dira. Etxebizitza komunitarioak, zehazki, hainbat arrazoirengatik beren etxeetan bizitzen jarraitu ezin duten eta I. mailako mendekotasuna duten pertsonentzat dira. Ekipamendu horietan, langileen laguntza izaten dute tutoretzarako edo bitartekaritzarako, gizarte-laguntzarako eta ikuskapena egiteko, bai eta, hala badagokio, arreta pertsonala eta etxekoa emateko ere.

Udalaren etxebizitza komunitarioen (tutoretzapeko apartamentuen kasuan bezalaxe) helburuak honako hauek dira: erabiltzaileak beren ingurune komunitarioan gera daitezen erraztea; haien autonomia pertsonalaren maila hobetzea eta gaitasunen narriadura prebenitzea; isolamendua saihestea eta segurtasun-sentsazioa bultzatzea.

Zehazki, etxebizitza komunitarioak ekipamendu kolektiboa dira, eta etxebizitza arruntak dituen eraikin batean txerta daitezke, beste ekipamendu sozial batzuen ondoan beste eraikin batean jar daitezke, edo eraikin berezi bat osa daiteke helburu horrekin. Nolanahi ere, etxebizitza horiek eguneroko bizitzako behar guztiak estaltzen dituzte, eta laguntza profesionala dute eguneko 24 orduetan.

Gizarte Politiken zinegotzi Lucho Royerok azaldu duenez, «oso garrantzitsua da horrelako etxebizitzetan erabiltzaileen lehentasunak, intimitatea, eskubideak eta bizi-proiektua errespetatzea, familiekiko, lagunekiko eta komunitatearekiko harremana ere erraztuz”. Zinegotziak gaineratu duenez, “frogatuta dago etxebizitza horietan autonomia pertsonalaren maila hobetzen dela, gaitasunen narriadura prebenitzen dela eta isolamenduari aurre egiten zaiola».

Bestalde, EH Bildu Gasteizko bozeramaile Rocío Viterok adierazi duenez, «erronka demografiko handi bat dugu aurrean, gure hirian etxebizitza komunitario bat eskuratzeko itxaron-zerrendan dauden 200 adineko baino gehiagori kalitatezko arreta eskaini ahal izateko. Erakundeok adinekoen eskubideak arreta bereziz zaindu behar ditugu, eta eskura dugun tresna da eskatzaileei beharrezko baliabideak ematea. Hain zuzen ere, horrekin lotuta, etxebizitza komunitarioak urrats handia dira helburu hori lortzeko».

Beharrak

Salburuko adinekoentzako etorkizuneko etxebizitzekin lotuta Gizarte Politiken Sailak egindako txostenak adierazten du proiektu arkitektonikoak honako premia hauei erantzun behar diela:

• Ostatua eta mantenua
• Norbere garbitasuna eta higienea
• Gizarte-laneko arreta
• Erizaintzako arreta
• Jarduera estimulatzaileak
• Errehabilitazio-jarduerak

Lonjaren diseinuak honako hauek izan behar ditu: atondo-banaleku bat, erabilera anitzeko gela bat, estimulazio/gimnasioko beste bat, bisita-gela bat, egongela komun bat, jantoki-gunea, egoiliarrentzako officea, langileentzako sukaldea eta officea, banakako logelak dutxa egokituarekin, erabilera komunitarioko komunak, komun geriatrikoa, langileentzako bulegoak, erizaintza, bilera-gela, langileen aldagelak, garbiketa-gela eta biltegiak. Mendekotasun guztiek egokituta egon behar dute, desgaitasunen bat duten adinekoek zailtasunik gabe moldatzeko aukera izan dezaten.

Eskakizunak

Adinekoentzako Udalaren ostatu-zerbitzuak erabili ahal izateko, honako baldintza hauek bete behar dira:

1. 65 urte edo gehiago izan.

2. Eskabidea aurkezten den egunean Vitoria-Gasteizko udalerrian erroldatuta egotea eta bertan benetan bizitzea.

3. Arreta eta txosten sozialeko programa indibiduala izatea. Bertan, kontuan hartuko da erreferentziazko Udalaren gizarte-zerbitzuak horretarako egokitasuna zehaztu eta zerbitzuaren aukeraketa egin dituela.

4. Mendekotasun-egoeran dauden pertsonak (I. gradua, 25-49 puntu).

Gizarte Politiken Sailak hainbat etxebizitza komunitario ditu: Los Molinos, Aurora eta San Prudentzio Adinekoei Laguntzeko Zentro Integrala. Los Molinos eta Auroran, 10-12 pertsonako hiru bizikidetza-unitate daude, 3 solairutan (30+34 plaza) banatuta; San Prudentzio eraikinean, berriz, 4 bizikidetza-unitate daude, 64 plazarekin. Guztira, 128 plaza daude. Uneotan, itxarote-zerrenda 200 pertsonatik gorakoa da, baina 100 pertsona baino gehiago daude etxebizitza komunitario pribatuetan ostatu hartuta, eta Udalak emandako prestazio ekonomikoa jasotzen dute kostuari aurre egiteko.