AKTUALITATEA

EH Bilduk Gizarte Segurantzak Iparraldeko parkean dituen instalazioak lagatzea proposatu du, enpresa berrien hazitegi gisa erabiltzeko

| 2023-04-30 11:51:00

Gasteizen enplegu duina eta kalitatezkoa sustatzeko eta udalerrian enpresa berriak sortzeko proposamena aurkeztu du EH Bilduk. Rocio Vitero EH Bilduren Gasteizko alkategaiak «Gasteizen enplegua mantentzeko eta hobetzeko» beharra azpimarratu du. «Enplegua sortzea bultzatuko dugu, eta ekintzaileei eta langileei lagunduko diegu, haien lanak duintzeko eta horien kalitatea eskaintzeko».

Hala, Viterok Gizarte Segurantzak Iparraldeko parkean dituen instalazioak lagatzeko eta eraldatzeko akordio bat lortzeko proposamena aurkeztu du, lankidetza-lanerako eta enpresa eta proiektu berrien hazitegi eta inkubagailu gisa hornitzeko. «Gazteentzat bereziki pentsatutako eta diseinatutako proiektua izango litzateke, eta laguntza-programa bat eta profesionalizazio-ibilbideak izango lituzke», ziurtatu du Viterok.

Proiektu horrek, gainera, laguntza-programa bat eta profesionalizazio-ibilbideak izango ditu, bai eta beharrezko baliabide teknikoak (ordenagailuak, inprimagailuak...) eta negozioaren enpresa kontuetarako aholkularitza ere. Viteroren esanetan, ekimen hori «Informazioaren Teknologiekin (IKT) eta diseinuarekin lotutako proiektuetara bideratuta egon liteke, baina beste diziplina batzuk ere sar litezke. Eta, batez ere, argi daukagu oso interesgarria litzatekeela Gasteizko prestakuntza-zentroekin lankidetzan aritzea prestakuntza dualeko irteerak eta esperientziak eskaintzeko ikastetxeetatik, unibertsitatetik edo lanbide-heziketako eskoletatik, adibidez».