AKTUALITATEA

| 2024-10-03 09:00:00

EH Bilduk urriaren 18ko osoko bilkuran eskatuko du Gasteizek Udal Etxebizitza Plan bat izan dezala, baita planaren jarraipena eta ebaluazioa errazteko garatu beharreko helburuak eta ekintzak zehaztu eta kuantifika ditzala ere. Xabier Ruiz de Larramendi EH Bilduko zinegotziak adierazi duenez, «Udal Etxebizitza Plan bat nahi dugu, udalerrian gero eta handiagoa den etxebizitza duin eta eskuragarriaren beharrari erantzuteko. Izan ere, 2024ko uztailean 12.700 pertsonak baino gehiagok eskatzen zuten alokairu babestuko etxebizitza. Horregatik, bada garaia Gasteiz, Hegoaldeko gainerako euskal hiriburuak bezala (Iruñea, Donostia edo Bilbo), etxebizitza-arloan duen eskumenaz baliatzeko».

Izan ere, EH Bilduk uste du ekimen hori gainerako administrazio eskudunekin elkarlanean gauzatu beharko litzatekeela, eta Gasteizko alokairu sozialeko etxebizitzaren problematikak lortu duen dimentsio handiari erantzun beharko liokeela. Izan ere, Etxebiden izena emandako pertsonen kopuruak gora egiten jarraitzen du, eta 13.000 pertsonatik gero eta gertuago dago. «Ez da inola ere gehiegizkoa larrialdi-egoera bati buruz hitz egitea: gaur egun, milaka pertsonak eta familiak benetako zailtasunak dituzte alokairua edo hipoteka ordaintzeko, eta horrek, kasu askotan, etxegabetzeko arriskua dakar; milaka gaztek ez dute emantzipatzeko aukerarik; edo gero eta jende gehiago pobretzen ari da, etxebizitzak hileko gastuetan duen gehiegizko pisuaren ondorioz», adierazi du zinegotziak.

Egoera horren aurrean, etxebizitza-politikaren abiapuntua etxebizitza bera eskubide gisa aitortzea izan behar da. Pertsona guztiei aitortu behar zaie etxebizitza duina eta egokia izateko eskubidea, eta botere publikoen zeregina da eskubide hori lortzen dela bermatzeko esku hartzea, eskura dituzten tresna guztien bidez.

Hain zuzen ere, testuinguru horretan sortu berri du Udal Gobernuak Garapen Estrategikorako eta Etxebizitzarako zerbitzu berria. Gasteizko Udala etxebizitzaren arloan dituen eskumenak gauzatzen hasteko balio beharko luke horrek, eta, horrela, bere baliabideak, beste administrazio batzuenekin batera, gure udalerrian gero eta handiagoa den alokairu babestuko etxebizitza eskaerari erantzuteko erabili beharko lituzke.