AKTUALITATEA

| 2023-03-23 11:42:00

Rocio Vitero EH Bilduren Gasteizko alkategaiak Gasteizen merkataritza sustatzeko proposamena jasotzen duten hamar neurri baino gehiago aurkeztu ditu gaur. «EH Bildun irmoki uste dugu administrazioek zeregin garrantzitsua izan dezaketela eta izan behar dutela zerbitzuen sektorearen bultzadan. Arautu egin behar dugu, desorekak saihesteko, eta kontuan izan behar dugu alor komertziala gure hirigintza antolatzerakoan. Horregatik, merkataritzak hirian bere lekua berreskuratzea nahi dugu, eta sektorea antolatzeko, jarduera bultzatzeko eta sektorearen eta bere jardueraren prestigioa sustatzeko neurrien bidez bultzatzea proposatzen dugu», adierazi du Rocio Vitero EH Bilduko hautagaiak.

Merkataritza-sektorearen antolaketari lotutako neurri sortan, Viterok tokiko merkataritza laguntzeko, formakuntzarako eta sustatzeko bulego bat sortzea proposatu du. Bulego hori ez da sortuko liratekeen ekimen bakarra, EH Bilduk, azken urteotan sektoreak bizi duen egoera kritikoa ikusita, Gasteizko Tokiko Merkataritzaren Behatokia sortzea ere proposatu baitu, Udal Azterlanen Kabinetearen Unitatearen barruan. Tokiko merkataritzaren egoerari buruzko aldizkako azterlanak argitaratzea eta merkataritza lokalei buruzko inbentarioa egitea izango da behatoki horren ardura. Elementu horiek izango dira Tokiko Merkataritza Mahairako lan-oinarria.

 

Bigarrenik, Viterok jarduera bultzatzeko neurriak aurkeztu ditu, eta, horretarako, proiektu berrietarako merkataritza-lokalen poltsa bat sortzeko proposamenaren berri eman du. Ekimen honen helburua lokalen errolda bat sortzea da, interesa duten ekintzaileek beren proiektua garatu ahal izan dezaten. Gainera, Udalaren, beste administrazio batzuen eta baita pribatuen lokalak ere izango ditu.

Eremu horretan, gainera, programa bat jarriko dugu erabiltzen ez diren lokalak birgaitzeko, epe luzerako alokairu eskuragarrien truke. Oreretan, adibidez, dagoeneko martxan dagoen zerbait da, eta herriko alde zaharrari bizitza berria ematea ahalbidetu du.

Hirugarren neurri-multzoan, zehazki sektoreari eta haren jarduerari jarduera eta prestigioa sustatzeari lotutakoetan, plan espezifiko bat garatzea proposatzen dugu, merkataritzan belaunaldien arteko ordezkapena bermatzen lagunduko duten ekintza eta proiektu zehatzekin. Viterok adierazi duenez, «beharrezkoa da jardueren aintzatespena, erreleboa edo denden biziraupena bultzatzea. Gure hiriko merkataritzaren funtsari eustea». Izan ere, ildo horretan, Viterok establezimendu enblematikoak babesteko katalogo bat garatzeko beharra azpimarratu du.

Azkenik, EH Bilduk funtsezkotzat eta berritzailetzat jotzen duen ekimen bat aurkeztu du: auzoko merkatuak hobetzeko programa bat onartzea, azoka txiki gisa ere ezagutzen direnak. Ildo horretan, Viterok uste du beharrezkoa dela azpiegiturak hobetzea estalkiak gehituz edo hobetuz (Simon Bolivar plazan), eta Santa Barbarako merkatua Leizaola Lehendakariaren plazara zabaltzea.