AKTUALITATEA

| 2025-03-12 10:34:00

EH Bilduk Gasteizko hiri autobusetan desfibriladoreak zabaltzeko eta, era berean, Tuvisako langileei -autobus flotaren ardura duen garraio publikoko enpresari- gailu horiek erabiltzeko beharrezko prestakuntza ikastaroa eskaintzeko proposamena aurkeztu du. Talde politikotik nabarmendu dutenez, «berehalako laguntza izateak nabarmen murrizten du bihotz-geldialdien heriotza-tasa».

EH Bilduk azaldu duenez, datuek proposamenean jasotako neurriak bermatzen dituzte, izan ere, adierazi duten bezala, bihotz-geldialdi baten ondoren BBB maniobrik (bihotz-biriketako bizkortzea) gabe edo desfibriladorearen erabilerarik gabe igarotzen den minutu bakoitzeko bizirauteko aukerak %10 murrizten dira. Beraz, eguneroko eremuan nahiko maiz gertatzen den arazoa izanik, eta garraio publikoan milaka gasteiztarrek egunero denbora aipagarria igarotzen dutenez, desfibriladoreak zabaltzea istripuak prebenitzeko «aukera» bat izango litzateke. Bizkortasunaren garrantzia azpimarratu du berriz ere EH Bilduk, izan ere, desfibriladoreen erabilera bihotz-geldialdiaren ondorengo hiru minutuetan gertatzen bada, biziraupena %73 handitzen da, eta bost minutu baino gutxiagoan erabiltzen bada, aukerak %50 handitzen dira.

Ekaitz Diaz de Garaio EH Bilduko zinegotziak desfibriladoreak Tuvisako flotan sartzea zein positiboa izan litekeen azpimarratu du, izan ere, azaldu duenez, «Gasteiz aitzindari izan daiteke hiri-autobusen sarean osasuna babesten; izan ere, estatuan Madrilen, Logroñon, Salamancan... adibideak daude, baina euskal eremuan, garraio publikoan desfibriladoreen presentzia autobus-geltoki zentraletara eta Bilboko metro-geltokietara mugatzen da».

Diaz de Garaio zinegotziak adierazi duenez, kasu horietarako desfibriladore egokienak erdiautomatikoak (KDEA) dira, erraz erabiltzen direlako, eta horrek Tuvisako langileen prestakuntza erraztuko lukeelako.