AKTUALITATEA

| 2023-09-26 10:53:00

EH Bilduk Gasteizko Burulleria egoitzan aurkitutako higiene eta osasun arazo larrien berri ematen duen udal txostena ezagutzera eman du. Udaleko Osasun Publikoko Sailak egindako txosten horretan, ekainaren 2an egoitza horretako instalazioetan egindako osasun eta kontsumo ikuskapen batean aurkitutako akats larriak jasotzen dira.

«Txostenean jasotako gertakariak oso larriak dira. Egoiliarren osasuna arriskuan jartzen duten hamar arazo inguru jasotzen dira. Txostenak hainbat arazo aipatzen ditu, hala nola alergenoak kontrolatzeko neurririk eza janarietan, higiene-neurririk eza (bai elikagaietan bai horiek manipulatzen dituztenetan), eta garbiketa- eta desinfekzio-kontrolik eza, besteak beste», adierazi du Rocio Vitero EH Bilduren Gasteizko bozeramaileak.

Txostenean beste ondorio batzuk ere jasotzen dira, hala nola ondoko baieztapenak: "hotz-ganberek ez dute hotza produktuetara iristen uzten, ez dute haien arteko kutsadura eragozten eta iraungitako produktuak aurkitzen dira", "Ez da laginik jasotzen toxiinfekziorik izanez gero", "Intsektuen edo beste animalia batzuen presentzia detektatzen da. Ez dute neurririk intsektuekin amaitzeko, hondakinak, zaborrak eta hondakin-urak pilatzen dira", edo "Langileek ez dute prestakuntzarik elikagaien higienean eta autokontrolean, establezimenduaren eta egiten duten lanaren arabera".

«Gertakari larri horien aurrean, Udalari eskatzen diogu pertsonen arretarako zentroetan kontrol handiagoa izan dezala. Argi daukagu horrelako egoerak ezin direla berriro gertatu, eta, gertatzen badira, ezinbestekoa dela jarraipen-lan handiagoa egitea, akatsak konpontzen direla ziurtatzeko. Kalitatezko zaintza den oinarrizko eskubidea betetzen ez den egoera guztiak salatzen jarraituko du EH Bilduk», ziurtatu du Viterok, eta azpimarratu du udal gobernuari kontrol lana egingo diotela, salatutako egoera bideratzeko lan egiten dela bermatzeko.

Gainera, EH Bilduko bozeramaileak gogorarazi du egungo alkatea eta aurreko alkatea (egungo gizarte-ongizateko diputatua) azkar mugitu zirela pandemian, ad hoc hirigintza-aldaketa bat egiteko, Burulleria Jauregiak izen bereko egoitza pribatua har zezan. Egoitza publikoen beharra nagusi zen eta den arren, EAJk eta PSEk espazio libre eta publiko bat uztearen alde egin zuten, bertan egoitza pribatu bat kokatzeko eta gune pribatu bihurtzeko.