AKTUALITATEA

| 2026-04-10 06:29:00

Errezabal egoitzako obrak hasi bezain laster etenak eta pitzadurak agertu ziren Urazandiko eraikin batzuetan eta errepidean. Obrek aurrera jarraitu zuten eta auzokideekin egindako bilera batean, kontrol neurri berriak eta pitzadurak egiaztatzeko beste azterketa bat egingo zutela adierazi zuten enpresak eta Udalak.

Baina orain gutxi enpresak lanen aldi baterako etenaldia eskatu du (apirilaren batetik aurrera da indarrean) hasieran egin zituen azterketa geoteknikoak egokiak ez eta berriak egin behar dituelako. Horren ondoren eraikinaren proiektua ere berrikusi beharko da, hori egiten ez bada Udalak onartu zuen proiektuak aurreikusi gabeko arriskuak eragin ditzakeelako.

EH Bilduk obra hori bertan behera uztearen alde bozkatu zuen 2026/03/24ko osoko bilkuran auzotarren eta Urazandiko lur eta eraikinen segurtasuna bermatzeko.

Hala ere plenu horretan, EH Bilduk eskatu zuen, enpresa eraikitzaileak eta Udalak sinatutako etete aktan honako puntu hauek ere jaso beharko lituzkeela (EAJ-PSEren proposamenean aipatu egiten baziren ere, lanen etete aktaren barruan ez ziren zehazten):

1. Proiektu berriaren kostuak eta obren geldialditik sortuko direnak enpresa esleipendunari eta ez Udalari dagozkiola bermatzea.
2. Etete horrek enpresa esleipendunaren aldeko inolako kalte-ordainik ekarriko ez duela bermatzea (lehen bi puntu hauek EAJ-PSEk proposatutako testuan agertzen dira baina ez modu inperatiboan, ezta ere enpresarekin sinatu behar den dokumentuaren parte bezala. EH BIlduren eskaera enpresak berak sinatzea zen, obraren akatsak, eragindako kalteak eta atzerapena enpresak berak gaizki egindako proiektuaren ondorio direlako).
3. Auzoan sortu diren pitzaduren kontrolen aldaketei buruzko hileroko txostenaz gain, enpresak proiektu berriaren garapenari eta jarraipenari buruzko informazioa bizilagunei aldiro ematea, hauei eragindako kalteei nola aurre egingo dien ere jakinaraziz.

Hori horrela, Udalak obrak eteteko erabakia hartu ondoren eman diren urratsek, ditugun kezkak areagotu dituzte, izan ere:

1. 2026/03/27an udal gobernuak, herriko gizarte eragile batzuekin egindako bileran (EH Bilduk ez zuen gonbidapenik jaso bileran egoteko, nahiz eta 7 zinegotzi eduki baina bertaratu egin ginen), eta osoko bilkuran esandakoaren aurka, lanen etete horren eta proiektu berriaren kostuak nork ordainduko zituen teknikoki eta juridikoki erabaki gabe zegoela adierazi zuen, airean utziz enpresak egindako akatsen ondoriozko kostuak Udalaren gain geratzeko aukera. Lanak eten dira baina enpresak ez du sinatu kostu berriak bere gain hartuko dituela.
2. Lehentasunezko gaia da aitortzea ere nork hartuko dituen bere gain bizilagunen eraikinetan eta Urazandiko espaloi eta errepidean egindako kalteen kostuak, zeren eta Udal Gobernuak ez du gai horri buruzko erantzunik eman orain arte. EH Bilduk garbi du proiektua egin duen enpresaren erantzukizuna direla.