Elgoibar

EHBILDUK MURRIZKETA SOZIALIK GABEKO AURREKONTUAK ESKATZEN DITU NAHIZ ETA 1.800.000 EURO GUTXIAGO JASO GIPUZKOAKO FORU ALDUNDITIK

| 2020-07-13 23:30:00

 

Denok dakigu garai zailak bizi ditugula. Aurreko krisialdia oraindik gainditu gabe genuenean iritsi zaigu COVID 19 dela eta emergentzi egoerari aurre egin beharra. Langabezia, prekarizazioa, emakume eta gizonen arteko soldata arrakala, gizartetik kanpo geratzeko arriskuan dagoen jendea, … Kapitalismoak eta eredu neoliberalak gizartean ezberdintasunak handitzea ekarri du eta egoera honetan herriak hainbat urtetan lortutako eskubideak kolokan jarri dira. 

Osasun krisi bezala hasi zena, krisi sozial eta krisi ekonomiko bilakatu da. Eredu zaharkituekin zaila da aurrean ditugun arazo zail guzti hauei aurre egitea, horretarako beharrezkoa da elkarlana eta guztion konpromisua. Hori dela eta, EHBilduk eskua luzatzen du pandemiaren hasieratik esan genuen bezala kolore ezberdinen arteko krisi mahaia eratu eta krisitik ateeratzeko neurri eraginkorrak denon artean hartzeko. 

Badakigu honi aurre egiteko aurrekontuak egokitu beharko direla egoera berrira,diru baliabideak murriztuk direlako. Gipuzkoako Foru Aldunditik ere 1.800.000 euro gutxiago etorriko da, hau da gure aurrekontuen % 9,52 beraz, lehentasunak markatzeko ordua da. 

EHBildun argi daukagu murrizketa sozialik gabeko aurrekontuak egin daitezkeela eta gutxien dutenak babestu behar ditugula inor atzean geratu ez dadin krisi honetatik irteterakoan. Elgoibarren ekaineko datuak kontutan hartuz 230 pertsonek eskatzen dute diru sarrera bermatzeko errenta (RGI), ERTEan maiatzean 223 pertsona zeuden eta ekaineko datuen arabera 1401era igo da, datua seikoiztuz.Elikadura bankuetako datuak jaso ondoren, pandemia aurretik 300 erabiltzailetik behera bazeuden, orain ia 500 erabiltzaile izatera iritsi dira, horrek agerian jartzen du momentu honetan herrian bizi larrialdi egoera eta joera okerrera doa. 

RGI ERTE Elikagai bankua 

Osaila 223 

Martxoa 229 ___ _ 300 

Apirila 235 ____ ___ 

Maiatza 239 223 ____ 

Ekaina 230 1401 500 

 

Datu guzti hauek ikusita argi dago egoera latza bizi dugula baina datorrenarekin jabetuz ekonomia sustatu eta enplegua berpiztuko duten politikak behar ditugu krisi honetatik aterako den Elgoibar irudikatzeko. 

Elgoibarko Ehbildun argi daukaguna da inbertsioak egitekotan, inbertsio sozialak izan behar direla, eta zerbait murriztekotan, zorroztasunez kudeatuta, eta gutxien dutenei kalterik egin gabe izan behar dela. Horregatik gure lehentasunak arlo sozialean, osasunean, hezkuntzan eta ingurumenean jarriko ditugu beti ere ekonomiaren eta enpleguaren sustapena bultzatuz. 

Beharrak handitu egingo direnez, diru kopuruak ere igo egin beharko dira arlo sozialean, eta horrek zenbait inbertsio birplanteatzea ekarriko du lehentasunak ezarri eta adostasunak bilatuz. Proiektu batzuren exekuzioa ere ez da izango aurreikusten zena, eta, beraz, diru partida horiek inbertsio sozialetan jarri beharko dira. 

Hor dauzkagu azken urteetako zenbait proiektu: 

- Igerileku berrien obra: 2.881.000 € inguruan esleitu zena eta gero 353.000 €ko gainkostua izan zuena, BEZa barne 

- Urazandiko igogailuak, 660.000 €tan esleituta eta gero 130.000 € gehiagoko partida bat izan dutena (% 20 igoz kostua) 

- Aita Agirre: proiektu honetan 5 milioi baino gehiago daramatzagu 

o Ia 3 milioi obran 

o 1,3 milioi inguru urbanizazioan 

o Beste milioi bat inguru altzarietan 

o Beste gastu txiki batzuk 

 

Beraz, argi dago proiektuek aurrekontuen zati haundi bat eraman dutela azken urteetan, eta horren kudeaketa zorrotza ezinbestekoa da. 

Gure prestutasun osoa azaldu dugu aurrekontuak berregiteko adostasunak bilatzeko. Uste dugu hemendik gizarte indartsuago bat ateratzeko denok batera atera behar garela, eta horretarako kolektibo zaurgarrienak kontutan izango dituzten politikak bideratu behar dira, pertsona nagusiak, gazteak, autonomoak,etorkinak, ezkutuko ekonomian lanean dihardutenak, kultur arloko eragileak, merkatariak, ostalariak, enpresetako langileak, zaintzan aritzen diren eta prekarizatuak diren langileak gehienetan emakumeak… Gainera, aurrekontuak berraztertzean, etorkizuneko ildo estrategikoak definitzen ere lagunduko dugu. Gure seme-alabei ze herri utzi nahi diogun dago jokoan, eta hori urtebeteko aurrekontuez haratago doa. 

Horregatik, epe ertainean nahi dugu jarri arreta. Adostasunak bilatu beharko ditugu alderdi politikoen artean, baina baita eragileekin ere. Inoiz baino garrantzitsuagoa izango da denok eskutik joatea. Bere egunean neurri batzuk planteatu genituen. Udal gobernuak bonoena soilik jarri du martxan, eta aldebakartasunez, eta beste inorekin kontatu gabe. Balorazioaren zain gaude, baina kudeaketan gabezia haundiak ikusi dira. 

 

 

 

Bere egunean neurri batzuk proposatu genituen, eta horiek martxan jartzeko edo eztabaidatzeko lanean jarraituko dugu. Adibidez: 

 

- Kultur mahaia antolatu, bertako kultur eta gizarte eragileekin Elgoibar biziberritzeko 

- Ostalaritzako plana estrategiko landu Elgoibarko ostalariekin 

- Merkataritzako plan estrategikoa 

- Ekonomia foroa sortu, Elgoibarko erronkak eragile guztiekin eztabaidatzeko. 

- Lehen sektorea babesteko neurriak 

o Bertako eskoletako jantokietan bertako produktuak bultzatu 

o Merkatua biziberritu 

o Bertako produktuak kontsumitzeko kanpañak 

 

Azken batean, aurrekontuek erakutsiko digute zeintzu diren gure lehentasunak, eta zer Elgoibar nahi dugun hemendik 10 urtera. Hor lan egin behar dugu elkarrekin, denon mesederako izango da eta. 

Ehbildutik gure konpromisoa azaltzen dugu Elgoibar hobeago bat lortzeko bidean elkarlanaren bidez, inor bazterrean utzi gabe, eta kolektibo zaurgarrienak zainduz. Hori da bidea.

Gipuzkoan lehen indarra izateko aukerak dituela esan du EH Bilduk Elgoibarren egindako ekitaldian

| 2020-07-07 22:06:00

Hauteskunde kanpainako ekitaldi politikoa egin du EH Bilduk, astearte arratsaldean, Elgoibarren. Giza Eskubideen plaza bete egin da Mertxe Aizpurua EH Bilduren Kongresuko bozeramailearen eta Ander Rodriguez Gipuzkoako hautagaiaren hitzartzeak jarraitzeko. Rodriguezek azpimarratu duenez, “ezustekoa” emateko moduan dago EH Bildu igandeko hauteskundeetan. “Igande honetan boto bakoitzak balio izugarria dauka. Partida badago, eta Gipuzkoan lehen indarra izateko aukerak ditugu", esan du aurreko legealdian legebiltzarkide izandakoak.

EH Bildu herri honetako ezkerreko subiranista guztien etxea izateko jaio zela gogoratu du Rodriguezek, eta azken urteetako lanari esker, etxe hori handitzen ari dela nabarmendu du. “Gero eta gehiago gara EH Bildun. Sektore eta norbanako berriak bat egiten ari dira ezkerreko subiranisten proiektuarekin. Biltzen ari garen indar berri guztiak erakutsi behar dira orain uztailaren 12ko hauteskundeetan”.

Mertxe Aizpurua, bere aldetik, Madrilgo aktualitate politikoaz eta horrek Euskal Herrian daukan eraginaz aritu da. Era horretara, euskal langileen interesak defendatzen dituen indar politikoa dela EH Bildu esan du. “PPk onartutako lan erreformaren derogazioa gauzatzeko akordioa gauzatua daukagu PSOE eta Podemosekin. Emandako hitza ez dutela beteko diote orain. Birritan esan digute. Baina urrats hori ematea ezinbestekoa da, guri eta langile guztiei emandako hitza betetzeko eta langileek galdutako eskubide guztiak berrezartzeko”.

Igandeko honetan asko dagoela jokoan azpimarratu du Aizpuruak, “krisiari irtenbide duina ematea edo krisiaren faktura betikoek ordaintzea, langileek ordaintzea”.

Aspaldian eskuin muturra izaten ari den gorakadaz eta Vox-ek Gasteizko Parlamentuan sartzeko duen aukeraz ere mintzatu da Azpirua. “EH Bildu beti izango da faxismoa geratuko duen horma. Uztailaren 12an erantzukizun historikoa dugu. Ezker subiranistaren boto bat bera ere ezin daiteke etxean geratu”.

Pedro Muguruza etorbidearen izen aldaketarekin oraindik ezer egin ez dela gogoratzeko, mozioa aurkeztu du EH Bilduk

Ezker subiranistak bere egin du kaleak "Martxoak 8 etorbidea" izena hartzeko egindako herri proposamena

| 2020-06-22 09:29:00

 

 

EH Bildu kezkatuta dago Pedro Muguruza etorbidearen izena aldatzeko tramiteak hasteko mozioa osoko bilkuran aho batez onartu eta 7 hilabetera oraindik ez delako horretarako pausorik eman. Iazko irailaren 25ean egindako osoko bilkuran honako testu hau onartu zen: “Pedro Muguruza kalearekin dagoen eztabaida mahai honetara (bizikidetza mahaira) eraman eta kontakizun horren barruan herritarrei ere galdetzea zer nahiko luketen egin kale izen horrekin”. 

 

Elgoibarko ezker subiranistaren ustez, 2020. urtean gauden honetan eta sinbolo frankista guztiak ezabatzea agintzen zuen Memoria Historikoaren Legea onartu zenetik 13 urte igaro direrenean, Elgoibarren oraindik ere Pedro Muguruza bezalako frankista batek kalea izatea onartezina da. Frankismoaren erreferentziazko arkitektoa eta Gorte frankisketatan diputatua izan zen Muguruza. Bere lanen artean dago Erorien Harana. Muruguza Madrilen jaio zen, nahiz eta bere familia Elgoibarkoa izan. Kaleak frankista baten izena edukitzeaz gainera, plaka falangista handi bat dago oraindik. Bestalde, Muguruzak gure udalerriko seme kutuna izaten jarraitzen du -hala da oraindik ere Frantziako diktadorea-. Gure udalerrian jarraitzen duen beste ikur frankista Morkaiko gurutzea da. 

 

Elgoibarko EH Bilduk uste du beharrezkoa dela frankismoari erreferentzia egiten dion guztia gure udalerritik kentzea, eta, beraz, hasiera ona izango litzateke erdiguneko kale honen izena aldatzea. EH Bilduk, bere mozioan, izen bat proposatu du, "Martxoak 8 etorbidea", Emakumearen Eguneko mobilizazioetan sortu zen herri-proposamenarekin bat eginez. 

 

EH Bilduk bere mozioan gogorarazi du beharrezkoa dela kalearen izena aldatzeko mekanismoak aktibatzea. Gaia Bizikidetza Batzordean lantzen hasteko eskatu du. Halaber, izen berriaren inguruan proposamenak jasotzeko edo ekarpenak egiteko, prozedura irekitzea eskatu du ezker subiranistak. 

 

 

 

 

 

 

Herriko merkataritza sustatzeko bonoen banaketarekin udal gobernuaren inprobisazioa agerian geratu dela dio EH Bilduk

Elgoibarko EH Bildutik gure kezka eta haserrea adierazi nahi dugu Elgoibarko udal gobernuak merkataritzako bonuak saltzeko erabili duen prozedurarekin. Egia da bonuak arrakastatsu izaten ari direla, logikoa denez, herritarren esku jartzen duelako udalak diru partida bat herrian kontsumitzeko. Gure lehentasunen artean ere markatu genuen hau lehenago, merkataritza dinamizatzeko tresna izan daitekeelako egitasmo oso baten barruan.

| 2020-05-28 22:50:00

 

 

Eta hori da guk faltan botatzen duguna udal gobernu honen eskutik: kudeaketa eta begirada estrategikoa. Nola ez zuten ba aurreikusi hau gerta zitekeenik? Zergatik antolatu dute guzti hau inorekin kontatu gabe (bide batez esanda, dena egiten duten bezala, bere kabuz, dakiten pertsona edo eragileekin kontatu gabe). 

 

Baina, larriena, kasu honetan, herritarren osasuna arriskuan jarri dutela da. Maiatzak 27an, asteazkenean, bonuak herritarren eskura jarri zituztenean, ikusi genituen irudiak oso larriak dira. Pandemia egoera honetan herritarren ardura eskatzen ari gara, eta udal gobernutik zabarkeria eta arduragabekeria honekin jokatzea zilegi da? Eskerrak herritarrek arduratsu jokatzen dutela! 

 

Udal gobernuak kasu honetan erakutsi duen inprobisazioa oso larria da. Ikusi da gauzak presaka eta ondo aztertu gabe egiteak zeintzu ondorio ekar ditzakeen. Herritarren ezinegona eta EH Bilduk egindako proposamenen aurrean erreakzionatzea beste biderik ez zitzaion gelditu EAJk eta PSE-EEk osatzen duen udal gobernuari, eta bonuen kanpaina martxan jarri zuten medioetan, gauzak lotu gabe. Asteazken honetan ikusi dugu inprobisazio horren ondorioak. Gure inguruko herrietan ikusi ditugu bonuak banatzeko modu eraginkorragoak, osasuntsuagoak eta arduratsuagoak. Aukera zegoen denon artean horiek begiratu, aztertu eta adosteko. Baina udal gobernuak betikoa egin du: inori entzun ez eta berea egin. Gobernatzeko eredu horren ondorioak atzo Elgoibarko kaleetan ikusitako irudiak dira. 

 

Jendea oso haserre etorri da guregana, eta jakin badakigu, kexa formal ugari erregistratu dituztela udalean bonuen banaketa sistemak sortu dituen ezinegon eta arriskuen adierazle. Hau ezin da berriz gertatu. 

 

Berriz ere eskatzen diogu udal gobernuari gauzak aurretik lantzeko, ez berain bulegoan, besteekin batera. Horrela bakarrik lortuko dugu bide ona hartzea, inprobisazioak ekidinez, eta gauzak denboraz prestatuta. 

 

Hemendik aurrerako ekimenetarako gure prestutasuna azaldu genuen osoko bilkuran, eta berriz ere mahai gainean jartzen dugu. Aurrekontuak berraztertu behar dira, baina denon artean, ekimenak adostuz, lehentasunak markatuz. EH Bildutik ez dugu marketin eta orrazketa sinplerik onartuko. Gure elkarlan zintzoa nahi badute, hor izango gaituzte, baina ez beraien proposamenei eta egiteko moduei gure oniritzia emateko soilik. Elkarlana eta lanketa arduratsua dira bide bakarra. Bestela, asteazkenean ikusitako irudiak errepikatu daitezke, eta Elgoibarrek ez du hori merezi!

Elgoibarren ere COVID-19aren ondorioei erantzuten hasteko, mahaia eratzea proposatu du EH Bilduk

| 2020-04-27 10:59:00

 

EH Bilduren ustez, premiazkoa da eragile politiko, ekonomiko eta sozialen mahaia edo foroa eratzea, Elgoibarren koronabirusak sortutako krisi larriari aurre egiten hasteko. Ezker soberanistak egiaztatu duenez, dagoeneko izugarriak dira COVID-19k udalerriko ekonomia- eta gizarte-ehunean utzi dituen ondorioak, eta horiei edukiekin eta herritarren interesak lehenetsita egin behar zaie aurre. Zentzu horretan, ulertezina eta sinestezina iruditzen zaio Elgoibarko Udalak neurririk hartu gabe eta ezer egin gabe jarraitu izana. 

 

Alarma Egoera ezarri zenetik eta koronabirusak eragindako lehen ondorio sanitario, ekonomiko eta sozialak agertzen hasi ziretik 7 aste igaro direnean, Elgoibarko Udalak ia ez du jarduera-seinalerik eman, zerga-salbuespenak ezarri besterik ez baitu egin. Elgoibarko EH Bilduren ustez, egoera larri horrek askoz ere ekintza politiko eta enpatia handiagoa eskatzen du, udalerriko bizilagunak jasaten ari diren egoera dela eta. Euskal Herriko beste toki-erakunde batzuk erakusten ari diren ekintza politikoak eta enpatia ez da ikusten Elgoibarren. 

 

Elgoibarko EH Bilduk proposamenak egin ditu COVID-19ren ondorio latzei aurre egiteko. Proposamen horien adibide dira herriko denda txikien eta autonomoen egoerari aurre egiteko aurkeztutako neurriak. Baina baditu proposamen gehiago Elgoibarko alderdi eta eragile ekonomiko eta sozialekin eztabaidatu eta adostu nahi dituenak. Ezker soberanistak azpimarratu du garaia dela laguntzeko, elkarlana eta ideia onenak bilatzeko, asko baita jokoan dagoena. Hala, gogorarazi du Elgoibarko finantza-egoera ona dela, eta, beraz, ezinbestekotzat jo du baliabide horiek ahalik eta hobekien baliatzea, guztion parte-hartzearekin interes orokorrera itzuliko diren planak egiten, eta beti pertsonak politika publikoen erdigunean jarriz.

ALBISTEAK

Elgoibarko merkatariei, ostalariei, autonomoei eta enpresei laguntzeko Udalak 800.000 bideratzea proposatu du EH Bilduk

2020-04-14 14:51:00

Udal administrazioaren egoera ekonomikoa ona dela gogoratu du Jon Peli Uriguenek, eta azpimarratu du orain dela behar duenari laguntzeko unea

EH Bilduk uste du erabakiak elkarrekin hartzeko eta egoera okerrenean dauden elgoibartarrak entzuteko garaia dela

2020-03-20 09:49:00

Jakina da egoera larrien aurrean erabaki ausartak hartu behar direla. Koronabirusaren pandemiak alarma egoera larria eragin duen honetan bezala. Krisi hau gu denok kolpatzen hasi zen unetik bertatik, argi izan duguna EH Bildun, maila guztietan, elkarlanerako unea dela hau, soilik denok batera atera gaitezkeelako arazo larri honetatik.

EH Bilduk San Antolingo araztegiaren inguruko airearen eta uraren kalitateari buruz galdetu die administrazioei

2020-03-10 19:06:00

Elgoibarko EH Bilduk idazkiak bidali dizkie Elgoibarko Udalari, Gipuzkoako Foru Aldundiari, Eusko Jaurlaritzako Ingurumen Sailari eta Ura Agentziari, San Antolin araztegiaren inguruan airearen eta uraren kalitatearen inguruan hainbat galdera eta eskaera eginez.